فوتو: gov.kz
ماكسيمالدى قامتۋ جانە ءتۇرلى فورماتتاعى دەمالىس
بيىل دەمالىس پەن بوس ۋاقىتتى ءتيىمدى ۇيلەستىرۋ شارالارىنا 79 480 بالانى قامتۋ جوسپارلانعان. بۇل – وبلىستاعى وقۋشىلاردىڭ جالپى سانىنىڭ 83,4 پايىزى. بۇدان بولەك, مەكتەپ وقۋشىلارىنىڭ 100 پايىزعا جۋىعى ءتۇرلى ءىس-شارالارعا – شىعارماشىلىق, زياتكەرلىك, سپورتتىق, پاتريوتتىق جانە باسقا دا باعىتتار بويىنشا تارتىلادى.
وبلىس بويىنشا 267 مەكتەپ جانىنداعى جانە بەيىندى لاگەر جۇمىس ىستەيدى. ولار جالپى ءبىلىم بەرەتىن مەكتەپتەردىڭ, قوسىمشا ءبىلىم بەرۋ ۇيىمدارىنىڭ جانە بالالار-جاسوسپىرىمدەر سپورت مەكتەپتەرىنىڭ بازاسىندا ۇيىمداستىرىلادى. ونىڭ ىشىندە 110 لاگەردە 9 مىڭنان استام بالانى ىستىق تاماقپەن قامتۋ قاراستىرىلعان. سونىمەن قاتار بالالار ۇيلەرى, كىتاپحانالار, اۋلا كلۋبتارى مەن ۇيىرمەلەر دە بەلسەندى تۇردە جۇمىلدىرىلادى.
ستاتسيونارلىق لاگەرلەر: الەۋمەتتىك وسال توپتاعى بالالارعا باسىمدىق بەرىلەدى
جاز مەزگىلىندە 11 ستاتسيونارلىق ساۋىقتىرۋ لاگەرى جۇمىس ىستەيدى دەپ جوسپارلانىپ وتىر. ونىڭ ىشىندە 8-ءى – مەملەكەتتىك, 3-ءى – جەكەمەنشىك لاگەر. جالپى 5172 بالا لاگەردە دەمالماق. ونىڭ ىشىندە 4713-ءى – الەۋمەتتىك وسال ساناتتاعى بالالار. ولار «ۆسەوبۋچ» قورىنىڭ قاراجاتى ەسەبىنەن جولدامامەن قامتىلادى.
قازىرگى ۋاقىتتا لاگەرلەردى بالالاردى قابىلداۋعا دايىنداۋ – باستى نازاردا. بۇل باعىتتا جوندەۋ جۇمىستارى جۇرگىزىلىپ, قاجەتتى جابدىقتار ساتىپ الىنىپ جاتىر. لاگەردەگى قاۋىپسىزدىك بەينەباقىلاۋ, قوعامدىق ءتارتىپ كۇزەتى, سانيتارلىق-ەپيدەميولوگيالىق باقىلاۋ جانە مامانداردى ىرىكتەۋدىڭ قاتاڭ ءتارتىبى ارقىلى قامتاماسىز ەتىلەدى.
ينتەللەكتۋالدىق جانە پاتريوتتىق باعىتتاعى جاڭا جوبالار
2025 جىلى وبلىستا بالالاردىڭ جەكە تۇلعالىق دامۋى مەن قىزىعۋشىلىعىن ارتتىرۋعا باعىتتالعان بىرقاتار جاڭا جوبا جۇزەگە اسىرىلادى:
«اباي جولى» – اباي قۇنانباي ۇلىنىڭ ءومىرى مەن شىعارماشىلىعىنا قاتىستى ورىندار بويىنشا ادەبي-ولكەتانۋ باعىتى;
«JAS AKADEMIK-2025» – سەمەي جانە وسكەمەن قالالارىنىڭ ۋنيۆەرسيتەتتەرىمەن بىرلەسكەن دارىندى بالالارعا ارنالعان اكادەميالىق جازعى مەكتەپ;
«جازعى كاسىبي باعدارلاۋ لاگەرلەرى» – كوللەدجدەر بازاسىندا جۇمىسشى ماماندىقتاردى ناسيحاتتاۋعا ارنالعان;
«جازعى كەمپينگ» – تۋريزم, پاتريوتتىق تاربيە جانە سپورتتىق سايىستار ەلەمەنتتەرىمەن ۇيىمداستىرىلاتىن كوشپەلى قىسقامەرزىمدى دەمالىس باعدارلامالارى.
سونىمەن قاتار ءوڭىردىڭ قالا-اۋداندارىندا جازعى بوس ۋاقىتتى ءتيىمدى ۇيىمداستىرۋعا باعىتتالعان 33 ايماقتىق جوبا ىسكە اسىرىلۋدا.
قاۋىپسىزدىك – باستى باسىمدىق
جازعى كەزەڭدە بالالاردىڭ قاۋىپسىزدىگىنە ەرەكشە ءمان بەرىلەدى. شومىلۋ تەك رەسمي رۇقسات ەتىلگەن ورىنداردا وتەدى, قىزمەتكەرلەر قۇقىق قورعاۋ ورگاندارىنىڭ بازاسى ارقىلى تەكسەرىلەدى, بارلىق سانيتارلىق نورما قاتاڭ ساقتالادى. مەكتەپ جانىنداعى لاگەرلەردە ءىس-شارالار ارنايى بەكىتىلگەن باعدارلامالار مەن ادىستەمەلىك ۇسىنىمدارعا سايكەس وتكىزىلەدى.
2025 جىلعى جازعى ماۋسىمدا بالالاردىڭ قاۋىپسىز ءارى مازمۇندى دەمالىسى ۇيىمداستىرىلادى. لاگەر باعدارلامالارى ءار بالانىڭ الەۋەتىن دامىتۋ جانە اسىرەسە الەۋمەتتىك جاعىنان وسال وتباسىلارعا قولداۋ كورسەتۋگە باعىتتالادى.
جازعى دەمالىستى ۇيىمداستىرۋ ماسەلەسى اباي وبلىسىنىڭ ءبىلىم باسقارماسىنىڭ تۇراقتى باقىلاۋىنا الىنعان.
