قىزىلورداداعى قورقىت اتا ۋنيۆەرسيتەتىندە ەكى ورتالىق اشىلدى

استانا. 20 ماۋسىم. قورقىت اتا اتىنداعى قىزىلوردا مەملەكەتتىك ۋنيۆەرسيتەتىندە «نازارباەۆتانۋ» عىلىمي-وقۋ جانە «ماڭگىلىك ەل» وقۋ-تاربيە ورتالىقتارى اشىلدى. بۇل تۋرالى egemen.kz حابارلادى. اتالعان ورتالىقتار ەلباسىنىڭ بەس ينستيتۋتسيونالدىق رەفورمانى جۇزەگە اسىرۋ جونىندەگى «100 ناقتى قادام – بارشاعا ارنالعان قازىرگى زامانعى مەملەكەت» اتتى ۇلتتىق جوسپارىن, سونداي-اق, ەلىمىزدىڭ «ماڭگىلىك ەل» ۇلتتىق يدەياسىن جۇزەگە اسىرۋ ماقساتىندا اشىلىپ وتىر. «نازارباەۆتانۋ» عىلىمي-وقۋ ورتالىعى ۋنيۆەرسيتەتتە 2014 جىلى قۇرىلعان «قازاقستان حالقى اسسامبلەياسى» كافەدراسىنا قاراستى «ەلباسى جانە تاۋەلسىز قازاقستان» وقۋ-كورمە زالى جانىنان قوعامدىق نەگىزدە قۇرىلدى. ورتالىقتىڭ باستى ماقساتى – ەلباسىنىڭ ەل تاۋەلسىزدىگىن باياندى ەتۋدەگى, حالىقارالىق ارەنادا قازاقستاننىڭ بەدەلىن ارتتىرۋداعى ەرەن ەڭبەگىن ناسيحاتتاۋ. ال «ماڭگىلىك ەل» وقۋ-تاربيە ورتالىعىنىڭ ماقساتى – ۇلتتىق سانا-سەزىمى, ازاماتتىق, وتانسۇيگىشتىك قاسيەتتەرى جوعارى, ۇلت مادەنيەتىن دامىتۋ مەن ساقتاۋداعى جاۋاپكەرشىلىكتى سەزىنە بىلەتىن, تاريحي وي-ورەسى جەتىلگەن, وزگە مادەنيەت وكىلدەرىمەن جۇيەلى سۇحبات قۇرا الاتىن جاستاردى تاربيەلەۋ بولىپ تابىلادى. «ماڭگىلىك ەل» وقۋ-تاربيە ورتالىعى «پەداگوگيكا جانە پسيحولوگيا» كافەدراسى جانىنان قوعامدىق نەگىزدە اشىلدى. تالعات رايىمبەك. دەرەك: egemen.kz. سۋرەت: akmeshit-zhastar.kz.