استانا قالاسىنىڭ تۇرعىنى كۇيەۋىن قاتىگەزدىكپەن ءولتىردى

استانا. 6 مامىر. ەلوردا تۇرعىنى كۇيەۋىن اسقان ز ۇلىمدىقپەن ولتىرگەن. بۇگىندە اۋداندىق پروكۋراتۋرا 67 جاستاعى ەر ادامنىڭ ولىمىنە قاتىستى قىلمىستىق ءىستى ءوز باقىلاۋىنا العان. بۇل تۋرالى استانانىڭ الماتى اۋداندىق پروكۋراتۋراسىنا سىلتەمە جاساپ, tengrinews.kz حابارلادى. وسى جىلدىڭ ناۋرىز ايىندا پوليتسياعا استانا قالاسىنىڭ تۇرعىنى كەلىپ, كۇيەۋىنىڭ ۇشتى-كۇيلى جوعالىپ كەتكەنىن ايتىپ, شاعىمدانعان. ايەلدىڭ سوزىنە قاراعاندا, كۇيەۋى ۇيىنەن شىعىپ كەتكەن كۇيى مۇلدە ورالماعان. كەيىن پوليتسيا قىزمەتكەرلەرى ادام ولىمىنە كۇدىكتى رەتىندە 48 جاستاعى ايەلدىڭ ءوزىن – جوعالىپ كەتكەن ەر ادامنىڭ جۇبايىن قولعا تۇسىرەدى. تەرگەۋ بارىسىندا ەرلى-زايىپتىلاردىڭ اراسىندا ۇرىس-كەرىس بولعانى, داۋدىڭ سوڭى جانجالعا ۇلاسقانى بەلگىلى بولدى. الماتى اۋداندىق پروكۋراتۋراسى تاراتقان مالىمەتتەرگە سۇيەنسەك, توبەلەس كەزىندە ايەلى كۇيەۋىن تۇنشىقتىرىپ ولتىرگەن. ال كەلەسى كۇنى ايەلى كۇيەۋىنىڭ ءولى دەنەسىنەن قۇتىلماق بولادى. «ءمايىتتى تۇتاستاي پاتەردەن كوتەرىپ الىپ شىعا الماسىن, ونىڭ ۇستىنە ءۇيدىڭ كىرەبەرىسىندە بەينەباقىلاۋ كامەراسى ورناتىلعانىن بىلگەن ايىپتالۋشى كۇيەۋىنىڭ دەنەسىن بولشەكتەپ تاستاۋدى دۇرىس دەپ شەشكەن. مارقۇمنىڭ دەنەسىنىڭ بولىكتەرىن تانۋ مۇمكىن بولماس ءۇشىن ونىڭ باسىن پىسىرگەن. وسىدان كەيىن بارلىعىن سومكەگە سالىپ, استراحان تاس جولى بويىنداعى مولادا جەرلەنگەن كۇيەۋىنىڭ اناسىنىڭ جانىنا كومىپ تاستاعان», – دەيدى قاندى وقيعانى ەگجەي-تەگجەي بايانداپ بەرگەن الماتى اۋداندىق پروكۋراتۋراسى تەرگەۋ ءبولىمىنىڭ باستىعى ارسەن بەگالين. ءبولىم باستىعىنىڭ سوزىنە قاراعاندا, اتالعان قىلمىستى تەزىرەك اشۋ ماقساتىندا قىلمىستىق ىزدەستىرۋ ورگاندارىنا ادام ءولىمىنىڭ باستى نۇسقالارىن ساراپتاۋ جۇكتەلگەن. قۇزىرلى ورگان تاراتقان حابارلامادا, كۇدىكتى ايەلدىڭ الدىمەن كۇيەۋىن ولتىرگەنىن مويىنداعانى, كەيىننەن ول جاۋابىنان باس تارتقانى دا ايتىلادى. استانا قالاسىنىڭ الماتى اۋداندىق №2 تەرگەۋ سوتى سۋدياسىنىڭ قاۋلىسىمەن 48 جاستاعى ايەل قاماۋعا الىندى. قازىرگى تاڭدا كۇدىكتىگە قاتىستى پسيحولوگيا-پسيحياتريالىق ساراپتاما تاعايىندالدى. ساراپتاما قورىتىندىسى دايىن بولعاننان كەيىن ءىس سوتقا جىبەرىلەدى. ەستەرىڭىزگە سالا كەتەيىك, بۇل استانا قالاسىندا بولعان العاشقى اۋىر قىلمىس ەمەس. وتكەن جىلدىڭ تامىز ايىندا ءدال وسىنداي ايۋاندىقپەن 18 جاستاعى قۇربىلارىن ولتىرگەن ءۇش بويجەتكەن سوتتالعان بولاتىن. ەلامان قوڭىر. دەرەك: tengrinews.kz. سۋرەت: rambler.ru.