بۇل ناۋقان مادەنيەت جانە اقپارات, دەنساۋلىق ساقتاۋ, وقۋ-اعارتۋ, عىلىم جانە جوعارى ءبىلىم مينيسترلىكتەرىنىڭ, سونداي-اق حالىقارالىق ۇيىمداردىڭ – بۇۇ حالىق قونىستانۋى قورى (يۋنفپا), دۇنيەجۇزىلىك دەنساۋلىق ساقتاۋ ۇيىمى (ددسۇ), يۋنەسكو - جانە قازاقستاندىق ۇكىمەتتىك ەمەس ۇيىمداردىڭ, سونىڭ ىشىندە كاپم, Saulyq LIFE, YPEER جانە باسقالاردىڭ قولداۋىمەن جۇزەگە اسىرىلدى.
بەس كۇن بويى ەلىمىزدىڭ بارلىق وڭىرىندە بىرىزدەندىرىلگەن اقپاراتتىق-اعارتۋشىلىق كامپانيا جۇرگىزىلدى. ءار كۇنگە جەكەلەگەن تاقىرىپ ارنالدى: وتباسىن جوسپارلاۋدان باستاپ, جاسوسپىرىمدەرگە ارنالعان رەپرودۋكتيۆتى ءبىلىم بەرۋ, اپۆ, ججبي الدىن الۋ جانە ەرلەر دەنساۋلىعىن ساقتاۋ ماسەلەلەرىنە دەيىن.
دوڭگەلەك ۇستەل بارىسىندا اپتالىقتىڭ قورىتىندىلارى شىعارىلىپ, رەپرودۋكتيۆتى دەنساۋلىق سالاسىنداعى مەملەكەتتىك ساياساتتى جەتىلدىرۋگە ارنالعان ۇسىنىستار ايتىلدى. بۇل – بولاشاق ۇرپاقتىڭ ءال-اۋقاتىنا تىكەلەي اسەر ەتەتىن ماڭىزدى باعىت. كامپانيا سەرىكتەستەرىنىڭ ۇسىنىستارى مەن ۇسىنىمدارىن جيناۋعا ەرەكشە كوڭىل ءبولىندى. بۇل ماتەريالدار جيناقتالىپ, ۇلتتىق كوميسسيا وتىرىسىندا ۇسىنىلادى.
كامپانيانىڭ نەگىزگى ناتيجەلەرى: 20 مىڭنان استام ءىس-شارا وتكىزىلدى (2024 جىلمەن سالىستىرعاندا 2 ەسە كوپ); جالپى قامتىلۋ – شامامەن 500 مىڭ ادام, ونىڭ ىشىندە 240 مىڭنان استامى – جاسوسپىرىمدەر مەن جاستار; 80 مىڭعا جۋىق تەگىن كەڭەس بەرىلدى, 8,4 مىڭنان استام ججبي جانە ايتۆ-عا تەستىلەۋ جۇرگىزىلدى; الەۋمەتتىك جەلىلەردە 359 مىڭنان استام جازبا جاريالاندى, باق-تا 1,5 مىڭنان استام ماتەريال جارىق كوردى; اقپاراتتىق بەينەروليكتەر ەلىمىز بويىنشا 627 LED-ەكراندا كورسەتىلدى.
اپتالىقتىڭ ءار كۇنى ناقتى تاقىرىپقا ارنالدى – وتباسىن جوسپارلاۋ, جاسوسپىرىمدەردىڭ رەپرودۋكتيۆتى ساۋاتىن ارتتىرۋ, اپۆ, ججبي الدىن الۋ جانە ەرلەر دەنساۋلىعى. مۇنداي ءتاسىل ماقساتتى توپتارمەن جۇيەلى, باعىتتالعان ءارى سالالار اراسىنداعى ۇيلەسىمدى كوممۋنيكاتسيانى ورناتۋعا مۇمكىندىك بەردى.
ۇلتتىق كوميسسيا توراعاسىنىڭ ورىنباسارى جۇلدىزاي ىسقاقوۆا توراعا اتىنان سويلەپ, باستاماعا ۇلەس قوسقان بارلىق سەرىكتەستەر مەن قاتىسۋشىلارعا العىسىن ءبىلدىردى:
- «رەپرودۋكتيۆتى دەنساۋلىققا قامقورلىق مادەنيەتىن قالىپتاستىرۋ – ءبىر رەتتىك اكتسيا ەمەس, تۇراقتىلىقتى, ۇيلەستىرۋدى جانە جان-جاقتى قاتىسۋدى تالاپ ەتەتىن ستراتەگيالىق مىندەت. وسىنداي باستامالار كۇشتەرىمىزدى بىرىكتىرۋگە, ۇزدىك تاجىريبەلەردى كەڭىنەن ەنگىزۋگە جانە قوعامداعى مىنەز-ق ۇلىق پەن كوزقاراستى ناقتى وزگەرتۋگە جول اشادى», – دەدى ول.
تالقىلاۋعا قر پارلامەنتى سەناتىنىڭ دەپۋتاتى اينۇر ارعىنبەكوۆا, قر دەنساۋلىق ساقتاۋ مينيسترلىگىنىڭ وكىلى شاكيحزات حالىقوۆا, ۇلتتىق كوميسسيا مۇشەلەرى, وڭىرلىك دەنساۋلىق ساقتاۋ باسقارمالارىنىڭ وكىلدەرى, حالىقارالىق ۇيىمدار, زەرتتەۋ جانە ساراپشىلىق قاۋىمداستىق قاتىستى.
