بەلگىلى بولعانداي, «تالدىقورعان – ءۇشارال» گاز قۇبىرىنىڭ جەلىلىك بولىگىن سالۋ جۇمىستارى اياقتالعان. قازىر اۆتوماتتى گاز تاراتۋ ستانسالارى تۇرعىزىلىپ جاتىر.
الدىمەن «جانسۇگىروۆ» اگتس-نىڭ الاڭىنا بارعان رەسمي قوناقتار مۇنداعى اتقارىلىپ جاتقان جۇمىستارمەن تانىستى. بۇل رەتتە سانجار جاركەشوۆ ءبىرىنشى كەزەكتە جۇمىستىڭ ساپاسىنا باسا كوڭىل ءبولۋدى قاتاڭ تاپسىردى.
«بۇگىنگى كۇنى «تالدىقورعان – ءۇشارال» ماگيسترالدى گاز قۇبىرىن سالۋعا ۇلكەن نازار اۋدارىلىپ وتىر. بۇل – مەملەكەت باسشىسىنىڭ تاپسىرماسىمەن, ۇلتتىق قوردىڭ قارجىلاي قولداۋىمەن قولعا الىنعان اۋقىمدى جوبا. وتكەن جىلى ۇكىمەت باسشىسى جەتىسۋ وبلىسىنا كەلگەندە قۇرىلىس جۇمىستارى باستالعان بولاتىن. جوبانىڭ الەۋمەتتىك ماڭىزىن ەسكەرە وتىرىپ, جۇمىستاردى قارقىندى جۇرگىزدىك. سونىڭ ناتيجەسىندە بەلگىلەنگەن مەرزىمىنەن ءبىر جارىم جىل بۇرىن, ياعني 2025 جىلدىڭ جىلىتۋ ماۋسىمىنا دەيىن بىتىرەمىز دەپ جوسپارلاپ وتىرمىز. بۇل «QazaqGaz», وبلىس اكىمدىگى جانە مەردىگەر كومپانيا – ءۇش تاراپتىڭ بىرلەسكەن ۇلگىلى كوماندالىق جۇمىسىنىڭ ناتيجەسى», دەدى «QazaqGaz» ۇك» اق باسقارما توراعاسى سانجار جاركەشوۆ.
ايتا كەتەيىك, جوباعا ەنەرگەتيكا مينيسترلىگى, «سامۇرىق-قازىنا» قورى مەن جەتىسۋ وبلىسىنىڭ اكىمدىگى قولداۋ ءبىلدىردى.
جوبانىڭ تەحنولوگيالىق سحەماسىنا سايكەس گاز قۇبىرىنىڭ جالپى ۇزىندىعى 302,441 كم قۇرايدى, جوبالىق قىسىمى رر=9,8 مپا. جوبادا سونداي-اق 6 گاز قۇبىرى بۇرماسىن, «جانسۇگىروۆ», «قاپال», «سارقان», «قويلىق», «قابانباي», ء«ۇشارال» – 6 اۆتوماتتى گاز تاراتۋ ستانساسىن سالۋ كوزدەلگەن.
بۇگىنگى تاڭدا جاڭا گاز قۇبىرىنىڭ جەلىلىك بولىگىنىڭ قۇرىلىسى اياقتالدى.
قازىردە بارلىق التى اۆتوماتتى گاز تاراتۋ ستانسالارىنىڭ قۇرىلىسى قاتار باستالدى. قۇرىلىسقا 148 ارنايى تەحنيكا مەن 356 جۇمىسشى جۇمىلدىرىلدى. قۇرىلىس جۇمىستارى ەرەكشە باقىلاۋدا, كەستەدەن وزىپ كەلەدى.
وسى ورايدا وبلىس اكىمىنىڭ ورىنباسارى اسەت قاناعاتوۆ ەلدى مەكەندەردىڭ ىشكى جەلىلەرىن جۇرگىزۋدىڭ دايىندىق جۇمىستارى تۋرالى ايتا كەلە:
«تالدىقورعان – ءۇشارال» ماگيسترالدى گاز قۇبىرى جوباسىنىڭ ارقاسىندا اقسۋ, سارقان, الاكول اۋداندارىندا 66 ەلدى مەكەنگە گاز تارتىلاتىن بولادى. التى ەلدى مەكەندى بيىل, قالعان 60-ىن كەلەسى جىلى گازعا قوسامىز. سونىڭ ىشىندە اقسۋ قانت زاۋىتى دا بار. وسى شارالاردىڭ بارلىعى حالىقتىڭ تۇرمىس ساپاسىن جاقسارتۋعا, سول سياقتى كاسىپكەرلىك پەن ءوندىرىس ورىندارىنىڭ جۇمىسىن جانداندىرۋعا بارىنشا ءتيىمدى, ءوڭىردىڭ ەكونوميكاسىن دامىتۋعا ۇلكەن سەرپىن بەرەدى», دەدى.
ەسكە سالا كەتەلىك, جەتىسۋ وبلىسىندا 192 ەلدى مەكەن گازداندىرۋعا جاتادى. وبلىس بولىنگەندە نەبارى بەس ەلدى مەكەندە عانا گاز بولعان, بۇگىنگى كۇنى گازداندىرىلعان ەلدى مەكەندەر سانى 84-كە جەتىپ, گازداندىرۋ دەڭگەيى 58,2%-دى قۇرادى. جىل سوڭىنا دەيىن كوگىلدىر وتىن تارتىلعان ەلدى مەكەندەر سانىن 126-عا, گازداندىرۋ كورسەتكىشىن 71,4%-عا جەتكىزۋ جوسپارلانىپ وتىر, ياعني 500 مىڭ ادام گازدىڭ يگىلىگىن كورەدى دەگەن ءسوز. وعان قوسا «تالدىقورعان – ءۇشارال» ماگيسترالدى گاز قۇبىرى قۇرىلىسىنىڭ ارقاسىندا 66 ەلدى مەكەن گازعا قوسىلادى. ءسويتىپ, 2028 جىلعا دەيىن وبلىستىڭ گازداندىرۋعا جاتاتىن 192 ەلدى مەكەنى تولىق كوگىلدىر وتىنعا قول جەتكىزەتىن بولادى.
