پرەزيدەنتتىك جاستار كادر رەزەرۆى – دارىندى, باستاماشىل جانە كاسىبي بىلىكتى جاستاردى مەملەكەتتىك باسقارۋ جۇيەسىنە تارتۋعا باعىتتالعان. مەملەكەت باسشىسى قاسىم-جومارت توقاەۆتىڭ تىكەلەي باستاماسىمەن ىسكە اسقان ستراتەگيالىق جوبا بۇگىندە ەلىمىزدىڭ باسقارۋ جۇيەسىن جاڭعىرتۋدا تىڭ سەرپىن بەرىپ كەلەدى.
بۇعان دەيىن بۇل باستاماعا 2019, 2021 جانە 2023 جىلدارى جالپى 60 مىڭنان اسا جاس قىزىعۋشىلىق تانىتتى. ىرىكتەۋلەر قورىتىندىسى بويىنشا رەزەرۆكە 400 ادام قابىلداندى. قازىر ولاردىڭ 318-ءى جاۋاپتى قىزمەتتەرگە تاعايىندالدى. اتاپ ايتقاندا, 167-ءى – ورتالىق مەملەكەتتىك ورگانداردا, 37-ءى – جەرگىلىكتى اتقارۋشى ورگانداردا, 62-ءى – ۇلتتىق كومپانيالاردا, 52-ءى وزگە ۇيىمداردا قىزمەت اتقارادى. سونداي-اق 39 رەزەرۆشى ساياسي لاۋازىمداردا, ۇشەۋى – «ا» كورپۋسىنىڭ لاۋازىمدارىندا, ەكەۋى – ءماجىلىس دەپۋتاتى, بىرەۋى ءماسليحات دەپۋتاتى بولىپ ەل دامۋىنا ءوز ۇلەستەرىن قوسىپ ءجۇر.
د.جازىقبايدىڭ ايتۋىنشا, بيىلعى ىرىكتەۋدىڭ باستى ەرەكشەلىگى – ءار باعىت بويىنشا كانديداتتاردىڭ بىركەلكى سانىن قامتاماسىز ەتۋ ماقساتىندا ءار كەزەڭدە پروپورتسيونالدى ىرىكتەۋ وتكىزۋ. ياعني رەزەرۆتىڭ ءار سالالىق باعىتى بويىنشا كۆوتالار قاراستىرىلىپ, ىرىكتەۋ سول سالالىق باعىت بويىنشا عانا جۇرگىزىلەدى. بۇل ءادىس سالالار اراسىنداعى تەڭگەرىمدى قامتاماسىز ەتىپ, ناقتى باعىتتار بويىنشا ۇمىتكەرلەر ىرىكتەلەدى.
– بيىل اقپان ايىندا وتكەن «جاڭا ادامدار» جاستار فورۋمىندا مەملەكەت باسشىسى «پرەزيدەنتتىك جاستار كادر رەزەرۆى سۇرانىسقا يە جوباعا اينالدى. كەلەشەكتە مەملەكەتتى باسقارۋشىلاردىڭ نەگىزگى لەگى وسى جاس مامانداردان قالىپتاسادى» دەگەن ەدى. الداعى ۋاقىتتا دا پجكر ماڭىزى ارتا بەرەدى. ەندى ءبىز كەزەكتى ءتورتىنشى ىرىكتەۋدى وتكىزۋدى جوسپارلاپ وتىرمىز. ىرىكتەۋ پرەزيدەنت جارلىعىمەن بەكىتىلگەن ەرەجەلەرگە سايكەس 6 كەزەڭنەن تۇرادى جانە ماۋسىم-قازان ايلارىندا وتكىزىلەدى. كانديداتتارعا قويىلاتىن جالپى تالاپتار بۇعان دەيىن وتكىزىلگەن ىرىكتەۋدىڭ تالاپتارى سياقتى, ياعني كانديداتتاردىڭ جاسى 35-تەن اسپاۋى, جوعارى ءبىلىمىنىڭ, بەس جىلدان كەم ەمەس ەڭبەك ءوتىلىنىڭ جانە قازاق ءتىلىن مەڭگەرۋى ۆ1 دەڭگەيىنەن تومەن ەمەس بولۋى تۋرالى تالاپتار ساقتالادى, – دەدى مەملەكەتتىك قىزمەت ىستەرى اگەنتتىگىنىڭ توراعاسى.
ىرىكتەۋ مەملەكەتتىك اپپاراتتىڭ سالالىق كادرلارعا قاجەتتىلىگىن ەسكەرە وتىرىپ, ينفراقۇرىلىم, ونەركاسىپ جانە ساۋدا ساياساتى, اگروونەركاسىپتىك كەشەن جانە قورشاعان ورتا, سىرتقى ساياسات جانە ينۆەستيتسيالار, ەكونوميكالىق جانە قارجىلىق ساياسات, تسيفرلاندىرۋ, الەۋمەتتىك ساياسات جانە ازاماتتىق قوعام سىندى 6 نەگىزگى سالا بويىنشا جۇرگىزىلەدى. كانديدات تىركەلۋ كەزىندە كورسەتىلگەن سالالىق باعىتتاردىڭ ءبىرىن تاڭداۋى قاجەت.
