دەنساۋلىق ساقتاۋ ءمينيسترى اقمارال ءالنازاروۆا, دۇنيەجۇزىلىك دەنساۋلىق ساقتاۋ ۇيىمىنىڭ قازاقستانداعى كەڭسەسىنىڭ باسشىسى سكەندەر سىلا, دۇنيەجۇزىلىك دەنساۋلىق ساقتاۋ ۇيىمى ەۋروپالىق ايماقتىق بيۋروسىنىڭ, گەرمانيا, رەسەي, تۇركيا, فينليانديا لاتۆيا, وزبەكستان, قىرعىزستان, مەملەكەتتەرى ماماندارى قاتىسقان جيىندا تاۋەلسىز مەيىرگەرلىك قىزمەتتى دامىتۋ, ورتا مەديتسينالىق قىزمەتكەرلەردىڭ دەنساۋلىق ساقتاۋ جۇيەسىندەگى ءرولىن ارتتىرۋ جايلى كەڭىنەن ايتىلدى.
كونفەرەنتسيادا وبلىس اكىمى نۇرلىبەك نالىباەۆ ءوڭىر مەديتسيناسىنداعى جاڭالىقتارعا توقتالدى. ايماقتاعى مەديتسينا مەكەمەلەرىندە 12 مىڭعا جۋىق مەيىرگەر ەڭبەك ەتەدى. ولاردىڭ حالىق دەنساۋلىعىن جاقسارتۋعا قوسقان ۇلەسى ولشەۋسىز.
«وتكەن جىلى ايماقتىڭ دەنساۋلىق ساقتاۋ سالاسىنىڭ بيۋدجەتى 146 ملرد 200 ملن تەڭگەگە جەتىپ, «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا بارلىق اۋداندا 28 مەديتسينالىق نىسان سالىندى. قىزىلوردا قالاسىنان جىلىنا 10 مىڭ ادامعا دەيىن قىزمەت كورسەتۋگە مۇمكىندىگى بار جاڭا قان ورتالىعى اشىلىپ, ەل يگىلىگىنە قىزمەت ەتە باستادى. انا مەن بالا ءومىرىن قورعاۋدا كوپبەيىندى وبلىستىق اۋرۋحانا بازاسىندا جاڭا مرت اپپاراتى ىسكە قوسىلىپ, 70 ورىندىق پەريناتالدىق ءبولىم پايدالانۋعا بەرىلدى. وبلىس ورتالىعىندا ەمحاناسى مەن ونكولوگيالىق بولىمشەسى بار 300 ورىندىق كوپبەيىندى اۋرۋحانا, ۇلتتىق جوبا اياسىندا 4 كوپبەيىندى اۋداندىق ورتالىق اۋرۋحانا جانىنان قوسىمشا قۇرىلىس سالىنىپ جاتىر. مەديتسينا سالاسىن بىلىكتى كادرلارمەن قامتاماسىز ەتۋ ماقساتىندا بىلتىر جەرگىلىكتى بيۋدجەت قاراجاتى ەسەبىنەن ماماندار بىلىكتىلىگىن ارتتىرۋعا 144 ملن تەڭگە ءبولىندى», دەدى وبلىس باسشىسى.
كونفەرەنتسيادا مەيىرگەرلىك قىزمەتتى دامىتۋ باعىتىندا ۇسىنىستار ايتىلىپ, مەديتسينالىق كوللەدج cتۋدەنتتەرىنە شەتەلدىك وقۋ ورىندارىنا جولدامالار تابىستالدى. عاسىرعا جۋىق تاريحى بار قىزىلوردا مەديتسينالىق جوعارى كوللەدجىندە بۇگىندە 2 840 ستۋدەنت ءبىلىم الىپ جاتىر, 142 وقىتۋشى ەڭبەك ەتەدى. تۇركيانىڭ «Acibadem», «Liv Hospital», «Medicana Atasehir», «Medical Park» كلينيكالار جەلىسىمەن مەموراندۋمعا وتىرعان كوللەدجدى «ەمدەۋ ءىسى», «مەيىرگەر ءىسى» ماماندىعى بويىنشا بىتىرەتىن 30 جاس سولتۇستىك وبلىستاردا, «فارماتسيا» ماماندىعىن العان 6 ستۋدەنت الماتى قالاسىنداعى «بوتانيكالىق باقتا» تاجىريبەدەن وتكەن. ريگا مەديتسينالىق كوللەدجىندە 3 ستۋدەنت وقۋىن جالعاستىرىپ كەلەدى.
