ەلباسىمەن بىرگە قۋاتتى قازاقستان ءۇشىن!

ورالدا وتكىزىلگەن “ەلباسىمەن بىرگە – قۋاتتى جانە سالاماتتى قازاقستان ءۇشىن!” اكتسياسىندا ەلباسىنا قۇرمەت ايقىن كورىندى ءيا, وتكەن سەنبى كۇنى ورال قالاسىندا اتالعان تاقىرىپتا وتكىزىلگەن كوپشىلىك جاستار اكتسياسى بىرلىك پەن تاتۋلىقتىڭ, استانانى ارداق تۇتۋ مەن ەلباسىن قۇرمەتتەي ءبىلۋدىڭ جانە سالاماتتى ءومىر سالتىن ورنىقتىرۋداعى جارقىن ىستەردىڭ جارشىسىنا اينالدى. ول سونىسىمەن دە جايىق جاستارىنىڭ ساناسىنان بەرىك ورىن تەۋىپ, الداعى ومىرلەرىنىڭ تەمىرقازىعى بولىپ قالا بەرمەك. اكتسيانىڭ تاعى ءبىر ۇتىمدى قىرى ءدال وسى جيىرما التىنشى ماۋسىم كۇنى “ەلباسىمەن بىرگە – قۋاتتى جانە دەنى ساۋ قازاقستان ءۇشىن” اتتى جاستار اكتسياسى اياسىندا ءۇش بىردەي ءماندى دە ماعىنالى شارا مارەگە جەتتى. ەڭ باستىسى اتالعان شارالار مازمۇن جاعىنان دا, ءتۇر جاعىنان دا, ءبىرىن-ءبىرى بايىتىپ, ءبىرىن-ءبىرى تولىقتىرىپ وتىردى. اباي اتىنداعى ورال قالاسىنىڭ ورتالىق الاڭى جاستارعا لىق تولى. مۇندا ەگەمەن ەلىمىزدىڭ باتىستاعى قاقپاسى ىسپەتتەس باتىس قازاقستان وبلىسىنىڭ گەوگرافيالىق كارتاسى ارنايى قويىلعان تاقتاعا ءىلىنىپتى. بۇل كارتا ەلوردادان ورال وڭىرىنە جانە رەسپۋبليكانىڭ وزگە دە ايماقتارىنا ارنايى جىبەرىلگەن ەكەن. مۇنداعى باستى ماقسات – ءوڭىر جاستارىنىڭ استا­نا جونىندەگى قىسقا دا نۇسقا وي ورامدارى مەن قۇت­تىقتاۋ تىلەكتەرىن ءبىلۋ ەكەن. ياعني وعان ءوڭىر ورەن­دەرى ەل بايتاعى جونىندەگى ءوز پىكىرلەرىن , ءتىپتى اقىل – جاستان دەمەكشى, استانانى ودان ءارى دا­مى­تىپ كوركەيتۋ جونىندەگى ۇسىنىستارىن دا جازىپ قالدىرا الاتىن كورىنەدى. كەيىن ءار وبلىستىڭ كار­تا­سىنا تولتىرىلعان وسىنداي بۇگىنگى ۇرپاق ءۇنى توپ­تاستىرىلىپ, ءارى ءار وبلىستىڭ كارتاسى ءبىر-ءبىرى­نە جىمداستىرىلىپ, بىرىكتىرىلىپ تۇتاس قازاقستان كار­تاسىن قۇراماق. وسى كارتا استانا مەرەكەسى كۇن­دەرى وعان قاتىسۋشىلاردىڭ نازارىنا ۇسىنىلماق. جاستار ىركىلگەن جوق. ءوڭىر كارتاسىنان ولار تۇسىرگەن العاشقى قۇتتىقتاۋ تىلەكتەر دە كوزىمىزگە شا­لىندى. ونى دەرەۋ وقي باستادىق. “استانا – قا­زاق­ستاننىڭ جۇرەگى”, “اسقاقتاي بەر, استانا”, “الەم كارتاسىنداعى جاڭا قالا”, “ەلباسى – استا­نا­نىڭ باس ساۋلەتشىسى”, “استانا – ورتاق