قۇجاتتاردى قابىلداۋ 1-30 ماۋسىم ارالىعىندا pkrezerv.gov.kz رەسمي پلاتفورماسىندا ونلاين رەجىمدە جۇزەگە اسىرىلادى. ىرىكتەۋدىڭ وبەكتيۆتىلىگىن قامتاماسىز ەتۋ ءۇشىن كانديداتتاردىڭ دەرەكتەرى جەكە ءنومىر بەرۋ ارقىلى جاسىرىلادى. باعالاۋشىلار ءۇشىن ۇمىتكەردىڭ كىم ەكەنى بەيمالىم بولادى.
ماتىندىك جانە ساندىق اقپاراتپەن جۇمىس ىستەۋ قابىلەتىن باعالاۋ تەستىلەۋ پروكتورينگ جۇيەسىمەن, اۋديو جانە بەينەفيكساتسيامەن وتەدى. تالاپتارعا سايكەس كەلەتىن بارلىق كانديداتتىڭ ماتىندىك اقپاراتپەن جۇمىس ىستەۋ قابىلەتى باعالانادى. بۇل رەتتە ساندىق تەستىلەۋگە ءار سالالىق باعىت بويىنشا ەڭ كوپ بالل جيناعان كانديداتتاردىڭ 50%-ى جىبەرىلەدى.
سيتۋاتسيالىق تاپسىرمالاردى شەشۋ كەزەڭى – كانديداتتاردىڭ تاڭداعان سالالىق باعىتتارىنا بايلانىستى ناقتى پروبلەمالاردى شەشۋ بويىنشا ۇسىنىستارىن باعالاۋدى كوزدەيدى. بۇل كەزەڭ ونلاين-رەجىمدە ەسسە جازۋ فورماتىندا وتەدى.
اسسەسسمەنت-ورتالىعى مەن قۇزىرەتتەر بويىنشا سۇحبات وفلاين فورماتتا, پرەزيدەنت جانىنداعى مەملەكەتتىك باسقارۋ اكادەمياسىندا ۇيىمداستىرىلادى. مۇندا ۇمىتكەرلەر مىنەز-ق ۇلىق ينديكاتورلارى جانە كاسىبي قۇزىرەتتەر بويىنشا توپتىق جانە جەكە تاپسىرمالاردان وتەدى. ونلاين فورماتتاعى جەكە سۇحبات كاسىبي HR-مەنەدجەرلەرمەن وتكىزىلەدى.
– ساراپشىلىق كوميسسيامەن اڭگىمەلەسۋ ارنايى كوميسسيامەن سۇحباتتاسۋ تۇرىندە جۇزەگە اسىرىلادى. ونىڭ قورىتىندىسى بويىنشا 100-دەن اسپايتىن كانديداتتار ءتىزىمى ۇلتتىق كوميسسيا وتىرىسىنا ۇسىنىلادى. ناتيجەسىندە, ۇزدىك 50 كانديدات پرەزيدەنتتىك جاستار كادر رەزەرۆىنە قابىلدانادى. ىرىكتەۋدىڭ اشىقتىعى مەن ادىلدىگىن قامتاماسىز ەتۋ ماقساتىندا كانديداتتاردى باعالاۋ ناتيجەلەرى ولاردىڭ جەكە كابينەتىندە جانە كەزەڭ قورىتىندىسى بويىنشا اقپارات رەسمي سايتتا جاريالانادى. ەل مۇددەسىنە قىزمەت ەتەمىن دەگەن بەلسەندى جاس ازاماتتاردى پرەزيدەنتتىك جاستار كادر رەزەرۆىنە قاتىسۋعا شاقىرامىن. ءبىلىمدى, ەڭبەكقور, وتانعا قىزمەت ەتۋدى پارىز سانايتىن جاستار – ەلىمىزدىڭ تۇراقتى دامۋىنىڭ باستى قوزعاۋشى كۇشى. جاستاردىڭ ءبىلىمىن, الەۋەتى مەن كۇش-جىگەرىن ەل يگىلىگى ءۇشىن ءتيىمدى پايدالانۋ, قوعامدىق مۇددەلەرگە نەگىزدەلگەن كاسىبي مەملەكەتتىك قىزمەتشىلەردىڭ جاڭا بۋىنىن قالىپتاستىرۋ – اگەنتتىك جۇمىسىنىڭ باستى باعىتتارىنىڭ ءبىرى, – دەپ تۇيىندەدى د.جازىقباي.
