فوتو: jas.kz
بۇگىن مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباي پرەزيدەنتتىك جاستار كادر رەزەرۆىنە كەزەكتى ىرىكتەۋدىڭ ەرەكشەلىكتەرى مەن كەزەڭدەرىن ءتۇسىندىردى.
دارحان جازىقبايدىڭ ايتۋىنشا, بيىلعى ىرىكتەۋدىڭ باستى ەرەكشەلىگى – ءار باعىت بويىنشا كانديداتتاردىڭ بىركەلكى سانىن قامتاماسىز ەتۋ ماقساتىندا ءاربىر كەزەڭدە پروپورتسيونالدى ىرىكتەۋ وتەدى. رەزەرۆتىڭ ءار سالالىق باعىتى بويىنشا كۆوتالار قاراستىرىلىپ, ىرىكتەۋ سول سالالىق باعىت بويىنشا عانا جۇرگىزىلەدى. بۇل ءادىس سالالار اراسىنداعى تەڭگەرىمدى, ناقتى باعىتتار بويىنشا ۇمىتكەرلەردى ىرىكتەۋدى قامتاماسىز ەتەدى.
«ىرىكتەۋ مەملەكەتتىك اپپاراتتىڭ سالالىق كادرلارعا قاجەتتىلىگىن ەسكەرە وتىرىپ, ينفراقۇرىلىم, ونەركاسىپ جانە ساۋدا ساياساتى, اگروونەركاسىپتىك كەشەن جانە قورشاعان ورتا, سىرتقى ساياسات جانە ينۆەستيتسيالار; ەكونوميكالىق جانە قارجىلىق ساياسات, تسيفرلاندىرۋ, الەۋمەتتىك ساياسات جانە ازاماتتىق قوعام سىندى 6 نەگىزگى سالا بويىنشا جۇرگىزىلەدى. كانديدات تىركەلۋ كەزىندە كورسەتىلگەن سالالىق باعىتتاردىڭ ءبىرىن تاڭداۋى قاجەت. ۇمىتكەرلەرگە قويىلاتىن تالاپتار: ىرىكتەۋگە جاسى 35-تەن اسپاعان, جوعارى ءبىلىمى جانە 5 جىل جالپى جۇمىس تاجىريبەسى بار, مەملەكەتتىك ءتىلدى ۆ1 دەڭگەيىنەن تومەن ەمەس مەڭگەرگەن قازاقستان رەسپۋبليكاسىنىڭ ازاماتى قاتىسا الادى», دەدى مەملەكەتتىك قىزمەت ىستەرى اگەنتتىگىنىڭ توراعاسى.
پرەزيدەنتتىك جاستار كادر رەزەرۆىنىڭ مۇشەسى بولۋ ءۇشىن ۇمىتكەرلەر 6 كەزەڭنەن تۇراتىن كەشەندى ىرىكتەۋدەن ءوتۋى ءتيىس.
قۇجاتتاردى قابىلداۋ 1-30 ماۋسىم ارالىعىندا pkrezerv.gov.kz رەسمي پلاتفورماسىندا ونلاين رەجيمدە جۇزەگە اسىرىلادى. ىرىكتەۋدىڭ وبەكتيۆتىلىگىن قامتاماسىز ەتۋ ءۇشىن كانديداتتاردىڭ دەرەكتەرى جەكە ءنومىر بەرۋ ارقىلى جاسىرىلادى. باعالاۋشىلار ءۇشىن ۇمىتكەردىڭ كىم ەكەندىگى بەيمالىم بولادى.
ماتىندىك جانە ساندىق اقپاراتپەن جۇمىس ىستەۋ قابىلەتىن باعالاۋ – تەستىلەۋ پروكتورينگ جۇيەسىمەن, اۋديو جانە بەينەفيكساتسيامەن وتەدى. بۇل رەتتە دە ادىلدىك پەن اشىقتىق قامتاماسىز ەتىلەدى. تالاپتارعا سايكەس كەلەتىن بارلىق كانديدات ماتىندىك اقپاراتپەن جۇمىس ىستەۋ قابىلەتىن باعالاۋدان وتەدى. بۇل رەتتە ساندىق تەستىلەۋگە ءار سالالىق باعىت بويىنشا ەڭ كوپ بالل جيناعان كانديداتتاردىڭ 50%-ى جىبەرىلەدى.
سيتۋاتسيالىق تاپسىرمالاردى شەشۋ كەزەڭى كانديداتتاردىڭ تاڭداعان سالالىق باعىتتارىنا بايلانىستى ناقتى پروبلەمالاردى شەشۋ بويىنشا ۇسىنىستارىن باعالاۋعا باعىتتالعان. بۇل كەزەڭ ونلاين-رەجيمدە ەسسە جازۋ فورماتىندا وتەدى.
اسسەسسمەنت-ورتالىعى مەن قۇزىرەتتەر بويىنشا سۇحبات – وفلاين فورماتتا, پرەزيدەنت جانىنداعى مەملەكەتتىك باسقارۋ اكادەمياسىندا وتەتىن بۇل كەزەڭدە ۇمىتكەرلەر مىنەز-ق ۇلىق ينديكاتورلارى جانە كاسىبي قۇزىرەتتەر بويىنشا توپتىق جانە جەكە تاپسىرمالاردى ورىندايدى. ونلاين فورماتتاعى جەكە سۇحبات كاسىبي HR-مەنەدجەرلەرمەن وتكىزىلەدى.
ساراپشىلىق كوميسسيامەن اڭگىمەلەسۋ ارنايى كوميسسيامەن سۇحباتتاسۋ تۇرىندە جۇزەگە اسىرىلادى. ونىڭ قورىتىندىسى بويىنشا ۇلتتىق كوميسسيا وتىرىسىنا 100-دەن اسپايتىن كانديدات ءتىزىمى ۇسىنىلادى.
ۇلتتىق كوميسسيا وتىرىسىنىڭ قورىتىندىسىمەن ۇزدىك 50 كانديدات پرەزيدەنتتىك جاستار كادر رەزەرۆىنە قابىلدانادى.
ىرىكتەۋدىڭ اشىقتىعى مەن ادىلدىگىن قامتاماسىز ەتۋ ماقساتىندا كانديداتتاردى باعالاۋ ناتيجەلەرى ولاردىڭ جەكە كابينەتىندە جانە كەزەڭ قورىتىندىسى بويىنشا اقپارات رەسمي سايتتا جاريالانادى.
