استانادا وتاندىق وندىرۋشىلەردىڭ كورمەسى وتەدى

اۋقىمدى ءىس-شارا 18 مامىرعا دەيىن جالعاسادى. كورمەگە 350-دەن استام وتاندىق ءوندىرۋشى قاتىسىپ, ءوز ونىمدەرىن ۇسىنىپ وتىر.

كەلۋشىلەر ەلىمىزدە «دامۋ» قورىنىڭ مەملەكەتتىك باعدارلامالارى ارقىلى وندىرىلگەن تاۋارلاردىڭ كەڭ اسسورتيمەنتىمەن تانىسىپ, ولاردى ساتىپ الا الادى. ەكسپوزيتسيادا ازىق-ت ۇلىك, جەڭىل جانە حيميا ونەركاسىبى ونىمدەرىنەن باستاپ, ماشينا جاساۋ, جابدىق, زەرگەرلىك بۇيىمدار سياقتى ءتۇرلى باعىتتار قامتىلعان.

كورمەگە قاتىسۋشى ءىرى برەندتەردىڭ قاتارىندا — «گورمولزاۆود», «Aq Dam» ۇلتتىق تاتتىلەرى, Galamilk, Altay Outwear تۋريستىك كيىمدەرى مەن جابدىقتارى, زەرگەرلىك بۇيىم ءوندىرۋشى «Balausa Jewelry», اككۋمۋلياتور شىعاراتىن «قاينار اكب» جشس, يرريگاتسيالىق تەحنيكامەن تانىمال «Su bereke», تۇرمىستىق حيميا ءوندىرۋشى «اۆرورا», سونداي-اق تۇرمىستىق تەحنيكا شىعاراتىن «Almaty Turmystyq Tehnika zavody» جشس بار.

ءىس-شارا اياسىندا كاسىپكەرلىكتى دامىتۋعا ارنالعان بىرقاتار پانەلدىك سەسسيالار ۇيىمداستىرىلادى. ولارعا وتاندىق جانە شەتەلدىك ساراپشىلار قاتىسىپ, قازاقستانداعى بيزنەستىڭ نەگىزگى ۇردىستەرى مەن دامۋ مۇمكىندىكتەرىن تالقىلايدى.

سونىمەن قاتار, كورمە شەڭبەرىندە «حالىق تاڭداۋى» اتتى ءدام تاتۋ بايقاۋى, ءسان كورسەتىلىمدەرى, كاسىپكەرلەرگە ارنالعان شەبەرلىك ساباقتارى, كۇن سايىنعى ۇتىس ويىندارى مەن كونتسەرتتىك باعدارلامالار وتەدى.

كورمە اياسىندا مەملەكەت تاراپىنان كاسىپكەرلىكتى قولداۋدىڭ ناقتى ناتيجەلەرى دە كورسەتىلۋدە. ماسەلەن, 2024 جىلدىڭ وزىندە عانا «دامۋ» قورى ارقىلى 29,5 مىڭ جوبا 1,7 ترلن تەڭگە سوماسىندا نەسيەمەن قامتىلدى. بۇل ماقساتقا 590 ملرد تەڭگە بولىنگەن. ناتيجەسىندە 25,4 ترلن تەڭگەگە ءونىم ءوندىرىلىپ, 1,7 ترلن تەڭگە سالىق تولەنىپ, 9,7 مىڭ جاڭا جۇمىس ورنى اشىلعان. جالپى العاندا, مەملەكەتتىك قولداۋدىڭ ارقاسىندا 225 مىڭنان استام كاسىپكەرگە كومەك كورسەتىلگەن. نەسيەگە يە بولعان جوبالاردىڭ جالپى قۇنى – 14,1 ترلن تەڭگە. بۇل ارقىلى 220 مىڭ جاڭا جۇمىس ورنى قۇرىلىپ, 1,2 ميلليوننان استام جۇمىس ورنى ساقتالىپ وتىر. سونىمەن قاتار, 130 ترلن تەڭگەدەن استام سوماعا ءونىم ءوندىرىلىپ, 9 ترلن تەڭگە كولەمىندە سالىق تولەنگەن.

«Ulttyq ónim» كورمەسى جىل سايىن وتاندىق كاسىپكەرلىك پەن ونىمدەردىڭ كەڭىنەن تانىلۋىنا جول اشىپ وتىر. ءىس-شاراعا قىزىعۋشىلىق تا ارتىپ كەلەدى: 2022 جىلى كورمەنى 20 مىڭ ادام تاماشالاسا, 2023 جىلى كەلۋشىلەر سانى 22 مىڭعا جەتكەن. ساتۋ كولەمى دە ءوسىپ, 2022 جىلعى 70 ملن تەڭگەدەن 2023 جىلى 74,1 ملن تەڭگەگە دەيىن ۇلعايعان.