فوتو: نۋرلان بايگازيەۆ/Facebook
الدىن الا مالىمەت بويىنشا, وقيعا 13 مامىر كۇنى كەشكە قالانىڭ ءبىر ءدامحاناسىندا بولعان. دەپۋتاتتى سوققىعا جىققاننان كەيىن ول بەت جاراقاتىمەن اۋرۋحاناعا جەتكىزىلدى. الايدا جامبىل وبلىستىق پوليتسيا دەپارتامەنتىنىڭ مالىمەتىنشە, ول اۋرۋحاناعا جاتۋدان باس تارتقان.
«بۇل فاكتى بويىنشا قر قىلمىستىق كودەكسىنىڭ 293-بابى 1-بولىگى «بۇزاقىلىق» بويىنشا سوتقا دەيىنگى تەرگەۋ جۇرگىزىلىپ جاتىر. وقيعاعا قاتىسى بار ادام انىقتالىپ, پوليتسياعا جەتكىزىلدى. قازىرگى ۋاقىتتا قىلمىستىق ءىس بويىنشا وقيعانىڭ بارلىق ءمان-جايىن جان-جاقتى انىقتالىپ جاتىر, قاجەتتى تەرگەۋ جانە جەدەل-ىزدەستىرۋ شارالارى جۇرگىزىلۋدە», دەپ حابارلادى قۇقىق قورعاۋ ورگاندارى.
الەۋمەتتىك جەلىلەردە تاراعان اقپاراتقا سايكەس, نۇرلان بايعازيەۆ تاراز قالاسىنا ىسساپارمەن كەلگەن. زاڭگەر رەتىندە ول كليەنتتەرمەن كەزدەسۋ وتكىزىپ جاتقان. سول ساتتە وعان شابۋىل جاسالعانى حابارلانعان. الدىن الا مالىمەت بويىنشا, ەر ادام دەپۋتاتتى كاستەتپەن ۇرعان.
ايتا كەتەيىك, 28 ساۋىردە نۇرلان بايعازيەۆ الماتى وبلىسىندا كامەلەتكە تولماعاندار ءىسى جونىندەگى پوليتسيا قىزمەتكەرلەرىنىڭ 17 جاستاعى قىزدى توقتاتىپ, ونى قىزمەتتىك كولىكپەن قىدىرتىپ قايتۋعا ۇسىنىس جاساعان ءساتىن ۆيدەوعا ءتۇسىرىپ العان بولاتىن. ۆيدەودا ول پوليتسيا قىزمەتكەرلەرىنىڭ تاراپىنان بولعان زاڭبۇزۋشىلىقتارعا نازار اۋداردى. قىزمەتتىك تەكسەرۋدەن كەيىن كىنالى پوليتسەيلەر جۇمىستان شىعارىلدى.
