ميراس – «Kazrockets» ءبىلىم بەرۋ جوباسى مەن «RocketTech» ستارتاپىنىڭ نەگىزىن قالاۋشىلاردىڭ ءبىرى. العاشقىسى – وقۋشىلار مەن ستۋدەنتتەرگە ارنالعان اەروعارىشتىق تۋرنيرلەر ۇيىمداستىراتىن باستاما بولسا, ەكىنشىسى – جاس ونەرتاپقىشتارعا ارنالعان زىمىران مودەلدەرىنىڭ جيناقتارىن ازىرلەيتىن كاسىپ. بۇل جوبالاردىڭ تۇپكى ماقساتى – جاستاردىڭ ينجەنەرلىك قابىلەتىن دامىتۋ مەن عىلىمعا دەگەن ىنتاسىن ارتتىرۋ.
«عارىش – ينجەنەريامەن تانىسۋدىڭ تاماشا ءتاسىلى»
كەيىپكەرىمىز Astana IT University-ءدى «وندىرىستىك اۆتوماتتاندىرۋ» ماماندىعىنان تامامداعان. ستۋدەنت كەزىنەن باستاپ جۇمىس ىستەپ, حالىقارالىق EdTech كومپانياسىندا بالالارعا ارنالعان كىرىسپە ساباق بەرىپ ەڭبەك جولىن باستاعان. كەيىن جەكەمەنشىك مەكتەپتە روبوتتەحنيكانى ۇيرەتۋمەن اينالىسقان.
«مەكتەپتە وقىپ جۇرگەندە WRO جانە Robocon سياقتى حالىقارالىق جارىستاردا جەڭىسكە جەتىپ ءجۇردىم. بۇل – بۇل وقۋشىلار مەن ستۋدەنتتەر ءوز روبوتتارىن جاساپ, ولاردى ىسكە قوساتىن ءىرى تۋرنيرلەر. كەيىنىرەك مەكتەپتەرگە ارنالعان ءبىلىم بەرۋ شەشىمدەرىن جاسايتىن كومپانيالاردا جوبا مەنەدجەرى بولدىم», دەيدى ميراس.
«ستارتاپقا دوستارىمنىڭ شاقىرۋىمەن كەلدىم – ءبىز مەكتەپتىك ينجەنەرلىك جارىستارعا بىرگە قاتىسقان ەدىك. وسىلايشا KAZROCKETS تاريحى باستالدى: بالالار جاساعان قولمەن جاسالعان زىمىرانداردى ۇشىرۋ بويىنشا ماستەر-كلاستار مەن تۋرنيرلەر وتكىزدىك. 2024 جىلى ءبىزدىڭ جارىستارىمىزعا قازاقستاننىڭ تۇكپىر-تۇكپىرىنەن 350-دەن استام كوماندا قاتىستى. ۋاقىت وتە كەلە, بۇل تاقىرىپقا ۇلكەن قىزىعۋشىلىق پەن قولجەتىمدى ءبىلىم بەرۋ شەشىمدەرىنىڭ جەتىسپەۋشىلىگىن بايقادىق. وسىلايشا ەكىنشى جوبا – RocketTech پايدا بولدى. بۇل بالالارعا قاۋىپسىز ماتەريالداردان قاراپايىم زىمىران مودەلدەرىن قۇراستىرۋعا جانە ولاردى دالادا ۇشىرۋعا مۇمكىندىك بەرەتىن جيناقتار», دەيدى ونەرتاپقىش.
ءبىر قىزىعى ميراس العاشقى تاپسىرىستارىن ءۇيىنىڭ جەرتولەسىندە جيناپ باستاعان. ارناۋلى تسەحتى جالعا الۋ اۋىر سوققان كەيىن جاستار قولدا بار مۇمكىندىكتى پايدالانعان. قازىر شىعارماشىلىق توپتىڭ ونەرتابىسى 40 مەكتەپتە قولدانىلادى. ولاردىڭ كوپشىلىگى ەلدىڭ شالعاي ايماقتارىندا ورنالاسقان.
