ونىڭ ايتۋىنشا, قازىرگە دەيىن 105 مەكتەپتىڭ قۇرىلىسى اياقتالعان, بيىل تاعى 112 ءبىلىم وشاعى پايدالانۋعا بەرىلەدى. سونداي-اق مينيستر ەندى بۇل ستراتەگيالىق جوبا «كەلەشەك مەكتەپتەرى» دەپ اتالاتىنىن جەتكىزدى.
مەملەكەت باسشىسى ۇسىنعان «جايلى مەكتەپ» مودەلى – قازىرگى زامانعى وقىتۋ ستاندارتتارىنا ساي بىرىڭعاي كەڭىستىك قۇرۋ ارقىلى ەلىمىزدەگى ورتا ءبىلىمنىڭ دەڭگەيىن جۇيەلى ارتتىرۋدى كوزدەگەن ستراتەگيالىق باستاما. سونىمەن قاتار جوبا قالالىق جانە اۋىلدىق مەكتەپتەر اراسىنداعى الشاقتىقتى جويۋعا باعىتتالعان.
«جوبانى ىسكە اسىرۋ ەليتالىق وقۋ ورىندارىن قۇرۋعا ەمەس, ءبىلىم ساپاسىنىڭ جوعارى ستاندارتتارىن جاپپاي ەنگىزۋگە باعىتتالعانىن اتاپ ءوتۋ ماڭىزدى. بۇل ءار بالانىڭ تولىققاندى دامۋىنا مۇمكىندىك بەرەدى», دەيدى مينيستر.
عاني بەيسەمباەۆتىڭ ايتۋىنشا, «جايلى مەكتەپتەردىڭ» باستى ارتىقشىلىعى – وقۋشى قاجەتتىلىكتەرىنە تولىق باعدارلانعان ىڭعايلى جانە ەرگونوميكالىق ورتا قۇرۋ. مۇنداي ءبىلىم وشاقتارىندا زاماناۋي بەينەباقىلاۋ جانە مەكتەپكە كىرىپ-شىعۋدى قاداعالاۋ جۇيەلەرىن ورناتۋ ارقىلى بالالار قاۋىپسىزدىگىنە ەرەكشە نازار اۋدارىلادى. سونىمەن قاتار باستاۋىش جانە جوعارى سىنىپ وقۋشىلارىنا ارنالعان بلوكتاردىڭ بولەك بولۋى قاۋىپسىز ءارى جايلى ورتانى قامتاماسىز ەتەدى.
«كەدەرگىسىز ورتا قۇرۋ ماقساتىندا پاندۋستار, جەدەلساتىلار, ەرەكشە قاجەتتىلىكتەرى بار بالالار ەركىن قوزعالا الاتىنداي ارنايى سانيتارلىق بولمەلەر قاراستىرىلعان. رەسۋرستىق كابينەتتەر جانە مامانداندىرىلعان سىنىپتار بار. ماسەلەن, اۋتيزم بەلگىسى بار بالالار ءۇشىن 121 مەكتەپتە جەكە كابينەتتەر اشىلدى», دەيدى سالا باسشىسى.
مينيستر ەندى بۇل ستراتەگيالىق جوبانىڭ «كەلەشەك مەكتەپتەرى» دەپ اتالاتىنىن ايتتى. سونداي-اق جوبا اياسىندا مەكتەپ قۇرىلىسى جەكە سەكتورلاردا تۇرعىزىلعان نىساندارعا قاراعاندا 1,5-2 ەسە ارزانعا تۇسەتىنىنە توقتالدى. بۇعان قوسا بۇل باستاما وڭىرلىك ەكونوميكانى بىرنەشە باعىتتا ىنتالاندىراتىنىن دا اتاپ ءوتتى.
«بىرىنشىدەن, مەكتەپ قۇرىلىستارىنا جەرگىلىكتى قۇرىلىس كومپانيالارى مەن جۇمىسشى بريگادالار تارتىلادى. بۇل جاڭا جۇمىس ورىندارىنىڭ قۇرىلۋىنا تىكەلەي اسەر ەتەدى. ەكىنشىدەن, ءار جاڭا مەكتەپ – پەداگوگتەر مەن تەحنيكالىق قىزمەتكەرلەر ءۇشىن جاڭا جۇمىس ورنى. جالپى العاندا, ەلىمىز بويىنشا بارلىق جاڭا مەكتەپتى كادرمەن قامتاماسىز ەتۋ ءۇشىن 2026 جىلعا دەيىن 30 مىڭنان استام مۇعالىم قاجەت بولادى», دەيدى عاني بەيسەمباەۆ.
ءمينيستردىڭ ايتۋىنشا, تاعى ءبىر ماڭىزدى باعىت – ەرتە كاسىبي باعدار بەرۋ. باستاۋىش مەكتەپتە بالالار ءتۇرلى ماماندىقپەن تانىسادى. 7 سىنىپتان باستاپ تەرەڭ كاسىبي باعدار بەرۋ باستالادى.
جوبا اياسىندا ەلىمىزدە جۇزدەن استام جاڭا مەكتەپ سالىندى. بۇل مىڭداعان وقۋشىنىڭ ءبىلىم الۋ جاعدايىن ەداۋىر جاقسارتتى. مىسالى, ەلوردادا «جايلى مەكتەپ» ستاندارتى بويىنشا توعىز جاڭا مەكتەپ اشىلىپ, ول ءۇش اۋىسىمدى وقىتۋ ماسەلەسىن ءىشىنارا شەشۋگە مۇمكىندىك بەردى.
اقمولا وبلىسىندا تاۋەلسىزدىك العاننان بەرى العاش رەت جاڭا زاماناۋي مەكتەپ بوي كوتەردى. ال الماتى وبلىسىنىڭ قوشمامبەت اۋىلىندا 1 200 ورىندىق زاماناۋي, وزىق جابدىقتالعان مەكتەپ پايدالانۋعا بەرىلدى.
«كەلەشەك مەكتەپتەرى» دەگەن اتاۋ بۇل ۇيىمداردىڭ ميسسياسىن ايقىن كورسەتەدى. بۇل – بار بالاعا تەڭ مۇمكىندىك ۇسىناتىن ءبىلىم وشاقتارى», دەپ تۇيىندەدى مينيستر.
