اگرارلىق وندىرىستەگى وركەندى ىستەر

كەشە ورتالىق كوممۋنيكاتسيالار قىزمەتىندە «قازاگرو» ۇلتتىق باسقارۋشى حولدينگى» اق باسقارما توراعاسىنىڭ مىندەتىن اتقارۋشى داۋرەن ماقاجانوۆ ءباسپاسوز ءماسليحاتىن وتكىزدى. ول اگرارلىق سالادا اتقارىلىپ جاتقان جۇمىستار جونىندە اڭگىمەلەدى. وسىدان التى جىل بۇرىن اۋىل شارۋاشىلىعىن دامىتۋعا ۇلتتىق قوردان 120 ملرد. تەڭگە ءبولىنىپ, ول قارجى وسى جىلى تولىق يگەرىلىپ بولۋى ءتيىس ەدى. د.ماقاجانوۆ كورسەتىلگەن 120 ملرد. تەڭگە اۋىل شارۋاشىلىعىنداعى قانداي ينۆەستيتسيالىق باعدارلامالارعا جۇمسالعاندىعى تۋرالى ايتتى. «بۇگىندە بۇل قارجى تولىعىمەن يگەرىلىپ, جاڭا وندىرىستەردى قۇرۋعا, كاسىپورىنداردى جاڭعىرتۋعا, ەڭبەك ونىمدىلىگىن ارتتىرۋعا باعىتتالدى. اتاپ ايتقاندا, وسى باعىتتا بولىنگەن قارجىعا ميكروكليماتتى جاسايتىن كومپيۋتەرلىك جۇيەمەن 96 گەكتارلىق قازىرگى زامانعى جىلىجاي كەشەندەرى ىسكە قوسىلادى. بۇل جىلىجاي كەشەندەرىندەگى ءوندىرىستىڭ جالپى كولەمى 51 400 توننا قىزاناق پەن قياردى قۇرايدى. مۇنىمەن بىرگە, 4 800 گەكتار اۋماققا تامشىلاتىپ سۋارۋ تەحنولوگيالارى ەنگىزىلدى. بۇل تۇرعىدا ءونىم شىعىمدىلىعى ارتادى جانە سۋ ۇنەمدەلەدى», دەدى ول. بۇعان قوسا, وسىناۋ قارجىعا 109 مىڭ توننا ءسۇت ونىمدەرى وندىرىسىنە ارنالعان ءىرى ءسۇت فەرمالارىنىڭ جەلىسى اشىلىپتى. سونداي-اق, 80 مىڭ توننا ەت وندىرۋگە مۇمكىندىك بەرەتىن قۇس فابريكالارىنىڭ جەلىسى ىسكە قوسىلعان. بۇلارمەن بىرگە, استىق قويمالارىنىڭ قۇرىلىسىنا نازار اۋدارىلىپ, بيداي ساقتايتىن قويمالاردىڭ كولەمى 762 مىڭ تونناعا ارتىپتى. ال سالىنعان كوكونىس ساقتايتىن قويمالاردىڭ كولەمى 123 800 توننانى قۇراعان. بۇيىرتسا, بيىلعى جىلى 50 ملرد. تەڭگە سوماسىنا 75 ينۆەستيتسيالىق جوبانى ىسكە قوسۋ جوسپارلانىپ وتىر ەكەن. «حولدينگتىڭ ينۆەستيتسيالىق جوبالارىن ىسكە اسىرۋ ءسۇت يمپورتىن – 9, قۇس ەتى يمپورتىن – 17, كوكونىس يمپورتىن 4,1 پايىزعا تومەندەتۋگە مۇمكىندىك بەرەدى. كوكونىس ساقتاۋ قويمالارىنىڭ تاپشىلىعىن 62,4 پايىزعا ازايتىپ, 2016 جىلى ءىرى قارا مال ەتىنىڭ ەكسپورتتىق الەۋەتىن قامتاماسىز ەتەدى. جالپى, «قازاگرو» حولدينگىنىڭ ينۆەستيتسيالىق قورجىنىنا 315,2 ملرد. تەڭگە بولاتىن 506 جوبا كىرەدى. بۇل 15,8 مىڭ جۇمىس ورىندارىن قۇرۋعا مۇمكىندىك تۋدىرادى. قازىرگە 371 جوبا ىسكە قوسىلدى. ونىڭ 236 جوباسى, ياعني 70 پايىزدان استامى تولىق قۋاتىمەن جۇمىس ىستەپ تۇر. وتكەن جىلدىڭ قورىتىندىسى بويىنشا, جالپى قۇنى 39,3 ملرد. تەڭگەنى قۇرايتىن 73 جوبا حولدينگ تاراپىنان قارجىلاندىرىلدى. ەندى بيىلعى جىلى 50 ملرد. تەڭگە سوماسىنا 75 ينۆەستيتسيالىق جوبانى ىسكە قوسۋدى جوسپارلاعانبىز», دەدى د.ماقاجانوۆ. نۇرباي ەلمۇراتوۆ, «ەگەمەن قازاقستان».