ورالدا ءتىل وقىتۋ ورتالىعى اشىلدى

جاڭا ورتالىق ءارتۇرلى جاستاعى ازاماتتارعا مەملەكەتتىك ءتىلدى جانە باسقا دا شەت تىلدەرىن مەڭگەرتۋ, تىلدىك داعدىلاردى جەتىلدىرۋگە جاعداي جاساپ, ءتىل مادەنيەتىن دامىتادى جانە ءتىل ساياساتىن جۇزەگە اسىرادى.

«ورتالىقتىڭ نەگىزگى ماقساتى - مەملەكەتتىك ءتىلدى وقىتۋ جانە ناسيحاتتاۋ, سونداي-اق اعىلشىن, ورىس جانە باسقا دا تىلدەردى جۇرتشىلىقتىڭ مەڭگەرۋىنە جاعداي جاساۋ. «جاڭا مەكەمە زاماناۋي ادىستەمەلەر مەن وقىتۋ تەحنولوگيالارىن ەنگىزىپ, ءتىل ۇيرەنۋشىلەرگە ارنالعان سەمينارلار, ترەنينگتەر مەن اشىق ساباقتار ۇيىمداستىرادى», دەيدى ورال ورال قالاسى مادەنيەت جانە تىلدەردى دامىتۋ ءبولىمىنىڭ ءتىل سەكتورىنىڭ مەڭگەرۋشىسى روزا وڭعاربايقىزى.

جاڭا ورتالىققا «دوستىق» ۇيىنەن وقۋ زالىمەن قوسا ءۇش بولمە بەرىلگەن. بولمەنىڭ ءبىرى مەملەكەتتىك ءتىلدى وقۋشىلارعا, ال ءبىرى اعىلشىن ءتىلىن وقۋشىلارعا ارنالىپ جابدىقتالعان. جالپى ورتالىق ۇجىمىندا 11 ادام قىزمەت ەتەدى.

«اتامەكەن» ونەر ورداسىندا وتكەن ء«تىل زاڭناماسى: مۇمكىندىكتەر, باستامالار جانە ماسەلەلەر» اتتى رەسپۋبليكالىق سەمينار-كەڭەستە دە مەملەكەتتىك ءتىلدىڭ مارتەبەسىن ودان ءارى نىعايتۋ ماسەلەلەرى ءسوز بولدى. جيىنعا قاتىسقان باس پروكۋراتۋرا, عىلىم جانە جوعارى ءبىلىم مينيسترلىگىنىڭ وكىلدەرى, پارلامەنت ءماجىلىسىنىڭ دەپۋتاتى ابزال قۇسپان, وبلىس باسشىلىعى, سونداي-اق وڭىرلەر مەن رەسپۋبليكالىق ماڭىزى بار قالالارداعى تىلدەردى دامىتۋ باسقارمالارىنىڭ ماماندارى, زيالى قاۋىم وكىلدەرى, كاسىپكەرلەر مەملەكەتتىك ءتىل ساياساتىنىڭ وزەكتى ماسەلەلەرىن تالقىلاپ, تاجىريبە الماستى.

ايتا كەتەيىك, بۇگىندە باتىس قازاقستان وبلىسىندا بالاباقشالاردىڭ 85%-ى, ورتا مەكتەپتەردىڭ 70%-ى مەملەكەتتىك تىلدە ءبىلىم بەرەدى. 2024-2025 وقۋ جىلىندا ءبىرىنشى سىنىپ وقۋشىلارىنىڭ 78%-ى قازاق ءتىلىن تاڭداعان. 2024 جىلى وڭىردە 700 ادام مەملەكەتتىك ءتىل كۋرسىنان وتكەن, سونىڭ 40 پايىزى – وزگە ۇلت وكىلدەرى ەكەن.