فوتو: alrt.kz
قازاقستان رەسپۋبليكاسىنىڭ باس پروكۋراتۋراسى تۇركيادا ۇستالعان «Astana LRT» كومپانياسىنىڭ بۇرىنعى باسشىسى تالعات ارداندى ەكستراديتسيالاۋ ماسەلەسىنە بايلانىستى تۇسىنىكتەمە بەردى.
ۆەدومستۆو تالعات اردانعا «سەنىپ تاپسىرىلعان بوتەن م ۇلىكتى يەمدەنۋ نەمەسە ىسىراپ ەتۋ» جانە «لاۋازىمدىق وكىلەتتىكتەردى تەرىس پايدالانۋ» باپتارى بويىنشا قىلمىستىق ءىس قوزعالىپ, ونىڭ سىبايلاس جەمقورلىققا قارسى قىزمەتپەن ىزدەۋدە جۇرگەنىن ءتۇسىندىردى. وعان قاتىستى بۇلتارتپاۋ شاراسى رەتىندە قاماۋعا الۋ شەشىمى قابىلدانعان. تالعات اردان حالىقارالىق ىزدەۋدە بولعان.
رەسمي اقپاراتقا سايكەس, 2025 جىلعى 10 مامىردا ينتەرپولدىڭ ۇلتتىق ورتالىق بيۋروسى ارقىلى ارداننىڭ تۇركيا اۋماعىندا ۇستالىپ, انتالياداعى تۇزەۋ مەكەمەسىنە جەتكىزىلگەنى تۋرالى حابار كەلىپ تۇسكەن.
«قازىرگى ۋاقىتتا قر باس پروكۋراتۋراسى تالعات ارداندى ەكستراديتسيالاۋ ءۇشىن بارلىق قاجەتتى قۇجاتتاردى تۇركيا رەسپۋبليكاسىنىڭ قۇزىرلى ورگاندارىنا جولدادى. قازىر ونى ەكستراديتسيالاۋ ماسەلەسى تۇرىك تاراپىمەن قارالىپ جاتىر», دەلىنگەن باس پروكۋراتۋرانىڭ حابارلاماسىندا.
ەسكە سالا كەتەيىك, 2025 جىلعى 13 مامىردا قازاقستاننىڭ ۇلتتىق قاۋىپسىزدىك كوميتەتى «Astana LRT» كومپانياسىنىڭ بۇرىنعى باسشىسى تالعات ارداننىڭ تۇركيانىڭ انتاليا قالاسىندا ۇستالعانىن حابارلاعان بولاتىن. سول كەزدە بەلگىلى بولعانداي, قر باس پروكۋراتۋراسى تالعات ارداندى حالىقارالىق ىزدەۋگە جاريالاپ, ونى 2019 جىلى ەكستراديتسيالاۋ تۋرالى تۇركيانىڭ ادىلەت مينيسترلىگىنە ءوتىنىش جىبەرگەن.
وسىعان بايلانىستى تۇركيانىڭ قۇزىرلى ورگاندارى ىزدەستىرۋ شارالارىن جۇرگىزگەن.
«بيىل ۇلتتىق قاۋىپسىزدىك كوميتەتى تالعات ارداننىڭ ناقتى جۇرگەن جەرىن انىقتادى. وسىدان كەيىن تۇركيانىڭ قۇقىق قورعاۋ ورگاندارى ونى انتاليادا ۇستادى. 9 مامىر كۇنى انتاليا سوتى تالعات ارداندى قازاقستانعا دەپورتاتسيالاۋ تۋرالى شەشىم شىعاردى, قازىرگى تاڭدا ول قاماۋدا», دەپ حابارلادى قر ۇقك 2025 جىلعى 13 مامىردا.
ايتا كەتەيىك, 2023 جىلدىڭ مامىر ايىندا استانانىڭ قىلمىستىق ىستەر جونىندەگى مامانداندىرىلعان اۋدانارالىق سوتى LRT ءىسى بويىنشا ايىپتالۋشىلار تالعات اردان مەن قانات سۇلتانبەكوۆكە سىرتتاي ۇكىم شىعارعان بولاتىن.
تالعات اردان «Astana LRT» كومپانياسىن 2014 پەن 2017 جىلدار ارالىعىندا باسقارعان. انتيكور مالىمەتىنشە, ول ۇرلىق فاكتىسى اشكەرەلەنبەي تۇرىپ, ەلدەن كەتىپ قالعان.
سونداي-اق قۇقىق قورعاۋ ورگاندارى بۇل قىلمىستىق سحەمانى استانا قالاسى اكىمىنىڭ بۇرىنعى ورىنباسارى سۇلتانبەكوۆ پەن كومپانيانىڭ بۇرىنعى باسشىسى اردان شەتەلدىك جانە قازاقستاندىق كومپانيالاردىڭ كومەگىمەن ۇيىمداستىرعانىن مالىمدەدى.
