وڭىرلىك ۆەتەريناريا باسقارماسىنىڭ باسشىسى اسىلتاس تىلەۋباەۆتىڭ ايتۋىنشا, قازىرگى ۋاقىتتا وبلىستا 178 مىڭ باس ءىرى قارا مال تەكسەرىلىپ, ولاردىڭ 0,8%-ى برۋتسەللەز اۋرۋىن جۇقتىرعانى انىقتالعان. بۇل – 1,5 مىڭعا جۋىق مال اۋرۋعا شالدىققانىن بىلدىرەدى.
- جالپى ەپيزووتيالىق جاعداي تۇراقتى دەپ باعالايمىز. 131 ءسىبىر جاراسى مەن 239 مال قورىمىنا مونيتورينگ جۇرگىزىلۋدە. ولاردىڭ تەك 33-ءى تيپتىك جانە ۆەتەريناريالىق-سانيتاريالىق تالاپتارعا سايكەس كەلەدى, قالعان 206-سى ەسكىرگەن شۇڭقىرلار. اۋىل شارۋاشىلىعى مينيسترلىگىنىڭ جول كارتاسىن ىسكە اسىرۋ اياسىندا جاڭا تيپتىك مال قورىمدارىن سالۋ, ينسينەراتورلار ساتىپ الۋ جانە مالدى سانيتارلىق سويۋ ءۇشىن ينفراقۇرىلىمدى دامىتۋ جوسپارلانعان,-دەيدى باسقارما باسشىسى.
باسقارما ماماندارى رەسەي فەدەراتسياسى التاي ولكەسىنىڭ بيولوگيالىق قالدىقتاردى جويۋ تاجىريبەسىن زەرتتەپ كورگەن. ناتيجەسىندە كومىرمەن جۇمىس ىستەيتىن كرەماتورلاردى ءبىزدىڭ وبلىستا قولدانۋدى ۇسىنىپ وتىر. الگىندەي ءبىر قوندىرعى ءىرى قارا مالدىڭ ۇشاسىن 5 ساعات ىشىندە جويادى جانە وعان جۇمسالاتىن شىعىننىڭ مولشەرى 3 مىڭ تەڭگەنى قۇرايدى. ال قولدانىستاعى ينسينەراتورلاردا ءبىر مالدى جويۋدىڭ قۇنى - 15 مىڭ تەڭگە.
پاۆلودار وبلىسى
