فورۋم اياسىندا وتان الدىنداعى ازاماتتىق بورىشىن ۇزدىك اتقارىپ جۇرگەن ساربازداردىڭ انالارىنا قۇرمەت كورسەتىلدى. قۇقىقتىق ءتارتىپ اسكەرىندە قىزمەت اتقاراتىن ساربازداردىڭ انالارىنا ماراپاتتى ۇلتتىق ۇلان باس قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى قايرات ۇمبەتوۆ تابىستادى.
ساحنادا تۇرعان سارباز انالارىنا تاعى ءبىر توسىن سىي جاسالدى – ولار ءار وڭىردە قىزمەت اتقارىپ جۇرگەن ۇلدارىمەن قاۋىشۋ قۋانىشىنا بولەندى. ۇيىمداستىرۋشىلاردىڭ ايتۋىنشا, ساربازدار ىشكى ىستەر ءمينيسترىنىڭ ورىنباسارى - ۇلتتىق ۇلاننىڭ باس قولباسشىسى قۇقىعىمەن گراموتالارمەن ماراپاتتالىپ, 10 كۇندىك دەمالىس العان. كەي انالار قۋانىشتان كوز جاستارىنا ەرىك بەردى.
– مەن ۇلتتىق ۇلاننىڭ 5573 اسكەري بولىمىندە قىزمەت اتقارامىن. بۇگىنگى شارانى ۇيىمداستىرۋشىلار مەن اسكەر باسشىلىعىنا شەكسىز ريزاشىلىعىمدى بىلدىرەمىن, – دەدى قاتارداعى جاۋىنگەر ۆلاديمير انيسيموۆ.
تاعى ءبىر ۇلگىلى سارباز – قاتارداعى ءادىل بايپاقوۆ تا ءوز العىسىن جەتكىزدى:
– انامدى كورگەنىمە قۋانىشتىمىن. بۇل – مەن ءۇشىن ەڭ باقىتتى ساتتەردىڭ ءبىرى. قىزمەتىمدى جوعارى باعالاعان باسشىلىققا العىسىمدى ايتامىن, – دەپ اتاپ ءوتتى ول.
مەرەكەلىك شارا ۇلتتىق ۇلاننىڭ ءان-بي ءانسامبلى جانە باسقا دا كۇشتىك قۇرىلىمداردىڭ اسكەري ونەرپازدارىنىڭ ۇيىمداستىرۋىمەن وتكەن كونتسەرتپەن جالعاستى.
