ورتالىق ازيا ەلدەرى مەن قىتاي ءبىلىم سالاسىنداعى بايلانىستى بەكەمدەۋگە نيەتتى. ءۇرىمجى قالاسىندا ۇيىمداستىرىلعان كەڭەسكە قازاقستان, قىرعىزستان, وزبەكستان, تاجىكستان, تۇرىكمەنستان ەلدەرىنىڭ ءبىلىم جانە عىلىم سالاسىنا جاۋاپتى مينيسترلەرى مەن ديپلوماتيالىق وكىلدەرى قاتىستى.
ەلىمىزدىڭ دەلەگاتسياسىن باستاپ بارعان عىلىم جانە جوعارى ءبىلىم ءمينيسترى ساياسات نۇربەك كەڭەستى ماڭىزدى ديالوگ الاڭى رەتىندە باعالاپ, قىتاي تاراپىنا ۇيىمداستىرۋ جۇمىسىنا ريزاشىلىعىن ءبىلدىردى. مينيستر ءبىلىم سالاسىنداعى وڭىرلىك ارىپتەستىكتىڭ تۇراقتى جۇيەگە اينالۋىن قولدايتىنىن ايتىپ, مۇنداي كەزدەسۋلەردى ءداستۇرلى فورماتقا كوشىرۋ قاجەتتىگىن اتاپ ءوتتى.
مينيستر سوزىندە ەلىمىزدىڭ ورتالىق ازيا مەن قىتاي ەلدەرى اراسىنداعى اكادەميالىق بايلانىستى نىعايتۋعا مۇددەلى ەكەنىن ءبىلدىرىپ, ءبىلىم ينتەگراتسياسىن تەرەڭدەتۋ, اكادەميالىق ۇتقىرلىقتى كەڭەيتۋ مەن تسيفرلاندىرۋ باعىتىن قولدايتىنىن جەتكىزدى. سونىمەن قاتار, ول ءبىلىم بەرۋ ساپاسىن ارتتىرۋ, بىرلەسكەن عىلىمي جوبالاردى جۇزەگە اسىرۋ, كادر دايارلاۋدا ورتاق تاسىلدەردى قالىپتاستىرۋ قاجەتتىگىن اتاپ ءوتتى.
كەڭەس بارىسىندا قاتىسۋشىلار بىرلەسكەن جۇمىستىڭ قاعيداتتارىن ايقىندايتىن ارنايى جارعىنى قابىلدادى. سونىمەن قاتار ءبىلىم مەن عىلىم سالاسىنداعى ءوزارا ىقپالداستىققا ورتاق نيەتتى بىلدىرەتىن ءۇرىمجى دەكلاراتسياسىنا قول قويىلدى.
روتاتسيا ءتارتىبى بويىنشا كەلەسى كەڭەستى ۇيىمداستىرۋ مەن توراعالىق ەتۋ مىندەتى قازاقستان رەسپۋبليكاسىنا تاپسىرىلدى.
بۇل كەڭەس ورتالىق ازيا مەن قىتاي اراسىنداعى ءبىلىم قاتىناستارىن جاڭا مازمۇنمەن تولىقتىرىپ, ايماقتاعى مامان دايارلاۋ, اكادەميالىق ساپا جانە تەحنولوگيالىق دامۋ سالالارىنداعى ىقپالداستىقتى تەرەڭدەتۋگە جول اشادى. ۇزاقمەرزىمدى ارىپتەستىككە نەگىزدەلگەن ديالوگ الاڭى – بولاشاقتا ۇلتتىق ءبىلىم جۇيەلەرىنىڭ ورنىقتى دامۋىنا سەرپىن بەرەتىن قادام.
