ء«بىز تۇرعىندار مەن اۋدان اكىمدىكتەرىنەن جارىقسىز وتىرعان ۋچاسكەلەر تۋرالى اقپاراتتى ۇزدىكسىز جينايمىز. مىسالى, الاتاۋ اۋدانىندا بىردە-ءبىر كوشەسىندە شامى جوق تۇركىستان شاعىن اۋدانى بار. ءبىزدىڭ ماماندار اينالما جولدار جۇرگىزدى, سىزبالار سالدى, قاجەتتى ماتەريالدىڭ مولشەرىن ەسەپتەدى. ناتيجەسىندە وسى شاعىن اۋداننىڭ 7 كوشەسىندە تىرەكتەر مەن كرونشتەيندەرمەن بىرگە 90 شام ورناتىلدى», دەدى يگور مىسيك.
سونىمەن قاتار, الماتىداعى ءىرى ساياباقتاردا دا جارىقتاندىرۋ جۇيەسىن جاڭارتۋ جۇمىستارى قولعا الىنعان. ماسەلەن, 28 گۆاردياشى-پانفيلوۆشىلار ساياباعىندا ارميا ءۇيى ماڭىنا 11 بيىك شام تىرەگى, 22 تروتۋارعا ارنالعان شام جانە 30 پروجەكتور ورناتىلىپ, عيماراتتىڭ كەلبەتى ايشىقتالا ءتۇستى.
بۇدان بولەك, «شۇعىلا» جانە «جەلتوقسان» ساياباقتارىندا, سونداي-اق سەيفۋللين مەن شولوحوۆ كوشەلەرىنىڭ قيىلىسىندا جەراستى كابەلدەرى جاڭارتىلىپ جاتىر. كىشى الماتى وزەنىنىڭ بويىمەن (ماقاتاەۆتان قۇرمانعازى كوشەسىنە دەيىنگى ارالىقتا) بەس شاقىرىمدىق كابەلدىك جەلىنى الماستىرۋ جۇمىستارى باستالدى. «الماتى قالا جارىق» بۇل جۇمىستاردى جاز مەزگىلىنە دەيىن اياقتاۋدى جوسپارلاپ وتىر.
