ماڭىزدى ءرولى اتالدى

پارلامەنت سەناتىنىڭ توراعاسى, الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ باسشىسى قاسىم-جومارت توقاەۆ استانادا ءوتىپ جاتقان تولەرانتتىلىق جانە كەمسىتپەۋشىلىك جونىندەگى ەقىۇ-نىڭ جوعارى دەڭگەيدەگى كونفەرەنتسياسىنا قاتىسىپ جاتقان بۇۇ باس حاتشىسىنىڭ وركەنيەتتەر اليانسى جونىندەگى جوعارعى وكىلى جورجە سامپايومەن كەزدەستى. كەزدەسۋ بارىسىندا قازاقستان مەن وركەنيەتتەر اليانسى ارا­سىن­داعى ىنتىماقتاستىقتى ودان ءارى دامىتۋعا قاتىستى, ونىڭ ىشىندە مادەنيەتارالىق ديالوگ سالاسىندا اليانس جۇرگىزىپ وتىرعان جوبا­لاردى جۇزەگە اسىرۋ ماسەلەلەرى بويىنشا پىكىر الماسىلدى. “قازاقستان اليانسپەن ءارىپ­تەس­تىكتى دامىتۋعا ءجىتى نازار اۋدارادى جانە ونىڭ ماقساتتارى مەن ءمىن­دەتتەرىن قولدايدى. ەلىمىزدىڭ ءما­دەنيەت مينيسترلىگى وركەنيەتتەر اليانسى اياسىنداعى ءىس-قيمىل­داردىڭ ۇلتتىق جوسپارىن جاساق­تاۋدى اياقتاۋدا. ول قازاقستان رەسپۋبليكاسىنىڭ اليانسپەن ىن­تىماقتاستىعىن ودان ءارى دامىتۋعا تىڭ سەرپىن بەرىپ, ونىڭ يدەيالارىن قازاقستاندىق قوعامدا تاراتۋعا ىقپال جاسايتىن بولادى”,– دەدى ق.توقاەۆ. ج.سامپايو قازاقستاننىڭ وركەنيەتارالىق جانە جاھاندىق دىنارالىق ديالوگتى ىلگەرىلەتۋ جولىنداعى, تولەرانتتىلىقتى نىعايتۋ مەن مادەنيەتتەردى ءوزارا جەرسىندىرۋدەگى ماڭىزدى ءرولىن اتاپ ءوتتى. بۇۇ جوعارعى وكىلىنىڭ اي­تۋىن­شا, قازاقستان اليانستىڭ “دوستار توبىنىڭ” بەلسەندى مۇشەسى رەتىندە ايماقتاعى قاۋىپسىزدىك پەن تۇراق­تى­لىقتى نىعايتۋ جولىندا ناقتى قادامدار جاساۋدا, دەپ حابارلادى پارلامەنت سەناتىنىڭ ءباسپاسوز قىزمەتى.