بۇل جونىندە ۇلتتىق كوميسسيا مۇشەسى, قالا اكىمىنىڭ گەندەرلىك ماسەلەلەر جونىندەگى كەڭەسشىسى بايان جاندوسوۆا: «اپتالىق اياسىندا دەنساۋلىق ساقتاۋ, ءبىلىم باسقارمالارىمەن بىرلەسىپ ءتۇرلى ءىس-شارالار وتەتىن بولادى. ولاردىڭ بارىسىندا ايەلدەرمەن, ەر ازاماتتارمەن, جاستارمەن كەزدەسۋلەر ۇيىمداستىرىلىپ, وتباسىن جوسپارلاۋ, ەرتە جۇكتىلىكتىڭ, جىنىستىق جولمەن جۇعاتىن ينفەكتسيالاردىڭ الدىن الۋ تاقىرىپتارى قوزعالادى. اپتالىقتىڭ ءبىر باعىتى رەتىندە مەكتەپ ديرەكتورلارى مەن مەديتسينا قىزمەتكەرلەرىنە ءجاسوسپىرىم قىزدار اراسىنداعى ەرتە جۇكتىلىك ماسەلەسىنە ارنالعان سەمينار ۇيىمداستىرىلادى. پرەزيدەنت باستاماسىمەن «اڭساعان ءسابي» باعدارلاماسى جۇزەگە اسىپ جاتقانىنا 4 جىل بولدى. وسى ارالىقتا قانشاما ايەلگە باعدارلامانىڭ شاراپاتى ءتيىپ, انا بولۋ باقىتى بۇيىردى. باعدارلاما شەڭبەرىندە بيىل شىمكەنتكە 400-دەن استام كۆوتا ءبولىنىپ وتىر. وسى كۆوتانىڭ ارقاسىندا بالا ءسۇيۋدى اڭساپ جۇرگەن ايەلدەر ءسابيلى بولىپ, ەلىمىزدىڭ دەموگرافياسىنىڭ ارتۋىنا ۇلەس قوسىپ جاتىر», دەپ اتاپ ءوتتى.
قالالىق دەنساۋلىق ساقتاۋ باسقارماسى باسشىسىنىڭ ورىنباسارى ساۋلە دۇيسەنباەۆانىڭ ايتۋىنشا, شىمكەنتتە تۋ جاسىنداعى 311 مىڭ ايەل, 493 مىڭ بالا بار. ۇرپاق سۇيگىسى كەلەتىن وتباسى ماسەلەسى قاشان دا قوعامنىڭ وزەكتى پروبلەماسى ەكەنىن ايتقان مامان بولاشاق اكە مەن انانىڭ دەنساۋلىعىن ويلاۋ ماقساتىندا قالادا 9 جاستار دەنساۋلىعى ورتالىعى قۇرىلعانىن تىلگە تيەك ەتتى. بيىل ءى توقساندا وسى ورتالىقتارعا 18 مىڭنان اسا جاس جۇگىنگەن.
اپتالىق اياسىندا ەمحانا, جاستار دەنسالىعى ورتالىقتارىندا فلەشموبتار, «اشىق ەسىك كۇندەرى» وتكىزىلەدى. مەديتسينا قىزمەتكەرلەرى جىنىستىق جولمەن جۇعاتىن ينفەكتسيالىق اۋرۋلار, قاتەرلى جاتىر ىسىگىنە الىپ كەلەتىن ادام ۆيرۋسى پاپيللوماسى تۋرالى قاجەتتى ماعلۇماتتار بەرەدى. وسى ورايدا دەنساۋلىق ساقتاۋ باسقارماسى تۇرعىنداردى اپتالىق كەزىندە بارىنشا بەلسەندى بولۋعا شاقىرادى.
قالالىق دەنساۋلىق ساقتاۋ باسقارماسىنىڭ شتاتتان تىس باس اكۋشەر-گينەكولوگى گۇلبانۋ جۇماعاليقىزى اپتالىق شەڭبەرىندە ايتۋ ۇيات بولىپ سانالاتىن تاقىرىپتار اشىق تۇسىندىرىلەتىنىن باياندادى. ماماننىڭ مالىمدەۋىنشە, بۇگىندە ايەلدەر اراسىنداعى وبىردا ادام ۆيرۋسى پاپيللوماسى ءبىرىنشى ورىندا تۇر. سونىڭ سالدارىنان جىل سايىن 2 مىڭعا جۋىق ايەل قاتەرلى ىسىكپەن اۋىرىپ, ونىڭ 500-گە جۋىعى كوز جۇمادى ەكەن. سوندىقتان بۇگىنگى تاڭدا مەكتەپتەردە ءجاسوسپىرىم قىزدارعا ادام ۆيرۋسى پاپيللوماسىنا قارسى ۆاكتسينا سالىنىپ جاتىر. بىراق وعان قارسى شىعىپ جاتقان اتا-انالار دا بار. ماماننىڭ پىكىرىنشە, بۇل ماسەلەنىڭ جالعىز شەشىمى – حالىقتى دۇرىس اقپاراتتاندىرىپ, وبىرمەن كۇرەسۋدىڭ ەڭ ءتيىمدى ءادىسى ۆاكتسينا ەكەنىن جان-جاقتى ءتۇسىندىرۋ. باس اكۋشەر-گينەكولوگ مالىمدەگەندەي, قالاعا بولىنگەن 440 كۆوتا ارقىلى بىلتىر 228 ايەل ەكستراكورپورالدى جولمەن جۇكتى بولعان. قولدان ۇرىقتاندىرىلعاندار ىشىندە ءولى بالا تۋعاندار تىركەلمەگەن. سونداي-اق الدىڭعى جىلدارمەن سالىستىرعاندا 14 جاستاعى ءجاسوسپىرىم قىزدار اراسىنداعى ەرتە جۇكتىلىك وقيعالارى ازايعان. دەگەنمەن 16-17 جاستاعى قىزدار ىشىندە ەرتە جۇكتى بولىپ قالىپ جاتقاندار كورسەتكىشى ءالى دە جوعارى بولىپ تۇر. قالالىق مەديتسينا باسقارماسى الداعى ۋاقىتتا وسى ستاتيستيكانى ازايتۋ باعىتىندا جۇمىستى جانداندىراتىن بولادى. اپتالىق كەزىندە جاسوسپىرىمدەر, اتا-انالار قالالىق باس رەپرودۋكتولوگ پەن باس پەدياتردان تەگىن كەڭەس الا الادى.
شىمكەنت
