اشىلۋ ءراسىمى تاقىرىپتىق كورمەنى ارالاۋدان جانە قاتىسۋشى كوماندالاردىڭ سالتاناتتى شەرۋىنەن باستالدى. مەملەكەتتىك گيمن ورىندالىپ, قاتىسۋشىلار ۇلى وتان سوعىسىندا قازا تاپقانداردى ءبىر مينۋت ۇنسىزدىكپەن ەسكە الدى. ەرەكشە رۋحاني اسەر قالدىرعان ءسات – قازاقستاننىڭ حالىق ءارتىسى دوسحان جولجاقسىنوۆتىڭ بەرگەن باتاسى بولدى.
الماتى وبلىسىنىڭ اكىمى مارات سۇلتانعازيەۆ ءوز قۇتتىقتاۋ سوزىندە مارافوننىڭ ءمان-ماڭىزىن اتاپ ءوتتى:
« ۇلى دالا جورىعى – بۇل جاي عانا سپورتتىق جارىس ەمەس. بۇل – ۇرپاقتار اراسىنداعى رۋحاني ساباقتاستىقتى جالعاپ, تاريحي جادىمىز بەن ۇلتتىق رۋحتى جاڭعىرتاتىن ماڭىزدى الاڭ. ءبىز وسى مارافون ارقىلى اتا-بابالارىمىزدىڭ باي مادەنيەتىن دارىپتەپ, وڭىرارالىق جانە حالىقارالىق ىنتىماقتاستىقتى نىعايتامىز».
«Amanat» پارتياسىنىڭ اتقارۋشى حاتشىسى داۋلەت كارىبەك جوبانىڭ مەملەكەت باسشىسى قاسىم-جومارت توقاەۆتىڭ باستامالارىنا ساي كەلەتىنىن اتاپ ءوتتى:
«ۇلتتىق سپورت تۇرلەرى مەن مادەني مۇرانى دامىتۋ – مەملەكەتتىك ساياساتتىڭ باسىم باعىتتارىنىڭ ءبىرى. “ ۇلى دالا جورىعى” – قازاق وركەنيەتىنىڭ بايلىعى مەن قوناقجاي ءداستۇرىن الەمگە پاش ەتەتىن بىرەگەي جوبا».
سەناتور, «JORYQ» فەدەراتسياسىنىڭ قۇرمەتتى پرەزيدەنتى دارحان قىدىرالى جوبانىڭ تەرەڭ تاريحي ماڭىزىن ايرىقشا اتاپ ءوتتى:
« ۇلى دالا جورىعى – بۇل جاي عانا بايگە ەمەس, اتا-بابالار ءجۇرىپ وتكەن جولمەن قايتا ساپار شەگەتىن تاريحي ەكسپەديتسيا. بۇل – كوشپەلى وركەنيەتتىڭ رۋحىن سەزىنۋ, ۋاقىتتار اراسىنداعى بايلانىستى نىعايتۋ جانە ۇلتتىق مۇرانى كەلەر ۇرپاققا اماناتتاۋ».
«JORYQ» فەدەراتسياسىنىڭ پرەزيدەنتى باقىتجان تۇرلىبەكوۆ قاتىسۋشىلارعا ساتتىلىك تىلەدى.
بيىلعى مارافونعا 19 كوماندا قاتىسۋدا: ونىڭ 13-ءى – قازاقستان وڭىرلەرىنەن, ال 6 كوماندا شەتەلدەردەن كەلگەن. ولار – وڭتۇستىك افريكا رەسپۋبليكاسى, ۆەنگريا, يران, قىرعىزستان جانە تاتارستان (رف). قاتىسۋشىلارعا بەس كۇن ىشىندە 500 شاقىرىمدىق دالا جولىن ەڭسەرۋ مىندەتى تۇر.
