قاسىم قايسەنوۆ — ەكىنشى دۇنيەجۇزىلىك سوعىستا ۋكراينا, مولداۆيا, رۋمىنيا جەرىندە پارتيزاندىق قوزعالىستى ۇيىمداستىرىپ, باسقارعان قازاقتىڭ قايسار تۇلعاسى. ول سوعىستان امان ورالىپ, ەلگە كەلگەن سوڭ ءوز ەرلىگى جايلى جازىپ, بىرنەشە ۇرپاقتى پاتريوتتىق رۋحتا تاربيەلەگەن قالامگەر دە بولدى. دەسە دە, ونىڭ مايدانداعى جانقيار ەڭبەگى ۇزاق جىلدار بويى ەسكەرۋسىز قالدى.
سول جىلدار جايلى قايسەنوۆتىڭ ءوزى بىلاي دەپ ەسكە الادى:
ء«بىر كۇنى مەنىڭ كابينەتىمە ازداپ ءىشىپ العان راقىمجان كەلدى. ول كەزدە «جازۋشى» باسپاسىندا ديرەكتوردىڭ ورىنباسارىمىن. «قاسىم اعا, بۇل نە بولدى؟ مەنىڭ گەروي اتاعىمدى بەرمەدى» دەپ قاتتى كۇيىنىپ كەلدى. مەن ورنىمنان تۇرىپ, ەسىكتى جاۋىپ, وعان: ء«اي, راقىمجان, سەنىڭ مىناۋىڭ دۇرىس ەمەس, قارعام. ءبىز ءبارىمىز دە وتان قورعاۋعا اتتاندىق. بىزگە وردەن-مەدال ەمەس, ءتىپتى راقمەت ايتۋدىڭ دا كەرەگى جوق. ءبىز ازاماتتىق بورىشىمىزدى وتەدىك. مىناۋىڭ ۇيات بولدى, قارعام» دەدىم. سودان كەيىن قۇشاقتاپ, بەتىنەن ءسۇيدىم. ول ماعان: «قاسىم اعا, بۇنىڭىز دۇرىس ەكەن» دەدى».
بۇل — قايسەنوۆتىڭ تەك مايدانگەر عانا ەمەس, رۋحاني ۇستاز بولعانىن كورسەتەدى. بۇگىندە اتى اڭىزعا اينالعان راقىمجان قوشقارباەۆتىڭ جان كۇيزەلىسى مەن قايسەنوۆتىڭ اعالىق پاراساتى – قازاق رۋحىنىڭ تەرەڭ ءبىر كورىنىسى.
جىلدار ءوتىپ, اقىرى ادىلدىك سالتانات قۇرعان شاقتا قاسىم قايسەنوۆتىڭ دە ەڭبەگى ەلەندى. بىراق ءدال سول ءسات – ماراپاتتى كەۋدەسىنە تاققان مەزەت – باتىردىڭ جۇرەگىندە قۋانىش ەمەس, اۋىر كۇرسىنىسپەن ەستە قالدى.
«ۇيگە كەلدىم. ەسىكتى ىشتەن بەكىتىپ, ءبىر بوكال كونياكتى ءىشىپ الىپ, قاتتى جىلادىم. ءوزىمدى سول ناگرادانى ادەيى كۇتكەندەي سەزىندىم. شىن مانىندە, بۇل جۇلدىزدىڭ ماعان كەرەگى جوق ەدى. ماعان «پارتيزان قاسىم قايسەنوۆ» دەگەن اتاقتىڭ ءوزى جەتەتىن. كەيىن راقىمجانعا «حالىق قاھارمانى» اتاعىن بەرگەن كۇنى تاعى دا جىلادىم. ويتكەنى از دا بولسا ونىڭ ارۋاعى الدىندا ارىم تازارعانداي بولدى…», دەپ كۇرسىندى ق.قايسەنوۆ.
قاسىم قايسەنوۆتىڭ بۇل سوزدەرى — ونىڭ بيىك رۋحىنىڭ, قاراپايىم بولمىسىنىڭ جانە شىنايى ءپاتريوتيزمنىڭ دالەلى.
بۇگىن ءبىز باتىردىڭ جان سىرىن وقي وتىرىپ, ناعىز ەرلىكتىڭ نە ەكەنىن, ماراپاتتىڭ شىن سالماعى قاي كەزدە سەزىلەتىنىن ۇعامىز. قايسەنوۆ ءۇشىن «حالىق قاھارمانى» اتاعى – كەشىگىپ كەلگەن شىندىق ەدى. بىراق سول شىندىقتى ول وزىنەن بۇرىن ومىردەن وتكەن ارۋاقتاردىڭ اتىنان قابىلدادى.
قاسىم قايسەنوۆ — ەل ەسىندە ەرلىگىمەن دە, قالامگەرلىگىمەن دە ساقتالعان تۇلعا. ونىڭ ءومىر جولى جاس ۇرپاققا ۇلگى بولارلىق.
