جۇرتشىلىقتىڭ كوز الدىندا 500-دەن استام درون كوككە كوتەرىلىپ, جارىق پەن انيماتسيا ارقىلى ەرلىك پەن جانقيارلىقتى, ەستە قالعان ەرلىككە تولى ساتتەردى باياندادى. سونداي-اق, «الماتى» تەلەارناسىنىڭ YouTube-ارناسىندا تىكەلەي ەفير ۇيىمداستىرىلدى.
شوۋدىڭ اشىلۋ ساتىندە «80 • 1941–1945» دەگەن جازۋى بار جۇلدىز پايدا بولدى – بۇل ەرلىكتىڭ سيمۆولى ءارى ۇلى جەڭىس جىلدارىن ەسكە سالاتىن بەلگى. ودان كەيىن اسپاندا جاۋىنگەر كاسكاسى مەن قىزىل قالامپىرلار بەينەلەنىپ, سوعىستا قازا تاپقاندارعا قۇرمەت كورسەتىلدى. ەڭ اسەرلى كورىنىستىڭ ءبىرى – سوعىستان ورالماعان ساربازداردىڭ رۋحىن بەينەلەيتىن ۇشىپ بارا جاتقان تىرنالار كومپوزيتسياسى بولدى.
شوۋدىڭ ماڭىزدى بولىگى قازاقستاندىق قاھارماندارعا ارنالدى. اتى اڭىزعا اينالعان مانشۇك مامەتوۆا مەن ءاليا مولداعۇلوۆانىڭ كەزەگى كەلگەندە, مانشۇك – پۋلەمەتپەن, ءاليا – مىلتىقپەن شىقتى. سونداي-اق, جاۋىنگەرلىك ۇشاقپەن تۇرعان ايگىلى ۇشقىش تالعات بيگەلدينوۆتىڭ بەينەسى دە كورەرمەندى اسەرگە بولەدى. حالىق قاھارمانى, قولباسشى ءارى جازۋشى باۋىرجان مومىش ۇلىنىڭ تۇلعاسى باتىرلىق پەن قايسارلىقتىڭ سيمۆولى رەتىندە جارىققا شىقتى.
بۇدان وزگە كورىنىستەردە جەڭىس تۋىنىڭ كوتەرىلۋ ءساتى, جۇلدىز پىشىنىندەگى ماڭگىلىك الاۋ مەن «ەشكىم دە, ەشقاشان دا ۇمىتىلمايدى!» دەگەن جازۋ بەينەلەندى. شوۋدىڭ اقتىق ساتىندە قازاقى ويۋمەن كومكەرىلگەن كومپوزيتسيا مەن جارقىراعان «جەڭىس كۇنى قۇتتى بولسىن!» دەگەن جازۋ كورەرمەندەردى ەرەكشە اسەرگە بولەدى.
- بۇل جارىق شوۋ – ەسكە الۋ شاراسى عانا ەمەس, تاريحي مۇرانى جاڭا بۋىنعا جەتكىزۋدىڭ جاڭا ءتاسىلى. ول تاريحتى ۇمىتپاي, وعان ماقتانىشپەن قاراۋ كەرەكتىگىن ەسكە سالدى, - دەيدى ۇيىمداستىرۋشىلار.
كورەرمەندەرگە اباي الاڭىندا, «قازاقستان» قوناقۇيى جانىندا, Caspian University ماڭىندا جانە اباي داڭعىلى بويىندا ارناۋلى الاڭدار دايارلاندى. شوۋ كەزىندە قالا ورتالىعىنداعى كولىك قوزعالىسى ۋاقىتشا شەكتەلدى.
الماتىداعى دروندار شوۋى جەڭىس كۇنىن اتاپ ءوتۋدىڭ جارقىن ءارى ەستە قالارلىق ساتىنە اينالدى. شوۋدىڭ اسەرىن كۇشەيتكەن اسكەري جىلدارداعى اندەر مەن پاتريوتتىق اۋەندەر ءار كورىنىستىڭ ەموتسيالىق قۋاتىن ارتتىرىپ, كورەرمەندەردىڭ كوكەيىنە ماقتانىش سەزىمىن ۇيالاتتى.
