سۋرەت: pravda.com.ua
ەكىنشى دۇنيەجۇزىلىك سوعىستىڭ اياقتالعانىنا 80 جىل تولۋىنا وراي, «Bayer», «Bosch», «Volkswagen», «Lufthansa» جانە تاعى باسقا شامامەن 50 جەتەكشى نەمىس كورپوراتسياسى ورتاق مالىمدەمەگە قول قويىپ, 1933 جىلى ۇلتتىق-سوتسياليستەردىڭ بيلىككە كەلۋىندە بيزنەستىڭ ماڭىزدى ءرول اتقارعانىن مويىندادى. بۇل تۋرالى «Frankfurter Allgemeine Zeitung» باسىلىمى حابارلادى.
قۇجاتتا 1933 جىلى ۇلتتىق-سوتسياليستىك قوزعالىستىڭ بيلىككە كەلۋى – سول ۋاقىتتاعى ساياسي, اسكەري, سوت جانە ەكونوميكالىق قۇرىلىمدارداعى جاۋاپتى تۇلعالاردىڭ قاتەلىكتەرى مەن ارەكەتسىزدىگىنىڭ سالدارى ەكەنى جازىلعان. سونىمەن قاتار ءوز مۇددەسىن كوزدەگەن كوپتەگەن كومپانيا بۇل جۇيەنىڭ قالىپتاسۋىنا تىكەلەي نە جاناما تۇردە قولداۋ كورسەتكەنى دە اتالىپ وتەدى.
«بۇگىندە ءبىز – گەرمانيانىڭ زاماناۋي كومپانيالارى – وتكەننىڭ اۋىر ساباقتارىنان ناتيجە شىعارىپ, ناتسيستىك ءداۋىردىڭ قىلمىستارىن ۇمىتپاۋعا جانە تاريحي ادىلەتتى ساقتاۋ جولىندا جاۋاپكەرشىلىك الۋعا دايىنبىز. ءبىز ادام قۇقىقتارى مەن دەموكراتيالىق قۇندىلىقتاردى قورعاۋ جولىندا بىرلەسىپ ارەكەت ەتەمىز», دەلىنگەن اشىق حاتتا.
بۇل مالىمدەمەگە قول قويعاندار قاتارىندا «Adidas», «Hugo Boss», «Rhein-metall», «REWE», «Allianz», «Commerzbank», «Daimler Truck», «Deutsche Börse», «Deutsche Telekom», «Deutsche Bank», «E.ON», «Henkel», «Bayer», «Bosch», «Deutsche Bahn», «BMW», «DHL», «Mercedes-Benz», «Lufthansa», «Volkswagen» جانە تاعى باسقا ءىرى كورپوراتسيالار بار.
ناتسيستىك ديكتاتۋرا كەزىندە كوپتەگەن ءىرى نەمىس كومپانيالارى ءۇشىنشى رەيح باسشىلىعىمەن اشىق ارىپتەستىك ورناتىپ, وڭتايلى اسكەري كەلىسىمشارتتار جاساعان. كەيىن سوعىس اياقتالعان سوڭ, كەي نەمىس كاسىپكەرلەرى ناتسيستىك رەجىمگە قولداۋ كورسەتىپ, قۇلدىق ەڭبەك كۇشىن پايدالانعانى, رەيحتىڭ اسكەري قۋاتىن نىعايتۋعا ۇلەس قوسقانى جانە اسكەري قىلمىستارعا قاتىسقانى ءۇشىن تريبۋنالدا جاۋاپ بەرگەن ەدى.
