اقجايىق اۋدانىنىڭ مايدانگەرلەرى جايلى العاشقى جيناق 2010 جىلى جەڭىستىڭ 65 جىلدىعىنا وراي «مايدانگەرلەر» مەن «بوزداقتار» اتتى ەكى توم بولىپ جارىق كورگەن بولاتىن. قوس كىتاپقا 4000 بوزداق پەن 2000 مايدانگەردىڭ ەسىمى ەندى. ال تاريحقا كەلسەك, بۇرىنعى چاپاەۆ جانە تايپاق اۋداندارىنان مايدانعا 11800 ادام اتتانعان ەكەن. ەندەشە تالاي ەسىم كىتاپقا ەنبەي قالعانى اقيقات. كىتاپ اۆتورى – بەلگىلى ولكەتانۋشى, اقجايىق اۋدانىنىڭ قۇرمەتتى ازاماتى, جيداشى-قالامگەر باقتىعالي قوسپاەۆ اراعا 15 جىل سالىپ قايتا باسىلعان بۇل جيناقتا ارحيۆ قۇجاتتارى نەگىزىندە كوپتەگەن تىڭ مالىمەت قوسىلعانىن ايتادى.
جاڭا جيناقتىڭ تۇساۋكەسەر شاراسىنا اقجايىق اۋدانىنىڭ اكىمى مۇرات سەردالين, ەڭبەك ارداگەرلەرى, زيالى قاۋىم وكىلدەرى جانە وقىرماندار قاتىستى. قۇندى كىتاپتىڭ لەنتاسىن اۋدان باسشىسى مەن تىل جانە ەڭبەك ارداگەرى عيلاج لۇقپانوۆ كەستى.
كىتاپ ەكى تاراۋدان تۇرادى. ونىڭ بىرىندە اۋدان اۋماعىنان مايدانعا اتتانعان ساربازدار تۋرالى دەرەك قامتىلعان. بۇرىن چاپاەۆ اۋدانىنىڭ قۇرامىندا بولعان ءسارىومىر اۋىلىنىڭ 350 جاۋىنگەرى ءبىرىنشى رەت كىرىپ وتىر. ال ەكىنشى تاراۋدا ۇوس ارداگەرلەرىنىڭ, ولاردىڭ ۇل-قىزدارىنىڭ سوعىس تۋرالى ەستەلىكتەرى, سوعىستىڭ وتى شارپىعان وردا اۋدانىنان كوشىپ كەلگەن حالىقتىڭ جازبالارى, جاۋىنگەرلەردىڭ مايداندا جازعان كۇندەلىكتەرى قامتىلعان. سونىمەن بىرگە كىتاپتا اسكەري قۇجاتتار, ساربازداردىڭ ماراپات قاعازدارى دا جارىق كورگەن.
باتىس قازاقستان وبلىسى
