الماس بەلگىسىمەن ماراپاتتالدى

كەشە ماسكەۋدەگى قازاقستان ەلشىلىگىندە قازاقستان رەس­پۋب­ليكاسىنىڭ پرەزيدەنتى نۇرسۇلتان نازارباەۆ ماراپاتتالعان حالىقارالىق ينجەنەرلىك اكادەمياسىنىڭ الماس بەلگىسىنىڭ تاپسىرۋ ءراسىمى ءوتتى. بۇل قۇرمەتتى ناگرادا ەلباسىنا «قازاقستاننىڭ ينجەنەرلىك اكادەمياسىنىڭ دامۋىنا جانە تمد ەلدەرىنىڭ عىلىمي, ينجەنەرلىك-تەحنيكالىق قوعامداستىقتارىنىڭ نىعايۋىنا ەلەۋلى ۇلەس قوسقانى ءۇشىن» بەرىلدى. حالىقارالىق ينجەنەرلىك اكا­دەميا­سىنىڭ پرەزيدەنتى بوريس گۋسەۆ قۇرمەتتى بەلگىسىن تاپسىرا تۇرا, نۇرسۇل­تان نازارباەۆتى جا­قىندا وتكەن پرەزي­دەنتتىك ساي­لاۋ­داعى جەڭىسىمەن قۇتتىق­تادى جانە ەلبا­سىنىڭ كەڭەس وداعىنان كەيىن­گى كە­ڭىس­تىكتە ينجەنەرلىك عىلىمدى دامى­تۋداعى ماڭىزى زور دەپ مالىمدەدى. اكادەميادا قۇرىلعان الماس بەل­گىسى ينجەنەرلىك قىزمەتتەگى قوعامدىق قۇر­مەتتەۋدىڭ جانە كاسىبي وزاتتىقتىڭ ەڭ جوعارعى نىسانى بولىپ تابىلادى. ءتارتىپ بويىنشا عالىمدار, ينجەنەر­لەر, ءوندىرىس سالاسىنىڭ وكىلدەرى, كور­نەك­­تى مەملەكەتتىك جانە قوعام قايرات­كەر­لەرى قىزمەتتەگى ەرەكشە جەتىستىكتەرى ءۇشىن اتالمىش بەلگىمەن ماراپاتتالادى. اكادەميانىڭ ناگراداسىن قا­زاق­ستاننىڭ رەسەيدەگى ەلشىسى ما­رات ءتاجين قابىل الدى. ەلشىنىڭ ايتۋىن­شا, بۇل ماراپات – ەلباسىنىڭ كەڭەس وداعىنان كەيىنگى كەڭىستىكتە ماڭىز­دى عىلىمي جانە ينجەنەرلىك جوبا­لاردىڭ دامۋىنا قوسقان ەداۋىر ۇلەسىنىڭ ناقتى كورسەتكىشى. «قازىرگى كەزدە حالىقارالىق ينجە­نەرلىك اكادەميا قىزمەتىنىڭ ماڭىزى ەرەكشە زور, سەبەبى اعىمداعى ەۋرازيالىق ەكونوميكالىق ينتەگراتسيا ۇدەرىسى ەاەو-عا مۇشە مەملەكەتتەر ينجەنەرلىك مەكتەپتەرىنىڭ تىعىس بايلانىسىن, ينجەنەرلىك كادر­لاردى ساپالى دايارلاۋىن جانە ءىرى ين­فراقۇرىلىمدىق,  سالاارالىق جوبا­لارىن ىسكە اسىرۋىن تالاپ ەتۋدە», –  دەدى م.ءتاجين. حالىقارالىق ينجەنەرلىك اكادە­مياسى (حيا) كەڭەس وداعىنىڭ ينجە­نە­رلىك اكادەمياسىنىڭ قۇ­قىق­تىق ميراس­قورى بولىپ سانالادى. حيا-عا بىرقا­تار شەتەلدىك ۇلت­تىق ينجەنەرلىك اكادە­ميالار كىرە­دى. قازىرگى تاڭدا حيا-عا 40 ەلدىڭ 1300 وكىلى مۇشەلىك ەتۋدە, ولار­دىڭ قاتارىندا شەتەلدەردىڭ پرەزيدەنتتەرى, ۇكىمەت باسشىلارى, اتاقتى عالىمدارى, قوعام قايرات­كەر­لەرى, ءىرى ونەركاسىپتىك جانە عىلىمي قۇرىلىمدارىنىڭ باسشىلارى بار.