جۇمىس ىستەپ جۇرگەن ورتا بۋىن ماماندارىنىڭ ءبىلىمىن جەتىلدىرىپ, ورتالىقتاندىرىلعان ترەنينگ جۇيەسىن قالىپتاستىرۋ ماقساتىندا بىلتىر كوللەدج جانىنان «مەيىرگەر ءىسىن دامىتۋ» ورتالىعى اشىلدى. ورتالىق ارقىلى جۇرگىزىلگەن مونيتورينگ ناتيجەسىندە مەكتەپ مەيىرگەرلەرىنىڭ 1,9%-ى عانا ءبىلىمىن جەتىلدىرۋ كۋرسىنان وتكەنى بەلگىلى بولدى. سول سەبەپتى «مەكتەپ مەديتسيناسىنداعى مەيىرگەر ءىسى» تاقىرىبىندا 300 ساعاتتىق سەرتيفيكاتتاۋ كۋرسى ۇيىمداستىرىلىپ, ءبىلىم وشاقتارىنداعى 417 مەيىرگەردىڭ 97%-ى كۋرستان وتكەن. كوللەدجدە لاتۆيا تاجىريبەسى نەگىزىندە پاتسيەنتتىڭ تۋىسىن ناۋقاس كۇتىمىنە وقىتۋعا ارنالعان «مەيىرگەرلىك كۇتىم» ارنايى كابينەتى اشىلدى. وندا توسەك تارتىپ جاتقان جاننىڭ جاقىندارىنا قاجەت داعدىلاردى ۇيرەتەدى.
بىلتىر جەرگىلىكتى بيۋدجەت قاراجاتى ەسەبىنەن مەديتسينالىق ۇيىمداردىڭ 30 دارىگەرى حيرۋرگيا, ەندوسكوپيا, نەۆرولوگيا, كارديوحيرۋرگيا, نەاناتالدى حيرۋرگيا, بالالار ورتوپەدياسى بويىنشا تۇركيا, رەسەي, بەلارۋس رەسپۋبليكالارىنىڭ جەتەكشى كلينيكالىق-اكادەميالىق بازالارىندا بىلىمدەرىن جەتىلدىردى. وڭىرگە اسا قاجەتتى مەديتسينا ماماندىقتارى بويىنشا 176 رەزيدەنت وبلىس اكىمىنىڭ گرانتىمەن ءبىلىم الىپ كەلدى. «جالپى تاجىريبەلى دارىگەر» ماماندىعى بويىنشا مامان دايارلاۋعا وبلىس اكىمىنىڭ 177 ءبىلىم بەرۋ گرانتى ءبولىندى.
«وتكەن جىلى مادەنيەت سالاسىنىڭ قىزمەتكەرلەرىنە العاش رەت كوپقاباتتى تۇرعىن ءۇي سالىنىپ, 40 جاڭا قىزمەتتىك پاتەر تابىستالدى. بۇگىنگى حالىقارالىق ماڭىزدى شارادا دەنساۋلىق ساقتاۋ سالاسىنىڭ قىزمەتكەرلەرىنە دە 100 پاتەرلىك جاڭا تۇرعىن ءۇي سالۋ جونىندە شەشىم قابىلدادىق. جاقىن ارادا قۇرىلىسى باستالىپ, جىل سوڭىنا دەيىن تابىستالادى», دەدى وبلىس اكىمى.
سوڭعى ەكى جىلدا وبلىستىڭ بارلىق ەلدى مەكەنىندەگى دەنساۋلىق ساقتاۋ مەكەمەلەرىنە 225 جاڭا سانيتارلىق اۆتوكولىك تابىستالعان. حالىق سۇرانىسىنا سايكەس 45 جەدەل جاردەم كولىگى الىنىپ, وبلىستىق مەديتسينالىق جەدەل جاردەم ستانساسى تولىق قامتاماسىز ەتىلدى.
قىزىلوردا
