بيىلعى پاراسپارتاكيادا 17 سپورت ءتۇرى بويىنشا ۇيىمداستىرىلادى. سونىڭ ىشىندە 7 سپورت تۇرىنەن جارىستار تىكەلەي استانادا وتەدى. ولارعا وتىرىپ وينايتىن ۆولەيبول, پارا تاەكۆوندو, پارا دزيۋدو, بوچچا, پارا بي, پارا ساداق اتۋ جانە پارا كاراتە كىرەدى.
جارىسقا ەلىمىزدىڭ 19 ءوڭىرى مەن قالالارىنان 2000-عا جۋىق سپورتشى قاتىسادى. ايتا كەتەرلىگى, بيىل العاش رەت ينتەللەكتۋالدىق دامۋ ەرەكشەلىگى بار سپورتشىلار دا سپارتاكياداعا قاتىسۋ مۇمكىندىگىنە يە بولىپ وتىر. ولار ءجۇزۋ, جەڭىل اتلەتيكا جانە ۇستەل تەننيسى بويىنشا ءوز شەبەرلىكتەرىن كورسەتەدى. استانا قالاسى جارىستىڭ نەگىزگى ۇيىمداستىرۋشىسى رەتىندە قاتىسۋشىلاردى ءوز سپورت نىساندارىندا قابىلدايدى. قالعان سپورت تۇرلەرى اقمولا, الماتى, جامبىل جانە شىعىس قازاقستان وبلىستارىندا 30 ماۋسىمعا دەيىن وتەدى.
ەلوردا اتىنان پاراسپارتاكياداعا 189 سپورتشى قاتىسادى. ولاردىڭ اراسىندا ەلگە تانىمال پاراسپورتشىلار دا بار. اتاپ ايتقاندا, پارا دزيۋدو بويىنشا — اقمارال ناۋاتبەك, ەرعالي شامەي جانە اسىلان نۇرداۋلەتوۆ, پارا جۇزۋدەن — سيازبەك داليەۆ پەن ءالي تۋرعانبەك, پارا نىسانا كوزدەۋدەن — سەۆدا اليەۆا, ال جەڭىل اتلەتيكادان — ايسۇلۋ سۇلەيمەنوۆا ەل نامىسىن قورعايدى.
سپارتاكيادانىڭ سالتاناتتى اشىلۋ ءراسىمى 4 ماۋسىم كۇنى جاقسىلىق ۇشكەمپىروۆ اتىنداعى جەكپە-جەك سارايىندا وتەدى. ال جابىلۋ سالتاناتى 30 ماۋسىمدا وسكەمەن قالاسىندا ۇيىمداستىرىلادى.
ارايلىم مىرزاحان, ەۇۋ 2 كۋرس ستۋدەنتى
