ءىس-شارانى پرەزيدەنت ءارحيۆىنىڭ ديرەكتورى ءاليا مۇستافينا اشىپ, سوعىس جىلدارىنداعى مايدانگەرلەردىڭ ەرلىگىن ەستە ساقتاۋدىڭ ماڭىزىنا توقتالدى. سونىمەن قاتار باسىلىمدى دايىنداعان ارحيۆشىلەر مەن سەرىكتەس ۇيىمدارعا العىسىن ءبىلدىردى.
– مەملەكەت باسشىسى ق.توقاەۆ: «سوعىستا قازا تاپقانداردى ۇمىتپاي, قاھارمان ەرلەرىمىزدىڭ رۋحىنا تاعزىم ەتۋ, ەل ىشىندە بەيبىتشىلىك پەن تىنىشتىقتى ساقتاۋ – بارشاعا ورتاق پارىزىمىز» دەگەن بولاتىن. «ەرلىككە تاعزىم» جيناعى – ارحيۆتىك فوتوسۋرەتتەر مەن ماتەريالدار نەگىزىندە ازىرلەنگەن عىلىمي-زەرتتەۋدىڭ ناتيجەسى. جيناق پرەزيدەنت ءارحيۆىنىڭ قورلارىن كوپشىلىككە تانىستىرۋعا جانە ناسيحاتتاۋعا مۇمكىندىك بەرەدى دەپ سەنەمىن. ەكى جيناققا وتاندىق جانە شەتەلدىك ارحيۆتەر مەن كىتاپحانالار قورىنان فوتوسۋرەتتەر مەن قۇجاتتار دا ەنگەن, – دەدى ارحيۆ ديرەكتورى.
«ەرلىككە تاعزىم» جيناعىندا باۋىرجان مومىش ۇلى, مانشۇك مامەتوۆا, ءاليا مولداعۇلوۆا, حيۋاز دوسپانوۆا جانە باسقا دا باتىرلاردىڭ ەستەلىكتەرى قامتىلعان. وندا شىنايى وقيعالار مەن ناقتى ادامدار, ولاردىڭ تاعدىرى مەن جۇرەك تەربەگەن سەزىمدەرى تۋرالى سىر شەرتىلەدى. جيناق سونىمەن بىرگە ەكىنشى دۇنيەجۇزىلىك سوعىس جىلدارىندا قازاقستاندىق ساربازداردىڭ مايدانداعى ەرلىك جولىن, ەل ەكونوميكاسىنىڭ سوعىس جاعدايىنا بەيىمدەلۋىن, قورعانىس-ونەركاسىپ كەشەنىنىڭ قۇرىلۋى جانە رەسپۋبليكانىڭ مايداننىڭ قۋاتتى ارسەنالىنا اينالۋ تاريحىن باياندايدى.
حالىق قاھارمانى باقىتجان ەرتاەۆ, مەملەكەت جانە قوعام قايراتكەرى ءاليحان بايمەنوۆ, اكادەميك ديحان قامزابەك ۇلى, مۇراعات مامانى ەۆگەنيا چيليكوۆا اتالعان كىتاپتاردىڭ تۇساۋىن كەسىپ, وزەكتى ويلارىن ورتاعا سالدى.
– ءبىرىنشى بولىمدە ەكىنشى دۇنيەجۇزىلىك سوعىس شايقاستارىنا قازاقستاننىڭ اسكەري قۇرامالارىنىڭ قاتىسۋى تۋرالى ايتىلادى. جاريالانعان زەرتتەۋلەرگە قاراعاندا, ەلىمىزدەن سوعىسقا كەمىندە 9,5 مىڭ ايەل قاتىسقان. كىتاپتىڭ ەكىنشى بولىمىندە ەلىمىزگە ەۆاكۋاتسيالانعان ونەركاسىپ كاسىپورىندارى, اۋىل شارۋاشىلىعىنىڭ ۇلەسى, ەڭبەككەرلەردىڭ جانقيارلىعى تۋرالى ايتىلادى. ءۇشىنشى ءبولىم قاراپايىم ادامداردىڭ سوعىس كەزىندەگى ومىرىنە ارنالدى. تىل ارداگەرلەرىنىڭ جەڭىسكە قوسقان ۇلەسىن ۇمىتپاۋىمىز كەرەك», دەدى كىتاپ قۇراستىرۋشىلارىنىڭ ءبىرى
ەۆگەنيا چيليكوۆا.
ايتۋلارىنشا, جيناقتى دايىنداۋعا ەكى جىلعا جۋىق ۋاقىت كەتكەن. پرەزيدەنت ءارحيۆىنىڭ ماماندارى ءوز قورلارىنداعى ماتەريالداردى پايدالانۋمەن قاتار, ەلىمىزدىڭ وڭىرلىك ارحيۆتەرى مەن ۇلتتىق كىتاپحانالارىنان, وزبەكستان مەن رەسەي ارحيۆتەرىنەن دە اقپارات جيناقتاعان. جيناقتىڭ جالپى كولەمى 253 بەتتى قۇرايدى. جيناققا سوعىس جىلدارىندا شىققان 30-دان استام گازەت قيىندىسى, 170-تەن استام فوتوسۋرەت جانە 130 تاريحي قۇجات ەنگەن.
«داڭق» وردەنىنىڭ ءۇش دارەجەسىنىڭ تولىق يەگەرى المۇقان سەمبينوۆ تۋرالى جيناق (قۇراستىرعاندار: ت.قىشقاشباي, ع.يساحان, ا.قارشىعا ۇلى) باتىردىڭ مايدانداعى جانە بەيبىت جىلدارداعى ەڭبەگىن ءتۇرلى قۇجاتتارمەن, دەرەكتى جازبالارمەن, ەستەلىكتەرمەن دايەكتەي تۇسەدى. بۇل مۇرا ەلوردالىقتاردىڭ ءا.و.سەمبينوۆ جونىندەگى (استانادا كوشە اتى بەرىلگەن) ماعلۇماتىن تولىقتىرادى.
