ۆەلوسيپەدشىلەردى جول پوليتسياسى باستاپ ءجۇردى. سونىمەن بىرگە جەدەل جاردەم قىزمەتى سپورتشىلاردىڭ دەنساۋلىعىن باقىلاپ وتىردى. ۆەلومارافوننىڭ اشىلۋىنا ارنايى قاتىسقان «اتامەكەن» ۇلتتىق كاسىپكەرلەر پالاتاسىنىڭ تورالقا توراعاسى, ەلىمىزدىڭ ۆەلوسپورت فەدەراتسياسىنىڭ پرەزيدەنتى رايىمبەك باتالوۆ كەلەسى جىلدان باستاپ جارىس حالىقارالىق دەڭگەيدە وتەتىنىن مالىمدەدى.
«شىمكەنت–تاشكەنت ۆەلومارافونى مەگاپوليستىڭ جىل سايىن وتەتىن ءداستۇرلى سپورتتىق ءىس-شاراسىنا اينالدى. جارىستى ۇيىمداستىرۋعا قولداۋ كورسەتكەن قالا اكىمدىگىنە, ۆەلوسپورت فەدەراتسياسىنا, دەمەۋشىلەرگە ايتار العىسىم شەكسىز. ۆەلوجارىس تەك سپورت ەمەس, سپورتتىق مادەنيەت, سالاماتتى ءومىر سالتى. وسى سپورت ءتۇرىن وركەندەتىپ, ناسيحاتتاۋ ارقىلى حالىقتىڭ دەنساۋلىعىن نىعايتامىز, جاستاردىڭ ۆەلو- سپورتقا قىزىعۋشىلىعىن ارتتىرامىز. بۇگىنگى جارىستان تۇسكەن قاراجاتتىڭ ءبىر بولىگى قايىرىمدىلىق رەتىندە بالالار ۇيىنە اۋدارىلادى», دەدى ر.باتالوۆ.
قالا اكىمىنىڭ ورىنباسارى سارسەن قۇرانبەك تە بۇگىندە مەملەكەت تاراپىنان سپورتتى دامىتۋعا بارىنشا قولداۋ كورسەتىلىپ جاتقانىن اتاپ ءوتتى.
«سونىڭ ناتيجەسىندە حالىقارالىق دەڭگەيدەگى ءتۇرلى جارىستاردا شىمكەنتتىك ورەندەر جۇلدەلى ورىنداردان كورىنىپ ءجۇر. وليمپيا ويىندارىنا قاتىساتىن ۇلتتىق قۇراما ساپىندا دا مەگاپوليس سپورتشىلارى جەتەرلىك. جالپى, شىمكەنتتە ءارتۇرلى دارەجەدەگى سپورتتىق بايگەلەر جۇيەلى تۇردە ۇيىمداستىرىلىپ تۇرادى. شاھاردا كوپتەگەن سپورتتىق ۇيىرمە اشىلعان. وندا جۇزدەگەن بالا ساباقتان تىس ۋاقىتتا سپورتپەن شۇعىلدانىپ, بولاشاق چەمپيون بولۋعا تالپىنادى. مۇنىڭ ءبارى مەگاپوليستىڭ سپورتتىق الەۋەتىنىڭ جوعارى ەكەنىن بايقاتادى», دەدى س.قۇرانبەك.
ءىسساپار بارىسىندا ر.باتالوۆ ەلىمىزدىڭ جەڭىل اتلەتيكا فەدەراتسياسىنىڭ ۆيتسە-پرەزيدەنتى ولگا رىپاكوۆامەن بىرگە قالا اكىمى عابيت سىزدىقبەكوۆپەن كەزدەسىپ, مەگاپوليستە ۆەلوسپورت پەن جەڭىل اتلەتيكا سپورتىن دامىتۋ جونىندە كەڭەستى. سونداي-اق الەمدىك «Gran Fondo» شوسسەلىك ۆەلوسايىسىن شىمكەنت قالاسىندا وتكىزۋ مۇمكىندىگىن سارالادى. بۇل جارىسقا شاھاردىڭ ينفراقۇرىلىمى تولىق سايكەس كەلەدى. شىمكەنت – حالىقارالىق سايىستاردى ۇيىمداستىرۋدا تاجىريبەسى بار قالا. سونىڭ ءبىر ايعاعى – بىلتىر وتكەن الەمدىك شاحمات سايىسى. سول سەكىلدى حالىقارالىق مارافون مەن ۆەلوجارىستاردى شىمكەنتتە ۇيىمداستىرۋعا دا تولىق مۇمكىندىك بار.
شىمكەنت
