اۆتوكولىك جولدارى – ەكونوميكانىڭ كۇرەتامىرى

جولداردى جاڭعىرتۋ ماقسا­تىندا 8 800 كم اۆتوموبيل جولىنا ءتۇرلى جون­­­دەۋ جۇمىسى جۇر­­گىزىلەدى. ونىڭ 2 100 كم-گە قۇ­رى­­لىس پەن قايتا جاڭارتۋ, ال 460 كم-گە كۇر­دەلى, 6 300 كم-گە ورتاشا جوندەۋ ىسكە اسا­دى. جول جوندەۋ جۇمىستارىن ورىن­داۋعا شامامەن 10 مىڭ جول-قۇرى­لىس تەحنيكاسى, 27 اسفالت-بەتون زاۋىتى مەن 25 مىڭ مامان جۇمىلادى.

جوبانى ىسكە اسىرۋدا 9,4 ملن توننا اسفالت-بەتون قوسپاسى, 12 ملن تەكشە مەتر قيىرشىق تاس پەن 500 مىڭ توننا بيتۋم قولدانۋ جوسپارلانعان.  ماقساتتى ىسكە 781 ملرد تەڭگە قارجى قاراستىرىلىپتى. بۇل تۋرا­لى ورتالىق كوممۋنيكاتسيا­لار قىزمەتىندە وتكەن بريفينگ­تە «قازاۆتوجول» ۇك» اق باس­قارما توراعاسى دارحان يماناشەۆ ايتتى.

سونىمەن جول-قۇرىلىس ماۋ­سىمى اياسىندا قايتا جاڭارتۋ جانە قۇرىلىس جوباسىمەن 2100 كم اۆتوجول قامتىلادى. ونىڭ 1100 كم-گە 10 وتپەلى جوبانىڭ قۇرىلىس جۇمىسى جۇزەگە اسادى. اتالعان جوبادا جولدى اباتتاندىرۋ, كارەرلەردى رەكۋلتيۆاتسيالاۋ, وندىرىستىك بازا مەن ۋاقىتشا اينالما جولدى سالۋ بويىنشا نەگىزگى جۇمىستى اياقتاۋ جوسپارلانعان.

«مىڭ كم جولدا 7 جاڭا جوبانى جۇزەگە اسىرىپ جاتىرمىز. ولار – قارا­عاندى – جەزقازعان, اقتوبە – ۇلعايسىن, اتىراۋ – دوس­سور, قىزىلوردا, رۋدنىي, سارى­اعاش پەن پەتروپاۆل قالاسىنىڭ اينالما جولدارى. باسىم جوبا رەتىندە قالباتاۋ – مايقاپشاعاي مەن قىزىلوردا – جەزقازعان اۆتوجولىن قايتا جاڭارتۋ ۋچاسكەلەرى انىقتالدى. جىل سوڭىنا دەيىن 1100 شاقىرىم جولدا نەگىزگى جۇ­مىس اياقتالادى», دەدى د.يماناشەۆ.

ونىڭ ايتۋىنشا, بيىل كۇردەلى جون­دەۋ جۇمىسىمەن ۇزىندىعى 460 كم-ءنى قۇرايتىن 47 نىسان قامتىلادى. بۇل شارا­عا 8,5 ملرد تەڭگە قارجى كوزدەلگەن. جىل اياعىنا دەيىن 174 كم بولاتىن 5 ۋچاسكە پايدالانۋعا بەرىلمەك. 6300 كم جولداعى 233 نىساندا ورتاشا جوندەۋ جۇمىسى جوسپارلانعان. بۇل ءىستى اتقارۋعا 203 ملرد تەڭگە قاراجات بولىنبەك. قۇرىلىس ماۋسىمى سوڭىنا دەيىن كەمىندە 2000 كم اۆتوجول پايدالانۋعا بەرىلەدى.

