فوتو: قر قورعانىس مينيسترلىگى
ءىس-شارا بارىسىندا حالىق قالاۋلىلارىنا كىشى كوماندالىق قۇرام ماماندارىن دايارلاۋ جۇيەسى مەن كادەتتەردى ىرىكتەۋ ءتارتىبى تۋرالى اقپارات بەرىلدى. بۇل جونىندە قر قورعانىس ءمينيسترىنىڭ تاربيە جانە يدەولوگيا جونىندەگى ورىنباسارى, گەنەرال-مايور شايح-حاسان جازىقباەۆ باياندادى.
دەپۋتاتتار كوللەدجدىڭ ماتەريالدىق-تەحنيكالىق جابدىقتالۋىنا, كازارما مەن اسحانانىڭ جاي-كۇيىنە, مەديتسينالىق كومەك كورسەتۋ دەڭگەيىنە ەرەكشە ءمان بەردى. سونداي-اق سپورت زالى مەن مەديتسينالىق بولمەگە باس سۇعىپ, جاۋىنگەرلىك دايىندىققا جاسالعان جاعدايدى باعالادى.
دەپۋتات ايدوس سىرىمنىڭ ايتۋىنشا, كوللەدجگە نەگىزىنەن وڭتۇستىك وڭىرلەردەن كەلگەن جاستار تۇسەدى. ول ەلىمىزدىڭ بارلىق ايماعىنداعى مەكتەپتەردە اسكەري ءبىلىم بەرۋ مەكەمەلەرىنىڭ ارتىقشىلىقتارىن تۇسىندىرەتىن كاسىپتىك باعدار جۇمىسىن كۇشەيتۋ كەرەكتىگىن ايتتى.
«جاستار اسكەري بىلىممەن قاتار, بولاشاقتا ازاماتتىق سالادا دا كادەگە جارايتىن ماماندىق الىپ شىعۋى كەرەك. بۇل – ولاردىڭ موتيۆاتسياسىن ارتتىرادى», – دەدى ول.
ساپار اياسىندا كوللەدجدىڭ كىتاپحاناسى, مۋزەيى جانە سپورت كەشەندەرى دە نازاردان تىس قالعان جوق. دەپۋتاتتار كادەتتەردىڭ رۋحاني جانە پاتريوتتىق تاربيەسىنە بايلانىستى جۇرگىزىلىپ جاتقان جۇمىستارمەن تانىستى.
سوڭىندا حالىق قالاۋلىلارى وقۋ ورنىنىڭ جەكە قۇرامىمەن كەزدەسۋ وتكىزىپ, اسكەري ءبىلىم بەرۋ جۇيەسىندەگى زاڭناما تالاپتارىن ءتۇسىندىرىپ, جاستاردىڭ سۇراقتارىنا جاۋاپ بەردى.
ارايلىم مىرزاحان,
ەۇۋ ستۋدەنتى
