فوتو: bank.uz
«بۇگىنگى تاڭدا ەلىمىزدە كريپتوۆاليۋتالارعا قاتىستى قىلمىستىق ىستەر بويىنشا تاركىلەنگەن اكتيۆتەردى ساقتاۋ تەتىگى مۇلدە جوق. بۇل وتە قاۋىپتى جاعداي. ارنايى تسيفرلىق رەزەرۆ بولماسا, بۇل اكتيۆتەر جوعالىپ كەتۋى, ۇرلانۋى نەمەسە ءۇشىنشى تۇلعالار ارقىلى زاڭداستىرىلۋى مۇمكىن», دەدى ولجاس قۇسپەكوۆ.
سونداي-اق, دەپۋتات كريپتوبلوگەرلەر مەن كوۋچتار تاراپىنان جاستاردى كۇماندى پلاتفورمالارعا تارتۋ دەرەكتەرىن دە سىنعا الدى.
«ليتسەنزياسىز «كريپتوكوۋچتار» حالىققا جالعان ۋادە بەرىپ, وڭاي پايدا تابۋعا شاقىرادى. ولار ازاماتتاردىڭ قارجىلىق قاۋىپسىزدىگىمەن ويناپ وتىر. بۇل ارەكەتتەردى دەرەۋ توقتاتۋىمىز كەرەك. سوندىقتان «ينۆەستيتسيالىق كوۋچينگ» ۇعىمىن زاڭداستىرىپ, وعان مىندەتتى ليتسەنزيا تالاپتارىن ەنگىزۋدى ۇسىنىپ وتىرمىز», دەپ مالىمدەدى دەپۋتات.
قارجى مونيتورينگى اگەنتتىگىنىڭ مالىمەتتەرىنە سايكەس, 10 ەكىنشى دەڭگەيلى بانك ارقىلى 4,2 ملرد تەڭگەدەن استام كۇماندى وپەراتسيالار وتكەن. بۇل ىشكى باقىلاۋ تەتىكتەرىنىڭ السىزدىگىن كورسەتەدى.
دەپۋتاتتىڭ پىكىرىنشە, تاعى ءبىر ماڭىزدى ماسەلە – قازاقستاندا تىيىم سالىنعان ليتسەنزياسىز كريپتوبيرجالاردىڭ AppStore مەن PlayMarket سياقتى پلاتفورمالاردا ءالى دە ەركىن جۇمىس ىستەۋى.
«زاڭنامادا ناقتى تىيىم سالىنعانىنا قاراماستان, ليتسەنزياسىز كريپتوبيرجالار ءىس جۇزىندە جۇمىسىن جالعاستىرىپ كەلەدى. ولار AppStore جانە PlayMarket پلاتفورمالارىندا قولجەتىمدى, كەڭىنەن جارنامالانىپ, بۇقارالىق ءىس-شارالارعا جانە الەۋمەتتىك جەلىلەرگە قاتىسۋدا. Chainalysis كومپانياسىنىڭ دەرەكتەرى بويىنشا, 2023 جىلى قازاقستانداعى كريپتواينالىمنىڭ 86,2%-ى نەمەسە 4,1 ملرد اقش دوللارىنان 3,5 ملرد دوللارى زاڭسىز سەگمەنت ارقىلى وتكەن», دەدى ولجاس قۇسپەكوۆ.
دەپۋتاتتىق ساۋالىن قورىتىندىلاي كەلە ولجاس قۇسپەكوۆ كەلەسى شارالاردى قابىلداۋ قاجەت دەپ اتاپ ءوتتى.
«ۇلتتىق بانك جانىنان قىلمىستىق ىستەر اياسىندا تاركىلەنگەن كريپتواكتيۆتەردى ساقتاۋ ءۇشىن مەملەكەتتىك تسيفرلىق رەزەرۆ قۇرۋ مۇمكىندىگىن قاراستىرۋ. زاڭناماعا «ينۆەستيتسيالىق كوۋچينگ» ۇعىمىن ەنگىزىپ, بۇل قىزمەت تۇرىنە مىندەتتى ليتسەنزيالاۋ تالابىن بەكىتۋ, سونداي-اق بۇزۋشىلاردىڭ اككاۋنتتارىن بۇعاتتاۋ تەتىگىن ازىرلەۋ. اقشا اۋدارىمدارىنا اۋديت جۇرگىزىپ, بانكتەر تاراپىنان تالاپتاردىڭ ساقتالۋىنا ىشكى باقىلاۋدى كۇشەيتۋ. ليتسەنزياسى جوق كريپتوبيرجالارعا تيەسىلى سايتتار مەن قوسىمشالاردى بۇعاتتاۋ باستاماسىن كوتەرۋ, سونداي-اق رۇقسات ەتىلگەن پلاتفورمالاردىڭ رەسمي ءتىزىمىن جاريالاۋ» دەدى دەپۋتات.
