جالپى, كاسىپورىن ەلدەگى بىرەگەي قىزمەت كورسەتەتىن ورىن ەكەنىن تىڭعىلىقتى ىسىمەن جانە ءمىنسىز ساپاسىمەن دالەلدەپ كەلەدى. كاسىپورىن جۇك جانە توڭازىتقىش ۆاگوندارعا كۇردەلى جوندەۋ جۇمىستارىن جۇرگىزۋمەن اينالىسادى. ماتەريالدىق-تەحنيكالىق بازاسى زامان تالابىنا تولىق جاۋاپ بەرەدى. بىرنەشە تسەح كومپيۋتەرلىك تەحنيكا, دياگنوستيكالىق قۇرىلعىلارمەن قامتاماسىز ەتىلگەن. جوندەۋ بازاسىندا ۆاگونداردىڭ اقاۋىن انىقتاۋ, تەتىكتەرىن جاڭارتۋ ءۇشىن الدىمەن دياگنوستيكادان وتكىزىپ, انىقتاپ الادى. ودان سوڭ ۆاگون قۇراستىرۋ تسەحىندا تەجەگىش, ۆاگون قابىرعالارى مەن بىلىكتەر, قاقپاعى جوندەلەدى.
ەڭبەك – اۋىر, ەڭبەكاقى – جوعارى
– مەحانيكالىق تسەحتا ۆاگونداردى جوندەۋگە قاجەتتى قوسالقى بولشەكتەر دايىندالادى, – دەيدى سەرىكتەستىكتىڭ باس ينجەنەرى دارحان بالتاباي, – بىزدەگى ستانوكتاردىڭ دەنى رەسەيدەن اكەلىنگەن. ارينە, ونداي قۇرىلعىلار قىتايدا دا بار. بۇل ارادا ايتا كەتەتىن ءبىر جاي – قىتايدان جەتكىزىلگەن قۇرىلعىلار ىستەن شىقسا, مامانداردى شاقىرۋ ۇزاق ۋاقىت الادى. ال ءوندىرىس قاراپ تۇرماۋعا ءتيىستى. تاپسىرىس العاننان كەيىن ۋاقىتىندا اياقتاۋعا جاۋاپتىمىز.
ءبىر جاقسىسى, ماماندار جەتكىلىكتى. ورتاشا ايلىق 400 مىڭ تەڭگە كولەمىندە.
– تسەحتا جۇمىس ءبىرشاما اۋىر, ەسەسىنە تابىس كوپ. تسەحتىڭ ءىشى ايناداي جارقىراپ تۇر. قىستا جىلى, جازدا سالقىن. ەڭبەك قاۋىپسىزدىگىنە ەرەكشە ءمان بەرىلەدى, – دەيدى تسەحتىڭ اعا شەبەرى يۋري اگافونوۆ, – توقسان جىلدىق تاريحى بار كاسىپورىندا وزىندىك ەڭبەك ءداستۇرى قالىپتاسقان. اعا بۋىن جۇمىسقا ىنتالى جاستاردى باۋلىپ, بار بىلگەنىن ۇيرەتىپ, قاتارعا قوسۋعا تىرىسادى. جاس تالاپكەرلەر الدىنداعى ۇلگى بولار وزاتتار قاتارىنا قوسىلۋعا تالپىنادى.
اكە جولىن جالعاعان ۇلان
بەسىنشى رازريادتى سلەسار باقىتجان ومىرتاەۆ وزاتتار قاتارىندا. اكەسى دە وسى دەپودا جۇمىس ىستەپتى.
– جوعارى وقۋ ورنىنىڭ زاڭ فاكۋلتەتىن بىتىرگەنىممەن, اكە جولىن جالعاستىرعىم كەلدى. كاسىپورىن باسشىلارى الەۋمەتتىك-تۇرمىستىق جاعدايىمىزعا قاراسىپ تۇرادى. ەڭبەكاقى جەتكىلىكتى. كاسىپورىننىڭ اسحاناسى, مەديتسينالىق پۋنكتى, سپورت زالى كوڭىلدەن شىعادى. جۇمىس كيىمدەرىن جۋاتىن ورىن دا بار.
ۇستا-شارۋاشىلىق تسەحىندا نەگىزىنەن ۆاگوننىڭ ەدەنىنە قاجەتتى جابدىقتار دايىندالادى ەكەن. جابىق ۆاگونداردى قاپتايتىن تاقتايشالار دا سۇرگىلەنىپ جاتىر. تسەح كاسىپورىننىڭ وزگە دە قاجەتتىلىگىنە وراي اعاش بۇيىمداردى ويماقتاي ەتىپ وڭدەپ شىعارادى.
مەكەمە مەرزىمگە ءمان بەرەدى...
كاسىپورىننىڭ باس ينجەنەرى دارحان يگىلىك ۇلىنىڭ ايتۋىنشا, دەپودا جوندەلگەن ۆاگوندار بىردەن جول بويىنا شىعىپ كەتپەيدى, مۇقيات سىناقتان وتكىزىلەدى. تالاپ وتە كۇشتى. 2005 جىلى دەپو حالىقارالىق جانە مەملەكەتتىك ستاندارتتارعا ساي كەلەتىن جۇمىس جۇيەسى ءۇشىن حالىقارالىق سەرتيفيكاتقا يە بولىپتى. بۇگىندە سەرىكتەستىكتە 323 ادام جۇمىس ىستەيدى. ۇجىمدا جاستار كوپ. سەرىكتەستىكتىڭ باس ديرەكتورى جەڭىس مۇحاممەدعاليەۆ كاسىپورىنداعى جۇمىسشىلاردىڭ كاسىبي شەبەرلىگىن ارتتىرۋعا ەرەكشە ءمان بەرەدى. جىل سايىن وزات جۇمىسشىلاردى ىنتالاندىرۋ داستۇرگە اينالعان. «قۇرمەتتى تەمىرجولشى» بەلگىسىمەن ماراپاتتالعاندار دا از ەمەس.
ساپاعا قول جەتكىزگەندىكتەن دە باسەكەلەستىك سىنىنا توتەپ بەرىپ, بەرەكە ءۇيىرىلىپ تۇر-اۋ.
اقمولا وبلىسى
