«اتامەكەن» باسشىسى فابريكادا «KMG PetroChem» جشس باسقارما توراعاسىنىڭ بيزنەستى دامىتۋ جونىندەگى ورىنباسارى دياز ديانوۆپەن, «Kazakhstan Petrochemical Industries Inc» كومپانياسىنىڭ باسشىلىعىمەن كەزدەستى. جيىندا «بال تەكستيل» ۇلگىسىندە وتاندىق قامتۋدى ارتتىرۋ ماسەلەلەرى تالقىلاندى.
ماسەلەن, «بال تەكستيل» تۇتىناتىن پوليپروپيلەن شيكىزاتىن فابريكانىڭ ءوزى شىعارادى. وسى سەكىلدى كاسىپورىندار تاۋار شىعارۋدا وتاندىق شيكىزاتقا كوبىرەك يەك ارتقانى ءجون دەگەن پىكىر ءبىلدىردى پالاتا توراعاسى. بۇل بىرىنشىدەن, وتاندىق ءوندىرىستى شەتەلدىك شيكىزاتقا تاۋەلدىلىكتەن ارىلتسا, ەكىنشىدەن كاسىپكەرلىك سالاسىنىڭ دامۋىنا سەرپىن بەرەدى. ءىرى كاسىپورىن جانىنان قوسىمشا وندىرىستەر اشىلۋ ارقىلى جاڭا جۇمىس ورىندارى پايدا بولادى. بۇل ءوز كەزەگىندە ەلدىڭ الەۋمەتتىك ماسەلەسىن شەشۋگە سەپتىگىن تيگىزەدى. «وتاندىق ءونىم نەعۇرلىم ءوزىمىزدىڭ شيكىزاتپەن, جەرگىلىكتى تەحنولوگيامەن جاسالعان سايىن سوعۇرلىم ۇلتتىق ەكونوميكا قارىشتاپ داميدى», دەدى ر.باتالوۆ.
«بال تەكستيل» – وتاندىق ءىرى تاۋار ءوندىرۋشى. وسى سەكىلدى وڭىرلەردەگى كومپانيالارعا «بايتەرەك», «دامۋ» قورلارى ارقىلى قولداۋ كورسەتىپ, جەڭىلدەتىلگەن نەسيە بەرۋدى قاراستىرۋ كەرەك. سونىمەن قاتار وتاندىق كومپانيالار اراسىندا وففتەيك كەلىسىمشارتتار ءتۇزۋدىڭ دە ماڭىزى زور. بۇل كەلىسىمشارتتىڭ ماقساتى – شىعارىلاتىن تاۋاردى ساتىپ الاتىن تۇتىنۋشىلارمەن الدىن الا كەلىسىمدەر جاساسۋ», دەدى ر.باتالوۆ.
ايتا كەتەيىك, «بال تەكستيل» – كىلەم مەن كىلەم ونىمدەرىن شىعاراتىن فابريكا. كومپانيا ورتالىق ازيا نارىعىندا دا ۇلكەن بەدەلگە يە. كەيىنگى جىلدارى ەۋروپا ەلدەرى تاراپىنان دا سۇرانىس كۇشەيدى.
شىمكەنت
