بايىپتى باسىلىمنىڭ تاريحى 1920 جىلدان باستالادى. وسى ۋاقىت ارالىعىندا جۋرنال «يزۆەستيا بيۋرو كيركرايا», «كراسنىي كازاحستان», «بولشەۆيك كازاحستانا», «كوممۋنيست كازاحستانا», «پارتينايا جيزن كازاحستانا» اتتى ءتۇرلى اتاۋمەن جارىق كوردى. 105 جىلدان بەرى 1 مىڭنان اسا ءنومىر شىعارىلدى, بىرنەشە مىڭ ماتەريال جاريالاندى. اۆتورلارىنىڭ دەنى بەلگىلى ساياساتكەرلەر, قوعام قايراتكەرلەرى, جازۋشىلار, عالىمدار بولدى. 105 جىلدىق تاريحىندا «مىسل» جۋرنالىنا ف.ساۆينسكي, م.جۇلانوۆ, ب.بۋچكين, ا.حافيزوۆ, ۆ.مولوتوۆ, ف.بويارسكي, ا.لوگينوۆ, ف.ميحايلوۆ, ا.ارتەمەۆ, گ.شەستاكوۆ, ءا.قالمىرزاەۆ, س.قۇتتىقادام باسشىلىق ەتتى.
«قازاق گازەتتەرى» سەرىكتەستىگىنىڭ باس ديرەكتورى ديحان قامزابەك ۇلى قۇتتىقتاۋ سوزىندە عاسىرلىق بەل-بەلەستەردە جۋرنالدى باسقارعان تۇلعالار ەڭبەگىنە توقتالا كەلە, باسىلىمدا تاريحتىڭ ءۇنى تاڭبالانىپ قالعانىن, قازىر پاراساتتى ويدىڭ مىنبەرىنە اينالعانىن ايتتى. جۋرنالدىڭ شىعارماشىلىق ۇجىمىنا ارناعان قۇتتىقتاۋ سوزىندە: «عاسىردان استام تاريحى بار «مىسل» زياتكەرلىك مىنبەردىڭ پلاتفورماسىنا اينالدى. اقپاراتتىق كەڭىستىكتە ساپالى كونتەنتىمەن ەرەكشەلەندى», دەپ باعا بەردى د.قامزابەك ۇلى.
تاۋەلسىزدىك العاننان كەيىن 1992 جىلدان باستاپ باسىلىم «مىسل» دەپ اتالا باستادى. بۇل رەتتە اتاۋى عانا ەمەس, مازمۇنى دا وزگەردى. جاڭا تاۋەلسىز مەملەكەتتىڭ قالىپتاسۋى ماسەلەلەرىنە كوبىرەك نازار اۋدارىلدى. بەلگىلى قايراتكەر, 2006–2016 جىلدار ارالىعىندا جۋرنالدىڭ باس رەداكتورى بولعان سەيداحمەت قۇتتىقادام ماقالالارىنىڭ بىرىندە جازعانداي, تاۋەلسىزدىكتىڭ جاڭا داۋىرىندە جۋرنال ءوزىنىڭ كەلبەتىن تۇبەگەيلى وزگەرتتى.
كەڭەس داۋىرىندە تالاپ ەتىلگەندەي, ۇجىمدىق ۇگىتشى جانە ۇيىمداستىرۋشى بولۋدى توقتاتىپ, شىن مانىندە قازىرگى «مىسل» اتتى جاڭا باسىلىمعا اينالدى. ارينە, ونىڭ مازمۇنى مەن ماتەريالدارىن بەرۋ تۇبەگەيلى وزگەردى. رەداكتسيا باستى نازارىن ەگەمەندىكتى, كەلىسىم مەن تۇراقتىلىقتى نىعايتۋ, دەموكراتيالىق ۇدەرىستەردى دامىتۋ, ادام قۇقىقتارىن ساقتاۋ ماسەلەلەرىنە اۋداردى. قازىر ىشكى جانە سىرتقى ساياسات, ەلىمىزدىڭ دامۋ ستراتەگياسىن ناسيحاتتاۋ, شاعىن جانە ورتا بيزنەستى جان-جاقتى قولداۋ, جاستاردى ينتەرناتسيونالدىق, پاتريوتتىق جانە مادەني-ادامگەرشىلىك تاربيەلەۋ, سىبايلاس جەمقورلىققا جانە كۇندەلىكتى ءومىردىڭ باسقا دا جاعىمسىز قۇبىلىستارىنا قارسى كۇرەس – باسىم تاقىرىپتار.
جۋرنالدىڭ باس رەداكتورى اسىل ساعىمبەكوۆتىڭ ايتۋىنشا, بۇل باسىلىم – ەلىمىزدىڭ رۋحاني, ينتەللەكتۋالدىق تاريحىنىڭ ايناسى. عاسىردان استام ۋاقىت بويى جۋرنال بەتىندە كوتەرىلگەن ماسەلەلەر, جاريالانعان ماقالالار قوعامدىق پىكىرگە سەرپىن بەرىپ, ساراپشىلاردىڭ قىزۋ پىكىرتالاسىنا تۇرتكى بولدى. «مىسل» جۋرنالى – داۋىرلەر ءۇنىن جەتكىزگەن, ەلدىڭ دامۋ جولىنداعى باعىت-باعدار بەرگەن ەرەكشە پلاتفورما. بۇل ءىس-شارا – وسى مۇراعا تاعزىم ەتۋ عانا ەمەس, سونىمەن قاتار بولاشاققا جاڭا كوزقاراسپەن قاراۋعا شاقىراتىن ماڭىزدى كەزەڭ», دەدى ا.ساعىمبەكوۆ.
باسىلىمنىڭ رەداكتسيالىق كەڭەسىندە ولجاس سۇلەيمەنوۆ, روللان سەيسەنباەۆ, اناتولي كيم (ماسكەۋ ق.), كلارا حافيزوۆا, بولات سۇلتانوۆ, لايلا احمەتوۆا, ساعىمباي قوزىباەۆ, گۇلنار مۇقانوۆا, قابدۋلساميح ايتحوجين, ۆالەري جانداۋلەتوۆ سىندى قايراتكەر تۇلعالار, جازۋشىلار مەن عالىمدار بار.
كۇنى كەشە 89 جاسقا تولعان قازاقتىڭ كورنەكتى اقىنى ولجاس سۇلەيمەنوۆتىڭ «مىسلعا» ارناعان مەرەيتويلىق لەبىزىن ونىڭ ۇزەڭگىلەس سەرىكتەرىنىڭ ءبىرى ۆالەري جانداۋلەتوۆ وقىپ بەردى. «مەن مىسل جۋرنالىن 105 جىلدىق مەرەيتويىمەن قۇتتىقتايمىن. حح عاسىر قازاق ۇلتىن كىتاپ وقيتىن ۇلتقا اينالدىرعان ەدى. ءبىر كەزدەرى ادەبيەتشى ماماندىق ەدى. وسى عاسىردا ادەبيەت ءوز ورنىن جوعالتىپ الدى, ءبىز كىتاپ وقيتىن ۇلت دەگەن مارتەبەمىزدەن ايىرىلىپ قالدىق. باتىل شەشىمدەر ارقىلى قازاق ۇلتىنىڭ كىتاپ وقيتىن ۇلتقا اينالۋىنا ىقپال ەتە الامىز», دەيدى و.سۇلەيمەنوۆ.
