ينفورماتيكا پانىنە بۇرىننان قىزىعاتىن جانىبەك 10-سىنىپتان بەيىندى پاندەرىن تاڭداپ, دايىندىعىن باستاعان. ساباقتا بەلسەندى بولىپ, قوسىمشا كۋرستارعا قاتىستى. ۇبت-عا كىرەر الدىندا ازداپ قوبالجىعان جانىبەك ءوز بىلىمىنە سەنگەن. تەست سۇراقتارى نەگىزىنەن بۇرىننان دايىندالعان تاقىرىپتاردان كەلىپتى. «ارمانىم – ءىت سالاسىنىڭ مامانى بولۋ. باعدارلامالار قۇراستىرۋ, جاڭا جۇيەلەردى مەڭگەرۋ ماعان قىزىق. وسى باعىتتى تەرەڭدەتىپ وقىعىم كەلەدى. سول سەبەپتى ۇبت-دا بەيىندىك ءپان رەتىندە ينفورماتيكانى تاڭدادىم. قاي ۋنيۆەرسيتەتكە تۇسەتىنىمدى ناقتى شەشكەن جوقپىن, بىراق الماتى قالاسىندا ءبىلىم السام دەگەن ويىم بار. ماعان ءبىلىم مەن تاربيە, باعىت-باعدار بەرگەن ۇستازدارىما العىسىم شەكسىز», دەيدى جانىبەك.
كوپبالالى وتباسىنان شىققان جانىبەكتىڭ اكەسى ۆاحتادا جۇمىس ىستەيدى, اناسى ءۇي شارۋاسىندا. وزىنەن ۇلكەن اعاسى قىزمەتتە بولسا, كەيىنگى ءۇش ءىنىسىنىڭ دە ساباق ۇلگەرىمى جاقسى ەكەن. سىنىپ جەتەكشىسى گۇلزيرا اعابەكقىزى شاكىرتىنىڭ جوعارى ناتيجە كورسەتەتىنىنە سەنىمدى بولعانىن ايتادى. «وقۋشىم سابىرلى, بىلىمگە قۇشتار ءارى جاۋاپكەرشىلىگى جوعارى. مىنەزى – تۇيىق, ەموتسياسىن سىرتقا شىعارمايدى. سۇراق قويساڭ تياناقتى جاۋاپ بەرەدى. ساباق ۇلگەرىمى جاقسى بولدى», دەيدى سىنىپ جەتەكشىسى. ال جانىبەكتىڭ اناسى گۋليا بورانباەۆا بالاسىنىڭ كۇندىز-ءتۇنى دايىندالعانىن, ارنايى ونلاين كۋرس ساتىپ العانىن ايتادى. «بولام دەگەن بالانىڭ بەتىن قاقپا, «بەلىن بۋ» دەگەن. ءبىز دە بارىنشا كومەكتەستىك. ساباقپەن اۋرە بالا عوي. تىنىمسىز دايىندالدى. ءۇي تىرلىگىنە مويىن بۇرعان جوق. ءوز ەڭبەگىنىڭ, تاباندىلىعىنىڭ, مۇعالىمدەرىنىڭ قولداۋىمەن وسى جەتىستىككە جەتتى», دەيدى جانىبەكتىڭ اناسى.
شوقان ءۋاليحانوۆ اتىنداعى مەكتەپ-گيمنازيا ديرەكتورى ساۋلە ەگەمبەردىقىزى جانىبەكتىڭ جەتىستىگى وزگە وقۋشىلارعا ۇلگى بولىپ, ىنتالاندىرا تۇسكەنىن ايتادى. بيىل مەكتەپ بىتىرەتىن 101 وقۋشىنىڭ بارلىعى ۇبت تاپسىرۋعا نيەت بىلدىرگەن. ەل كولەمىندە العاش بولىپ ەڭ جوعارى ۇپاي جيناعان جانىبەك ابىلحانعا بۇگىندە سىي-قۇرمەت كورسەتىلىپ جاتىر. مىسالى, وبلىس اكىمىنىڭ ورىنباسارى بەيسەنباي تاجىباەۆ ارنايى قابىلداپ, ءبىلىم جولىندا تالماي تالاپتانىپ, تابىستان-تابىسقا جەتە بەرۋىنە تىلەكتەستىگىن بىلدىرە وتىرا, ۇزدىك شاكىرتكە جانە ۇستازى مەن اناسىنا ارنايى العىسحات پەن سىي-سياپات تاپسىردى. اۋدان اكىمى ازات ورالباەۆ تا ۇزدىك وقۋشىنى ماراپاتتادى. ال جانىبەك كەيىنگى ءبىر جىل بويى دايىندالعان قوسىمشا ءبىلىم بەرۋ ورتالىعىنىڭ باسشىلىعى پاتەردىڭ سەرتيفيكاتىن تابىس ەتكەن.
ايتا كەتەلىك, بيىل تۇركىستان وبلىسىندا 34 مىڭعا جۋىق وقۋشى 11-سىنىپتى بىتىرەدى. ولاردىڭ 27 مىڭنان استامى ۇبت تاپسىرۋعا نيەت بىلدىرگەن. مەكتەپ بىتىرۋشىلەردىڭ ىشىندە 2 313 وقۋشى «التىن بەلگىگە», ال 2 400-ءى «ۇزدىك اتتەستاتقا» ۇمىتكەر.
تۇركىستان وبلىسى