شەكاراداعى اۆتوموبيل وتكىزۋ پۋنكتتەرى ينفراقۇرىلىمىن دامىتۋعا ەرەكشە ءمان بەرىلگەن. بۇگىندە مەملەكەتتىك شەكارا بويىندا 52 وتكىزۋ پۋنكتى جۇمىس ىستەيدى. ونىڭ 38 پۋنكتى ەۋرازيا ەكونوميكالىق قاۋىمداستىعى ەلدەرى اراسىندا, ال 14 پۋنكتى سىرتقى شەكارادا. وسى جىلى بەساعاش, قاراسۋ, سىرىم, الىمبەت, جاڭا جول مەن قوساق وتكىزۋ پۋنكتتەرىندە قۇرىلىس جۇمىسى جۇرگىزىلەدى. وعان 51 ملرد تەڭگە قاراجات بولىنگەن. 2030 جىلعا دەيىنگى ۇزاقمەرزىمدى جوسپارعا سايكەس 36 اۆتوموبيل وتكىزۋ پۋنكتىن قايتا جاڭارتۋ كوزدەلگەن.

رەسپۋبليكالىق ماڭىزى بار اۆتوجول جەلىسىندە 1500-گە جۋىق جول بويىنداعى قىزمەت كورسەتۋ نىسانى ورنالاسقان. بيىل جەكە ينۆەستيتسيا ەسەبىنەن قوسىمشا 36 جاڭا نىسان اشۋ جوسپاردا بار. جول پايدالانۋشىعا قولايلى جاعداي جاساۋ ماقساتىندا تۋريستىك نىساندارعا اپاراتىن باعىتتارعا 37 جاڭا سانيتارلىق توراپ ورناتىلادى.

«بيىل اۆتوجولداردىڭ قالىپتى ساقتالۋىن قامتاماسىز ەتۋ ءۇشىن 28 جاڭا اۆتوماتتى ولشەۋ ستانساسىن ء(اوس) ورناتۋ جوسپارلانعان. قازىر جول بويىندا 22 ءاوس جۇمىس ىستەپ تۇر», دەدى د.يماناشەۆ.

قازىرگى جاعداي بويىنشا ەلىمىزدە ۇزىندىعى 4100 كم-ءنى قۇرايتىن 21 اقىلى جول تەلىمى بار. جۇرگىزۋشىگە ءتيىمدى بولۋ ءۇشىن ايلىق جانە جىلدىق ابونەمەنت قاراستىرىلعان. جەڭىل كولىكتەرگە بىرجىلدىق ابونەمەنت 1 ايلىق ەسەپتىك كورسەتكىشتى قۇرايدى, ال اۆتوبۋس پەن جۇك كولىگىنە ايلىق جانە جىلدىق ابونەمەنت جۇك كوتەرىمىنە بايلانىستى بولادى.

وتكەن قىس مەزگىلىندە جول قىزمەتى اۆتوجولداردى كۇتىپ-ۇستاۋدا اۋقىمدى جۇمىس اتقارىپ, جۇرگىزۋشىگە قاۋىپسىز ءارى قولايلى قوزعالىس قامتاماسىز ەتتى. قىسقى جۇمىستار اياسىندا جولداردا شامامەن 31 ملن تەكشە مەتر قار تازالاندى, 22 000 اعاش قار ۇستاۋ قالقانى ورناتىلدى, 11 000 كم قار ۇستاۋ ترانشەيا­لارى مەن بىلىكتەرى جاسالدى. بوراندا 286 ادام قۇتقارىلىپ, 173 اۆتوكولىك قار قۇرساۋىنان شىعارىلدى.

سونىمەن قاتار بيىل 437 ارنايى تەحنيكا ساتىپ الىندى. ناتيجەسىندە, تەحنيكانىڭ جالپى سانى 2805-كە جەتىپ, بۇل قاجەتتىلىكتىڭ 38%-ىن قۇرادى. ەندى جىل سوڭىنا دەيىن قوسىمشا 683 ارنايى تەحنيكانى الۋ جوسپاردا بار.

مامىردان باستاپ رەسپۋبليكالىق ماڭىزى بار اۆتوموبيل جولدارىنىڭ ساپاسىن تەكسەرۋگە كەڭ اۋقىمدى «حالىق­تىق باقىلاۋ» جوباسى ىسكە قوسىلادى. جوبانىڭ ماقساتى – ەلدەگى ءاربىر ازاماتتى سالىنىپ جاتقان رەسپۋبليكالىق ماڭىزى بار اۆتوموبيل جولدارى بويىنشا قوعامدىق باقىلاۋعا شاقىرۋ. جوباعا قاتىسۋ ءۇشىن 1403 بايلانىس ورتالىعىنا حابارلاسىپ, ءوتىنىم قالدىرۋ كەرەك.