ماقتا­نىشىمىز”, “سارىارقا توسىندەگى ەل جۇلدىزى”, “ورالدى استانا دەڭگەيىنە جاقىنداتايىق” دەگەن جاستار مەن ستۋدەنتتەردىڭ شىنايى لەبىزدەرى كوڭىلدەرگە جىپ-جىلى نۇر سەپكەندەي كورىنەدى. اكتسيا اياسىنداعى كەزەكتى شارا جاستار شەرۋىنە جالعاستى. ورالدىڭ ورتالىق الاڭىنان قوزعالىپ العا قاراي قادام باسقان قالىڭ لەك دوستىق داڭ­عىلىنىڭ بويىمەن اتتاي ون ءتورت جىل بويى وتار­شىلدارمەن, قازاق حالقىنىڭ تاۋەلسىزدىگى جولىندا كۇرەسكەن سىرىم دات ۇلىنىڭ ەسكەرتكىشىنە قاراي باعىت الدى. “بىرلىگىمىز جاراسقان” اتتى ايشىقتى جازۋلارى بار كيىم ۇلگىلەرى بويىنشا كيىنگەن جاستار مەن ستۋدەنتتەردىڭ ادىمدارى ارشىندى دا اسقاق كورىنەدى. ولاردىڭ قولدارىنا ۇستاعان ترانسپورانتتاردا “مەنىڭ ەلىم – قازاقستان”, “ەلباسىمەن بىرگە ەل قۋا­تىن ەسەلەيمىز”, “نۇرسۇلتان ءابىش ۇلى – جاس­تاردىڭ قامقورشىسى”, “ورال – ەسىرتكىسىز قالا” اتتى جازۋلار بىردەن كوزگە شالىنادى. سىرىم دات ۇلى الاڭىنا وسىلايشا سالتاناتتى شەرۋمەن جەتكەن جاستار وسى جەرگە ورنالاس­تى­رىل­عان ۇلكەن ساحنانىڭ قاسىنا كەلىپ ايالدادى. بۇل جەردە شەرۋمەن كەلگەن جاستاردى كۇتىپ تۇرعان ولار­دىڭ زامانداستارىنىڭ قاراسى ءتىپتى مول كورىندى. الاڭ جاستاردىڭ كوپتىگىنەن جەلدى كۇنگى تەڭىزدەي تولقيدى. “ەلباسىمەن بىرگە – قۋاتتى جانە سالاماتتى قازاقستان ءۇشىن” اكتسياسىنا قاتىسۋشىلار الدىندا باتىس قازاقستان وبلىسىنىڭ ىشكى ساياسات باسقارماسى باستىعىنىڭ ورىنباسارى مۇراتقالي تورەگەلديەۆ ءسوز سويلەدى. – الدىمىزدا استانا كۇنى ەسىك قاعىپ تۇر. ونىڭ تەز ارادا بوي كوتەرىپ, جاڭا تۇرپاتقا يە بو­لۋىنا ەلباسى – قازاقستان رەسپۋبليكاسىنىڭ تۇڭ­عىش پرەزيدەنتى نۇرسۇلتان نازارباەۆتىڭ قوسقان ۇلەسى قوماقتى. سوندىقتان ءبىز بۇل ەكى ەسىم مەن ەكى اتاۋدى ءبىر-بىرىنەن ءبولىپ-جارا قاراي ال­ماي­مىز. بۇگىندە رەسپۋبليكامىز الەم جۇرتشى­لى­عى تانىعان ەلگە اينالىپ, كەلەشەككە نىق قادام با­سىپ كەلەدى. وسى ارادا ايرىقشا اتاپ وتەرلىك ءجايت: تەك قۋاتتى, دەنى ساۋ ۇلت قانا – كەلەشەگى كە­مەل, باعدارى ايقىن قۋاتتى مەملەكەت قۇرا الادى. ءبىز مۇنداي بيىك ماقساتقا تەك ەلباسىنىڭ كورەگەن ساياساتىنىڭ ارقاسىندا عانا جەتە الامىز. سوندىقتان دا بۇگىنگى اكتسيانىڭ اتاۋى “ەلباسىمەن بىرگە – قۋاتتى جانە