«مەنىڭ جۇمىسىمداعى ەڭ شابىتتاندىراتىن نارسە – بالالار. ولارعا ورتاق ءتىل تابۋ وڭاي, ولاردىڭ ويى مەن ماقساتىن تۇسىنەمىن. عارىش – ينجەنەريامەن تانىسۋدىڭ تاماشا ءتاسىلى. زىمىراندار كەز كەلگەن بالانى بىردەن قىزىقتىرادى. بىردە ەسەپتەپ كوردىم: ءبىز 40-50 مىڭ وقۋشى مەن ستۋدەنتتى وقىتىپپىز.
كەمشىلىكتى ارتىقشىلىققا اينالدىرعان
ونەرتاپقىشتاردىڭ توبىن باسقارىپ, ولاردىڭ الەۋەتىن ءتيىمدى پايدالانۋ كوشباسشىلىق قاسيەتتى تالاپ ەتەدى. ادەتتە شىعارماشىل ادامداردىڭ الەۋمەتپەن بايلانىسى بىردەن ورنىعا بەرمەيدى. وسى ورايدا ميراستىڭ بۇل ماسەلەنى قالاي شەشكەنىن سۇراپ بىلدىك.
«جاقسى باسشى ناقتى قانداي قاسيەتتەرگە يە بولۋى كەرەك ەكەنىن ناقتى ايتا المايمىن. بىراق ماعان كەيبىرەۋلەر كەمشىلىك دەپ سانايتىن قاسيەتتەر كومەكتەسەدى. مىسالى, مەندە نازار تاپشىلىعى جانە گيپەراكتيۆتىلىك سيندرومى بار. بۇل – ءبىر نارسەگە ۇزاق ۋاقىت نازار سالۋ قيىن بولاتىن جاعداي. الايدا مەن مۇنىڭ جاقسى جاعىنان قولدانا بىلەمىن. وسىنىڭ ارقاسىندا مەن تسەحتا زىمىرانداردى جيناپ, ءبىر مينۋتتان كەيىن نانوسپۋتنيكتەر جاساۋدان حالىقارالىق جارىس تۇجىرىمداماسىن جازا الامىن», دەيدى ميراس.
سەنىمدىلىك – باستى قاعيدا
جاس ونەرتاپقىش كەلىسسوزدەردە باسقا ارىپتەستەرىنىڭ جاسى ەداۋىر ۇلكەن بولعاننان كەيىن باستاپقىدا ولاردىڭ مىسى باسقاندىعىن جاسىرمادى. بىراق ءوز-وزىنە سەنىمدىلىكتىڭ ارقاسىندا ميراس بۇل قولايسىزدىقتاردى جەڭىپ شىققانعا ۇقسايدى.
«جاڭادان باستاعاندارعا كەڭەسىم – ءوز جولىڭىزعا نازار اۋدارىڭىز. باسقالاردىڭ تابىسىنا الاڭداماڭىز. «ۇلگەرمەي قالامىن», «باسقالاردان تومەنمىن» دەگەن ويلار جىگەردى سىندىرادى. ونىڭ ورنىنا ءوز تاجىريبەڭىزدى جەتىلدىرىڭىز», دەيدى ول وزىنەن كەيىنگى جاستارعا.
ءيا, ميراس ءنۇسىپوۆ – عىلىم مەن تەحنولوگيانى قىزىعۋشىلىقتان كاسىبي باعدارعا اينالدىرا بىلگەن جاس بۋىننىڭ جارقىن ۇلگىسى. ونىڭ زىمىران قۇراستىرۋدى ۇيرەتۋ ارقىلى بالالاردىڭ بويىنداعى ينجەنەرلىك قابىلەتتى اشۋعا باعىتتالعان ەڭبەگى – ەل ەرتەڭىنە جاسالعان زياتكەرلىك سالىم. قاراپايىم شەبەرحانادان باستالعان يدەيانىڭ بۇگىندە تۇتاس وڭىرلەرگە تارالۋى — ءبىلىم مەن تاباندىلىقتىڭ, سەنىم مەن ساپانىڭ ناتيجەسى.
