فوتو: اشىق دەرەككوز
وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى تاراتقان مالىمەتكە سەنسەك, كوپبەيىندى ونكولوگيا جانە حيرۋرگيا ورتالىعى اتى جامان اۋرۋمەن كۇرەستىڭ جاڭا ساتىسىنا كوشىپ وتىر.
ورتالىقتا جىلىنا 800-دەن استام وتا جاسالادى. بۇرىن پاتسيەنتكە مەديتسينالىق ساراپتاۋ قورىتىندىسىن قويۋ ءۇشىن ونىڭ گيستولوگيالىق تالداۋى الماتى جانە استانا قالالارىنا جىبەرىلىپ, قورىتىندىسىن كۇتۋ ءۇشىن 2-3 اپتا ۋاقىت كەتەتىن. گيستولوگيالىق زەرتتەۋ ناتيجەسى كەلمەيىنشە, ناۋقاسقا ەم تاعايىنداۋ دا مۇمكىن ەمەس ەدى. ەندى سول ولقىلىقتىڭ ورنى تولتىرىلدى.
مامانداردىڭ ايتۋىنشا, ەكسپرەسس-گيستولوگيا – وتا كەزىندە الىنعان ءتىن ۇلگىسىن جەدەل تۇردە مۇزداتىپ, ميكروسكوپپەن زەرتتەۋگە مۇمكىندىك بەرەتىن زاماناۋي ءادىس. ول نەبارى 15-20 مينۋت ىشىندە ناتيجەنى انىقتاپ, وپەراتسيا بارىسىنا دەرەۋ وزگەرىس ەنگىزۋگە جاعداي جاسايدى. مۇنداي تەحنولوگيا حيرۋرگيانىڭ دالدىگىن ارتتىرىپ قانا قويماي, ەمنىڭ ءتيىمدى ستراتەگياسىن تاڭداۋعا مۇمكىندىك بەرەدى.
ورتالىق ماماندارىنىڭ ءادىستى مەڭگەرۋ بويىنشا بىلىكتىلىكتەرى جەتىلدىرىلىپ, تاجىريبە الماسۋلاردان ءوتتى. الداعى ۋاقىتتا ونكولوگيالىق اۋرۋلاردى 15-20 مينۋتتا انىقتايتىن ءادىستىڭ ارقاسىندا بۇل دەرتتى ەمدەۋگە تيىمدىلىك تە جوعارىلاماق.
جامبىل وبلىسى