دەنى ساۋ قازاقستان ءۇشىن!” دەپ اتالىپ وتىر, – دەدى ول. قازاقستاننىڭ ازاماتتىق اليانسى باتىس قا­زاق­ستان وبلىستىق فيليالى ءتورايىمىنىڭ ورىن­باسارى سەرگەي دميتريۋك نۇرسۇلتان نازارباەۆ تاۋەلسىز قازاق مەملەكەتتىلىگىنىڭ نەگىزىن قالاۋشى ەكە­نىن ايتا كەلىپ, بۇگىندە الەم تانىعان ۇلت كوش­باس­شىسىنا اينالعانىن شىنايى جۇرەكتەن جەت­كىزدى. سونىمەن بىرگە ول سالاماتتى ءومىر سالتىن ۇستانۋدا ەلباسىنىڭ بارشا قازاقستاندىقتارعا كورسەتىپ جۇرگەن جەكە ونەگەسى جونىندە دە دايەكتى مىسالدار كەلتىردى. بۇدان ءارى شەشەن الەمدىك دەڭگەيدەگى عاسىر دەرتى – ناشاقورلىق پەن ەسىرتكى بيزنەسىنە قازاق­ستان­دىق قوعام جاعدايىندا جول بەرمەۋ, وعان توسقاۋىل قويۋ قاجەتتىلىگىنە توقتالا كەلىپ, ونىمەن كۇرەسكە جۇمىلا كىرىسۋ قاجەتتىلىگىن العا تارتتى. ءارى بۇگىنگى وتكىزىلىپ وتىرعان اكتسيا ماقساتىنىڭ ءبىرى دە وسى ەكەنىن جەتكىزدى. ەلباسى ن.ءا.نازارباەۆتىڭ باستاماسى بويىنشا بۇگىندە سالاماتتى ءومىر سالتىن قالىپتاستىرۋ ءىسى مەم­لەكەتتىك دەڭگەيدە قولعا الىندى. مۇنىڭ ءىشىن­دە ناشاقورلىق پەن باسقا دا زياندى ادەتتەردى اۋىز­دىقتاۋ جانە ولاردىڭ الدىن الۋ ءىسى جالپىحا­لىقتىق مىندەت رەتىندە بەلگىلەنىپ وتىر. جاستار وسى كۇرەستىڭ الدىڭعى لەگىنەن تابىلاتىنىنا سەنى­مىمىز مول, – دەپ ءتۇيىن جاسادى سەرگەي دميتريەۆيچ. ونىڭ ءسوزى مەن شاقىرۋى اكتسياعا قاتىسۋشىلار تاراپىنان تولىق قولداۋ تاپتى. سونداي-اق, وسى كۇنى اتالعان اكتسيا اياسىندا ەڭ ۇزدىك نوميناتسيالار بويىنشا جەڭىمپازدار انىقتالدى. ولاردىڭ توبىن ەڭ ۇزدىك انشىلەر مەن بيشىلەر, جاس ماماندار, كوڭىلدى تاپقىشتار كلۋبى, جاستار قوعامدىق بىرلەستىگى قۇرايدى. وسى ارادا جاستار اراسىندا سالاماتتى ءومىر سالتىن قالىپتاس­تىرۋداعى ەرەكشە ەڭبەگى ءۇشىن نوميناتسياسىن يەلەنگەن پوليتسيا اعا لەيتەنانتى قاسيەت ساتقانوۆتىڭ ەسىمىن ايرىقشا اتاپ وتۋگە بولادى. جوعارىدا ايتىپ وتكەنىمىزدەي ورال قالاسىندا “ەلباسىمەن بىرگە – قۋاتتى جانە سالاماتتى قازاقستان ءۇشىن” اتتى تاقىرىپتا وتكىزىلگەن اكتسيا تاۋەلسىز قازاقستان مەن ونىڭ باس ورداسى استاناعا دەگەن ماحابباتتىڭ, ەلباسىمىز نۇرسۇلتان ءابىش ۇلىنا دەگەن قۇرمەت پەن باس ءيۋدىڭ بەلگىسىندەي اسەر قالدىردى. تەمىر قۇسايىن. باتىس قازاقستان وبلىسى.