تاتۋلىق – قىمبات قازىنا
ءتۇرلى ۇلتتار مەن ۇلىستاردى ءبىر شاڭىراق استىنا بىرىكتىرگەن اسسامبلەيانىڭ ايتۋلى مەرەكەسى وڭىرلەردە ءتۇرلى ءىس-شارالارمەن اتالىپ وتۋدە. سولاردىڭ ءبىرى پاۆلودار قالاسىندا وبلىستىق تىلدەردى دامىتۋ جونىندەگى باسقارماسىنىڭ ۇيىتقى بولۋىمەن وتكەن ەتنوس جاستارى اراسىنداعى «ءتىل – تاتۋلىق تىرەگى» بايقاۋى بولدى. بايقاۋعا 18 بەن 30 جاس ارالىعىنداعى وزگە ۇلت وكىلدەرى قاتىستى. ولار ءوڭىردىڭ قالا مەن اۋداندارىندا وسى بايقاۋدىڭ ىرىكتەۋ كەزەڭىنەن وتكەن جەڭىمپازدار. قاتىسۋشىلار مەملەكەتتىك ءتىل تۋرالى بەينەروليكتەر دايىنداپ, بەرىلگەن تاقىرىپقا ەسسە جازدى. بايقاۋ قورىتىندىسى بويىنشا ءى ورىندى اقسۋ قالاسىنىڭ وكىلى ەلەنا گاركاۆا, ءىى ورىندى پاۆلودار قالاسىنىڭ ۇمىتكەرى مايا يۆانوۆا جانە ءىىى ورىندى ەكىباستۇز قالاسى نامىسىن قورعاعان ايدا ماگەرراموۆا يەلەندى. جۇلدەگەرلەر ارنايى ديپلوم, العىس حات جانە باعالى سىيلىقتارمەن ماراپاتتالدى.
بايقاۋ جەڭىمپازى ەلەنا گاركاۆا – ۋكراين قىزى. س.تورايعىروۆ اتىنداعى پاۆلودار مەملەكەتتىك ۋنيۆەرسيتەتىنىڭ 4-كۋرس ستۋدەنتى. بولاشاق ماماندىعى – جۋرناليست. ۋنيۆەرسيتەتتىڭ قوعامدىق ومىرىنە بەلسەندى قاتىسقانى, ۇزدىك وقۋى مەن جەكە جەتىستىكتەرى ءۇشىن پمۋ گرانتىنا يە بولعان. ول «ءVىىى ءماشھۇر ءجۇسىپ وقۋلارى», «V س.تورايعىروۆ وقۋلارى», «ءحىىى ساتباەۆ وقۋلارى» حالىقارالىق جانە رەسپۋبليكالىق عىلىمي-پراكتيكالىق كونفەرەنتسيالارعا تۇراقتى قاتىسىپ كەلەدى. قازاق اقىن-جازۋشىلارى شىعارمالارىن مانەرلەپ وقۋ بويىنشا قالالىق, وبلىستىق جانە رەسپۋبليكالىق بايقاۋلاردا باعىن سىناپ, بىرنەشە مارتە جۇلدەلى ورىندار يەلەنگەن. ءتىل ساياساتىن جۇزەگە اسىرۋ اياسىندا وتەتىن «ءتىل – ادام جانىن تانۋدىڭ كىلتى», «اباي وقۋلارى», م.ماقاتاەۆ جانە م.ج. كوپەي ۇلى شىعارماشىلىق مۇرالارىن ناسيحاتتاۋعا ارنالعان كونكۋرستارعا دا بەلسەندى قاتىسادى. استانادا وتكەن «ءتىل – تاتۋلىق تىرەگى» اتتى مەملەكەتتىك ءتىلدى مەڭگەرگەن وزگە ۇلت وكىلدەرىنىڭ جاستارى اراسىنداعى ءىV رەسپۋبليكالىق فورۋمىنا قاتىستى.
ارمانى اسقاق ە.گاركاۆانى قۇربى-قۇرداستارى ەرەكشە ماقتان تۇتادى. بولاشاق جۋرناليست وقۋ پراكتيكاسىن وبلىستىق «سارىارقا سامالى» گازەتىندە وتكەن. قازاق تىلىندە ماقالا, تەزيس, شولۋ مەن ساراپتامالىق ماتەريالدار جازۋدى ءۇيرەندىم, شىعارماشىلىق قابىلەتىمدى شىڭدادىم, دەيدى ول.
ەلەنا مەكتەپتە ورىس تىلىندە وقىعان. قازاق ءتىلىن وقىپ-ۇيرەنەمىن دەگەن قۇلشىنىسى مەن زور تالابىنىڭ ارقاسىندا مەملەكەتتىك ءتىلدى ەركىن مەڭگەرگەن. ەلەنانىڭ وسىنداي ەرىك-جىگەرى مەن ەڭبەگى وزگەلەرگە ۇلگى بولادى دەگەن ويدامىز. مەملەكەتتىك ءتىلدى ەركىن مەڭگەرگەن ە.گاركاۆانىڭ مەرەيى ءاردايىم ۇستەم بولارىنا كامىل سەنەمىز.
اقىلبەك ساتىبالدين.
پاۆلودار.
