ادەتتە جىلىك سىندىرۋ ويىنى سوعىم سويعان كەزدە باستالادى. سوڭعى جىلدارى اس پەن تويدا دا وتكىزىلە باستادى. ءوڭىردىڭ كوپتەگەن اۋىلدارىندا كادىمگىدەي جارىس وتكىزىلۋدە. تاياۋدا زەرەندى اۋدانىندا وتكەن «جىلىك سىندىرۋ» جارىسىنا الپىستان استام بىلەكتى ازامات قاتىسقان.
كوپشىلىك جارىسقا ۇسىنىلاتىن جىلىكتى ارنايى دايىندايدى. ءبىر ايتا كەتەرلىگى, جىلىكتى سىندىرۋ ءۇشىن جالعىز كۇش جەتىمسىز, ءتاسىلىن دە ءبىلۋ كەرەك. سىندىرعان جىگىتتىڭ ايبىنى اسىپ, ابىرويى اسقاقتايدى. سىيعا جاباعى جەتەكتەپ, قوي بەرەتىندەر دە بار. ىنتالاندىرۋ ءۇشىن. كەي جەردە جىلىك تەز سىنىپ كەتپەۋ ءۇشىن تىك قويىپ پىسىرەدى. ەندى بىرەۋلەر تەسىپ, جىلىك مايىن اعىزىپ جىبەرەدى. مۇنداي جىلىك ۇزاق ۋاقىت سىنبايدى. ادەتتە قولدىڭ جىلىگى تەز سىنادى. كەمىك باسى ۇلكەن, جۋان ساننىڭ جىلىگى وڭايلىقپەن سىنا قويمايدى.
بىرلەستىك اۋىلىندا وتكەن جارىسقا 12 جىلىك ۇسىنىلدى. باق سىناۋعا كەلگەندەر جاس ەرەكشەلىگىنە قاراي ءۇش توپقا ءبولىندى.
– جاس سەكسەننەن استى, – دەيدى اۋىل تۇرعىنى ساپارباي جۇكەن ۇلى, – بالا كەزىمىزدەن بەرى كورىپ كەلەمىز. ەرتەرەكتە ورامال وراۋشى ەدىك, قازىر ءاپايتوس جىگىتتەر جالاڭ قولمەن-اق سىندىرادى. دۇبىرگە ەلەڭدەيتىن تۇلپارعا ۇقساپ مەن دە قاراسىنىن كوبەيتىپ جاتىرمىن.
ايتپاقشى, جىلىكتى دايىنداۋدىڭ قىر-سىرى كوپ. تاباق تارتىلعاننان كەيىن ەپسەكتى جاستاردىڭ بىرەۋىنە ۇستاتىلادى. ول ابدەن تازالاپ ءمۇجىپ دايىنداۋى كەرەك. ونىڭ دا ەڭبەگى ەسكەرىلەدى.
حالقىمىزبەن بىرگە جاساسىپ كەلە جاتقان قادىرلى ءداستۇردىڭ جوعالماعانى جاقسى ەمەس پە؟!
اقمولا وبلىسى,
زەرەندى اۋدانى.
