فوتو: اشىق دەرەككوز
«مەملەكەتتىك قولداۋدىڭ ءبىر باعىتى – قايتارىمسىز گرانتتار. 2024 جىلى 428 ازامات ءوز بيزنەس-يدەياسىن جۇزەگە اسىرۋ ءۇشىن 400 اەك كولەمىندە, 1 476 800 تەڭگە گرانت العان. بيىل دا 260 ازاماتقا وسىنداي مۇمكىندىك بەرىلمەك. الايدا, وسى گرانت العان ازاماتتارعا مونيتورينگ جۇرگىزۋ باراسىندا 2024 جىلى 36 ازامات گرانت قاراجاتىن نىسانالى ماقساتى بويىنشا پايدالانباعاندىعى انىقتالعان. قازىر ولاردىڭ ءبىر بولىگى سوتقا بەرىلسە, وزگەلەرىمەن قاراجاتتى قايتارۋ جۇمىستارى جۇرگىزىلۋدە. بۇل – مەملەكەتتىك قولداۋدىڭ اشىقتىعىن باقىلاۋعا دەگەن ناقتى قادام», دەيدى باسقارما باسشىسى جانات وتەباەۆا.
قالا اكىمدىگىنىڭ حابارلاۋىنشا, 2025 جىلى 22 215 ادامعا اتاۋلى الەۋمەتتىك كومەك (ااك) تاعايىندالعان. بۇل كورسەتكىش وتكەن جىلدىڭ سايكەس كەزەڭىمەن سالىستىرعاندا 35,1 پايىزعا تومەندەگەن, ياعني, جۇمىسپەن قامتىلعان ازاماتتار سانى ارتقان.
سونىمەن قاتار, 1 جاستان 6 جاسقا دەيىنگى بالالارعا 1,5 اەك (5 538 تەڭگە) كولەمىندە جاردەماقى تولەنىپ جاتىر. قازىرگى ۋاقىتتا بۇل كومەك 3 682 وتباسىداعى 7 135 بالانى قامتىپ وتىر.
دەگەنمەن, مونيتورينگ جۇمىستارى ناتيجەسىندە ااك الاۋشىلار اراسىندا دا زاڭ بۇزۋشىلىقتار انىقتالعان. اتاۋلى الەۋمەتتىك كومەك الۋشىلاردىڭ ىشىندە 228 وتباسىندا 381 بالا 2022, 2023, 2024 جىلدارى باسقا وڭىرلەردە مەكتەپتە نەمەسە بالا-باقشادا تىركەلگەندىگىن انىقتاعان.
جانات ومىرسەيىتقىزىنىڭ ايتۋىنشا, بۇگىندە ول وتباسىلارعا اقپاراتتىق جۇيەدە قايتا ەسەپتەۋ جۇمىستارى جۇرگىزىلىپ, وتكەن ءۇش جىلدىڭ ەسەبى بويىنشا 84,2 ملن تەڭگە قايتارۋعا جاتاتىنى انىقتالعان. بۇگىنگى تاڭدا 8,8 ملن تەڭگە قارجى قايتا ەسەپتەۋ جۇيەسى ارقىلى بيۋدجەتكە قايتارىلعان.
«وتباسىلىق تسيفرلىق كارتاسى» اقپاراتتىق جۇيەسىنىڭ مالىمەتىنە سايكەس «D» جانە «ە» ساناتىنداعى وتباسىلاردى 2025 جىلى 10 پايىزعا, ياعني 64 525 وتباسىعا تومەندەتۋ جوسپارى بەكىتىلدى. اقپاراتتىق جۇيەدە 15 ساۋىردە بۇل ساناتتاعى وتباسىلار سانى 59 293 سانىن قۇرادى. جىل سوڭىنا دەيىنگى جوسپار 5 232 وتباسىعا اسىرىپ ورىندالدى», دەيدى باسقارما باسشىسى.
بۇگىندە شىمكەنتتە 41 970 مۇگەدەكتىگى بار ازامات تىركەلگەن, ونىڭ ىشىندە 8 099-ى – بالالار. ولاردىڭ ءومىر ساپاسىن ارتتىرۋ ءۇشىن 14,7 ملرد تەڭگە باعىتتالعان. قاراجاتقا وڭالتۋ قۇرالدارى مەن الەۋمەتتىك قىزمەتتەر كورسەتىلىپ جاتىر.
ايتا كەتەيىك, 2025 جىلى قالادا جاڭا نىساندار ىسكە قوسىلادى. اتاپ ايتقاندا, بوزارىق شاعىن اۋدانىندا 150 ورىندىق جاڭا وڭالتۋ ورتالىعى سالىنىپ جاتىر. سونىمەن قاتار, پسيحونەۆرولوگيالىق اۋىتقۋى بار بالالار مەن جاستارعا ارنالعان 150 جانە 50 ورىندىق ەكى ورتالىق مامىر ايىنىڭ سوڭىنا دەيىن اشىلادى.
