فوتو: اشىق دەرەككوز
ايدا بالاەۆانىڭ ايتۋىنشا, بيىلعى اقپاراتتىق اپتالىق اياسىندا وتباسىن جوسپارلاۋ, ەرلەر مەن ايەلدەر دەنساۋلىعى, ادام پاپيللوماسى ۆيرۋسىنىڭ جانە جىنىستىق جولمەن بەرىلەتىن ينفەكتسيالاردىڭ (ججبي) الدىن الۋ سىندى ماڭىزدى تاقىرىپتارعا ەرەكشە كوڭىل بولىنگەن.
«اپتالىق بارىسىندا 20 مىڭنان استام ءىس-شارا ۇيىمداستىرىلىپ, شامامەن 500 مىڭ ادامدى قامتىدى. بۇل — وتكەن جىلمەن سالىستىرعاندا ەكى ەسە كوپ كورسەتكىش. الەۋمەتتىك جەلىلەردە اپتالىق حەشتەگتەرىمەن 360 مىڭعا جۋىق جازبا جاريالاندى. بۇقارالىق اقپارات قۇرالدارىندا 1,5 مىڭنان استام ماتەريال جارىق كوردى. سونىمەن قاتار 78 مىڭنان استام تەگىن كەڭەس بەرىلىپ, 8 مىڭنان اسا ججبي/ايتۆ بويىنشا تەستىلەۋ جۇرگىزىلدى. بۇل ناتيجەلەر — ۇلتتىق كوميسسيا مۇشەلەرىنىڭ, مەملەكەتتىك ورگانداردىڭ, ۇكىمەتتىك ەمەس ۇيىمداردىڭ, ساراپشىلىق جانە عىلىمي قاۋىمداستىقتاردىڭ بىرلەسكەن قاجىرلى ەڭبەگىنىڭ ارقاسى», دەدى ايدا بالاەۆا.
مينيستر ناۋقانعا بەلسەندى اتسالىسقان دەنساۋلىق ساقتاۋ, وقۋ-اعارتۋ, عىلىم جانە جوعارى ءبىلىم مينيسترلىكتەرىنىڭ ماماندارىنا, سونداي-اق بۇۇ حالىقتىڭ قونىستانۋى سالاسىنداعى قورى (يۋنفپا), دۇنيەجۇزىلىك دەنساۋلىق ساقتاۋ ۇيىمى (ددۇ), يۋنەسكو سياقتى حالىقارالىق سەرىكتەستەرىمىزگە جانە وتاندىق ۇكىمەتتىك ەمەس ۇيىمدارعا — كارم, Saulyq LIFE, YPEER, ۇلتتىق ۆولونتەرلىك جەلى مەن باسقا دا سەرىكتەستەرىمىزگە شىنايى العىس ايتتى.
ء«بىز ورتاق ماقسات — كەلەشەك ۇرپاقتىڭ ساۋلىعى ءۇشىن ءتيىمدى ۆەدومستۆوارالىق ءوزارا ءىس-قيمىل ۇلگىسىن كورسەتە الدىق. بۇل ناتيجەلەر – بارلىق سەرىكتەستەرىمىزدىڭ قاجىرلى ەڭبەگىنىڭ جەمىسى. بارشاڭىزعا ۇلكەن راقمەت!» دەدى مينيستر.
ونىڭ ايتۋىنشا, ۇلتتىق كوميسسيا رەپرودۋكتيۆتى دەنساۋلىق مادەنيەتىن دامىتۋ ءىسىن ءارى قاراي دا باستى نازاردا ۇستايتىن بولادى. ويتكەنى تەك اقپاراتتاندىرىلعان, دەنساۋلىق ماسەلەلەرى جايلى اشىق سويلەسە الاتىن جانە سانالى شەشىم قابىلدايتىن قوعام عانا دەنى ساۋ ۇرپاقتى تاربيەلەي الادى.
