ءىس-شارانىڭ ماقساتى — حالىقتىڭ رەپرودۋكتيۆتىك دەنساۋلىق, جىنىستىق جولمەن بەرىلەتىن ينفەكتسيالىق اۋرۋلاردىڭ, ادام پاپيللوما ۆيرۋسىنىڭ پروفيلاكتيكاسى ماسەلەلەرى جونىندەگى حاباردارلىعىن ارتتىرۋ بولدى.
بەس كۇن بويى ەلىمىزدىڭ بارلىق وڭىرلەرىندەگى مەديتسينالىق-سانيتاريالىق العاشقى كومەك ۇيىمدارى مەن جاستار دەنساۋلىعى ورتالىقتارىندا اشىق ەسىك كۇندەرى ءوتتى. رەپرودۋكتيۆتىك جاستاعى ەرلەر مەن ايەلدەر, جاسوسپىرىمدەر مەن جاستار كونسۋلتاتسيالىق جانە اقپاراتتىق قولداۋ الدى.
بەس كۇن بويى وتباسىن جوسپارلاۋ, ايەلدەردىڭ دەنساۋلىعى, ەرلەردىڭ دەنساۋلىعى, جاستار جانە ججبي, اپۆ پروفيلاكتيكاسى سياقتى جەكە تاقىرىپتارعا ارنالدى.
اپتانىڭ نەگىزگى قورىتىندىلارىن شىعارا وتىرىپ, دەنساۋلىق ساقتاۋ مينيسترلىگىنىڭ جەلىسى بويىنشا رەسپۋبليكا كولەمىندە 14 350 ءىس-شارا وتكىزىلگەنىن اتاپ وتكەن ءجون. جالپى جوبا 358 498 قازاقستاندىقتى قامتىدى, ولاردىڭ ىشىندە 83 389 ەر ادام, 157 476 ايەل جانە 117 633 ءجاسوسپىرىم بار.
گينەكولوگتار, ۋرولوگتار, ينفەكتسيونيستەر جانە باسقا دا مامانداردىڭ قاتىسۋىمەن 3 636 اعارتۋشىلىق كەزدەسۋ مەن ءدارىس ءوتتى.
باق-تا 238 ساراپتامالىق پىكىر, سۇحبات پەن بايانداما جاريالاندى.
حالىقتىڭ ەڭ بەلسەندى قاتىسۋى مەن قىزىعۋشىلىعى الماتى, استانا قالالارىندا, سونداي-اق اقتوبە, تۇركىستان جانە قاراعاندى وبلىستارىندا بايقالدى.
كامپانيا بارىسىندا جاسوسپىرىمدەرگە ەرەكشە نازار اۋدارىلدى: 117 مىڭنان استام بالا دەنساۋلىق پەن اۋرۋلاردىڭ پروفيلاكتيكاسى تۋرالى سەنىمدى اقپاراتقا قول جەتكىزدى. دارىگەرلەر مەن ماماندار مەكتەپتەر مەن كوللەدجدەردە عانا ەمەس, تسيفرلىق ورتادا - الەۋمەتتىك جەلىلەر مەن تەلەارنالار ارقىلى دا جۇمىس جۇرگىزدى.
«رەپرودۋكتيۆتىك دەنساۋلىق مادەنيەتىن جانە پروفيلاكتيكالىق مەديتسينانى دامىتۋ — بولاشاق ۇرپاقتىڭ دەنساۋلىعىنا قوسقان ەڭ ماڭىزدى ۇلەس. بارلىق وڭىرلەرگە, مەديتسينا قىزمەتكەرلەرىنە, ارىپتەستەر مەن باق-قا بەلسەندى قاتىسقانى ءۇشىن العىس بىلدىرەمىز. رەپرودۋكتيۆتىك دەنساۋلىق اپتالىعى — مەملەكەت, دەنساۋلىق ساقتاۋ جۇيەسى مەن قوعامنىڭ كۇشىن بىرىكتىرەتىن جىل سايىنعى باستاماعا اينالادى», — دەدى قر دەنساۋلىق ساقتاۋ ءمينيسترى.
