ۇلتتىق بانك باسشىسى تيمۋر سۇلەيمەنوۆتىڭ ايتۋىنشا, تسيفرلىق قارجى سەگمەنتىنىڭ 4 باعىتى ايقىندالدى: تسيفرلىق قارجى اكتيۆتەرىن ىسكە قوسۋ جانە ءداستۇرلى قۇرالداردى توكەندەۋ, كريپتوۆاليۋتالاردىڭ رەتتەلەتىن اينالىمىن كەڭەيتۋ, ۇلتتىق ۆاليۋتامەن قامتاماسىز ەتىلگەن ستەيبلكوين شىعارۋ, ەكسپەريمەنتتىك قۇقىقتىق رەجىمدەردى قولدانۋ.
«Bereke Bank» تسيفرلىق قارجى اكتيۆتەرى باعىتىنىڭ جەتەكشىسى ۆياچەسلاۆ انۋفريەۆتىڭ ايتۋىنشا, 2025–2026 جىلدارى وتاندىق تسيفرلىق قارجى اكتيۆتەرى نارىعىنىڭ كولەمى 2 ملرد دوللاردان اسادى.
ساراپشىلاردىڭ ايتۋىنشا, كريپتوۆاليۋتالاردى ساتىپ الۋ مەن ساتۋعا سۇرانىس ءوسىپ جاتىر. ادامدار شەتەلدىك جانە رەتتەلمەيتىن پلاتفورمالاردى ءجيى پايدالانادى. مۇنداي وپەراتسيالاردىڭ قاۋىپسىزدىگى مەن اشىقتىعىن قامتاماسىز ەتۋ ءۇشىن تەك احقو ەمەس, بۇكىل ەل اۋماعىندا جۇمىس ىستەيتىن زاڭدى cryptocurren cy الماسۋ پلاتفورماسى قۇرىلىپ, ليتسەنزياسى بار ۇلتتىق پروۆايدەردى ەنگىزۋ جوسپارلانىپ وتىر. ول بەلگىلەنگەن زاڭنامالىق تالاپتار نەگىزىندە كريپتوۆاليۋتالاردى ايىرباستاۋعا مۇمكىندىك بەرەدى. بۇل وپەراتسيالاردى «كولەڭكەدەن» شىعارۋعا, تۇتىنۋشىلاردى قورعاۋعا جانە نارىقتى جاقسى باقىلاۋعا كومەكتەسەدى. ءتيىستى زاڭنامالىق تۇزەتۋلەر ءماجىلىس قاراۋىندا جاتقان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قارجى نارىعىن دامىتۋ جانە قارجى قىزمەتتەرىن تۇتىنۋشىلاردىڭ قۇقىقتارىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا كوزدەلگەن.
ۇلتتىق بلوكچەين قاۋىمداستىعىنىڭ باسشىسى داۋرەن قاراشەۆتىڭ ايتۋىنشا, 2023 جىلى ولاردىڭ ەلدەگى زاڭدى اينالىم كولەمى نەبارى 350 ملن دوللار بولسا, 2024 جىلدىڭ سوڭىندا 4,1 ملرد دوللاردان اسقان.
«ولاردىڭ قايسىسى زاڭدى, قايسىسى كولەڭكەدە جۇمىس ىستەپ جۇرگەنى كۇنى بۇگىنگە دەيىن زەرتتەلگەن جوق. زاڭدى اينالىمدى قامتاماسىز ەتكىمىز كەلسە, ماسەلەنى نارىققا مونيتورينگ جاساۋدان باستاۋ كەرەك. ءبىرىنشى كەزەكتە نارىقتاعى ويىنشىلار بيزنەسىنىڭ قۇقىقتىق سيپاتىنا نازار اۋدارۋ ماڭىزدى. بۇل باعىتتى يندۋستريانىڭ ەڭ باستى سەگمەنتى رەتىندە دامىتا الساق قالعان ماسەلەلەر جۇيە-جۇيەمەن رەتتتەلەدى. قازىر اشىق اينالىمداعى اكتيۆتەردىڭ اينالىمى احقو بازاسىنداعى ليتسەنزيالانعان بيرجالار ارقىلى انىقتالادى. رەسمي مالىمەت سول كورسەتكىش بويىنشا تۇزىلەدى. مەملەكەت باسشىسى بۇل ءتاسىلدى وزگەرتۋ قاجەتتىگىن ايتتى. اڭگىمە تسيفرلىق اكتيۆتەردىڭ اناعۇرلىم كەڭ زاڭدى اينالىمىنا جاعداي جاساۋ, ياعني قۇقىقتىق الاڭدا جۇمىس ىستەيتىن كومپانيالار پۋلىن كەڭەيتۋ تۋرالى بولىپ وتىر», دەيدى د. قاراشەۆ.
ونىڭ ايتۋىنشا, ۇلتتىق بانك ۇسىنىستارى الاياقتىق پەن زاڭسىز پلاتفورمالار قىزمەتىنە بايلانىستى تاۋەكەلدەردى بارىنشا ازايتىپ, پايدالانۋشىلاردىڭ نارىققا سەنىمىن ارتتىرادى, ينۆەستيتسيالىق كليماتتى جاقسارتادى. «سالا دامۋى ءۇشىن بارلىق ويىنشىنىڭ بەلگىلەنگەن ەرەجەلەردى ۇستانۋى ماڭىزدى. رەتتەۋدىڭ بىرىڭعاي ستاندارتتارى باسەكەلەستىككە تەڭ جاعداي جاسايدى جانە نارىقتىڭ تەڭگەرىمىن بۇزباي تۇراقتى ءوسۋىن قامتاماسىز ەتەدى» دەيدى.
قارجى تالداۋشىسى ارمان بەيسەمباەۆتىڭ ايتۋىنشا, تسيفرلىق اكتيۆتەر تۋرالى ايتقاندا, ونىڭ ارتىقشىلىعى مەن كەمشىلىگىن ناقتى ولشەۋ قاجەت.
«ەكونوميكاسى دامىعان ەلدەردىڭ ءوزى مۇنى بيرجالىق اكتيۆ, قۇندى قاعاز نەمەسە تولەم قۇرالى رەتىندە مويىنداۋعا اسىقپاي وتىر. سەبەبى ونىڭ باعامى تۋرالى كوزقاراس ناقتىلانباعان. دەگەنمەن ءبىزدىڭ قارجى سەگمەنتى بۇل ۇدەرىسكە دايىن. ۇكىمەت پەن ۇلتتىق بانك تسيفرلىق اكتيۆتەر نارىعىن دامىتۋعا دەن قويدى. زاڭ تۇزەلىپ جاتىر», دەيدى ا.بەيسەمباەۆ.
الماتى
