ءىس-شارا بارىسىندا مەكتەپ وقۋشىلارى كەننەن مىس ءوندىرۋ بارىسىمەن تانىستى. ولار رۋدانىڭ العاشقى وڭدەلۋ ساتىنەن باستاپ, دايىن ونىمگە دەيىنگى بارلىق وندىرىستىك كەزەڭدەردى ءوز كوزدەرىمەن كورىپ, زاماناۋي تەحنولوگيالار مەن قوندىرعىلاردىڭ جۇمىسىمەن تانىسۋ مۇمكىندىگىنە يە بولدى.
ەكسكۋرسيا بارىسىندا قاۋىپسىزدىك تەحنيكاسى باستى نازاردا بولدى. ءاربىر وقۋشىعا وندىرىستىك ورتادا ءوزىن-ءوزى ۇستاۋ ەرەجەلەرى ءتۇسىندىرىلىپ, ارنايى نۇسقاما بەرىلدى. بۇل – بالالاردىڭ ەڭبەك مادەنيەتىن تەرەڭ ءتۇسىنىپ, كاسىبي تارتىپكە بەيىمدەلۋىنە ۇلكەن سەپتىگىن تيگىزەدى.
مەكتەپ تۇلەكتەرى نەگىزگى وندىرىستىك الاڭداردى ارالاپ, جۇمىسشىلاردىڭ تىنىعۋ ورىندارى مەن الەۋمەتتىك جاعدايلارىمەن دە تانىستى. مۇنداي جان-جاقتى اقپارات جاستاردىڭ كاسىپتىك باعدارىن ناقتىلاۋىنا, ءوندىرىس سالاسىنا قىزىعۋشىلىقتارىن ارتتىرۋىنا ىقپال ەتتى.
ەكسكۋرسيا سوڭىندا وقۋشىلار مەن ۇستازدار جاعىمدى اسەرلەرىمەن ءبولىسىپ, كومپانياعا ريزاشىلىقتارىن ءبىلدىرىپ, تابىستى دامۋ مەن وركەندەۋ تىلەدى.
«ەكسكۋرسيا بارىسىندا وقۋشىلار كەن ءوندىرۋدىڭ بارلىق كەزەڭدەرىمەن تانىسىپ, وندىرىستىك قاۋىپسىزدىك ەرەجەلەرى بويىنشا كىرىسپە ساباقتارعا قاتىستى. بۇل تاجىريبە ولاردىڭ بولاشاق ماماندىق تاڭداۋىنا ۇلكەن اسەر ەتتى. وقۋشىلار ينجەنەر, تەحنيك, وپەراتور سىندى ماماندىقتاردىڭ ماڭىزدىلىعىن ءتۇسىندى. بۇل – ولاردىڭ كاسىبي باعدارىن ايقىنداۋعا زور مۇمكىندىك بولدى. «KAZ Minerals» كومپانياسى ءبىلىم بەرۋ سالاسىنا قوسقان ۇلەسى ءۇشىن ريزاشىلىعىمىزدى بىلدىرەمىز. الداعى ۋاقىتتا دا وسىنداي يگى ىستەر جالعاسىن تابادى دەپ سەنەمىز. بۇل – بالالاردىڭ جارقىن بولاشاعىنا قوسىلعان ۇلەس, اۋىل مەكتەبىنىڭ دامۋىنا جاسالعان ماڭىزدى ينۆەستيتسيا. ءاربىر دەمەۋشىلىك جوبا – ءبىلىم ساپاسىن ارتتىرۋعا, وقۋشىلاردىڭ قىزىعۋشىلىعىن دامىتۋعا جانە جايلى ورتا قالىپتاستىرۋعا زور مۇمكىندىك», دەيدى قوپا اۋىلى س. سەيفۋللين اتىنداعى جببوم مۇعالىمى مەرۋەرت سايتباەۆا.
وسىنداي ءىس-شارالار – ءوڭىر جاستارىنىڭ بولاشاعىنا باعىتتالعان ماڭىزدى قادام. ولار مەكتەپ پارتاسىنان-اق ءوندىرىس تىنىسىمەن تانىسىپ, ءوزىنىڭ ەرتەڭگى ماماندىعىن سانالى تۇردە تاڭداۋعا جول اشادى.
اباي وبلىسى
