ماۋلەن اشىمباەۆ اتاپ وتكەندەي, پالاتانىڭ قاراۋىنا جاڭا سالىق كودەكسى كەلىپ ءتۇستى. وسىعان بايلانىستى سەنات توراعاسى قۇجاتتى اشىق تالقىلاۋ جانە ونى قاراۋعا ءماسليحات دەپۋتاتتارىن, ساراپشىلار مەن بيزنەس-قوعامداستىق وكىلدەرىن بەلسەندى جۇمىلدىرۋ ماڭىزدى ەكەنىن ايتتى.
«جاڭا سالىق كودەكسى پرەزيدەنت قاسىم-جومارت توقاەۆتىڭ تىكەلەي تاپسىرماسىمەن ازىرلەندى. قۇجات ادىلەتتىلىك, اشىقتىق جانە تيىمدىلىك قاعيداتتارىنا نەگىزدەلگەن جاڭا سالىق مادەنيەتىن قالىپتاستىرۋدى كوزدەيدى. سەناتورلار كودەكستى دايىنداۋ جۇمىستارىن الدىن الا جۇرگىزىپ, ۇكىمەتكە ءتيىستى ۇسىنىستار جىبەردى. ەندى جاڭا سالىق كودەكسىنىڭ نورمالارىن جان-جاقتى قاراستىرىپ, ءماسليحات دەپۋتاتتارىن, ساراپشىلار مەن بيزنەس-قوعامداستىق وكىلدەرىن تارتا وتىرىپ, اشىق فورماتتا سىندارلى تالقىلاۋلار جۇرگىزۋ قاجەت», دەدى م.اشىمباەۆ.
سونىمەن قاتار بيۋرو مۇشەلەرى الداعى بەيسەنبىدە وتەتىن پالاتا وتىرىسىندا «2007 جىلعى 26 ماۋسىمداعى قازاقستان رەسپۋبليكاسىنىڭ ۇكىمەتى مەن ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ اوسشك حاتشىلىعى اراسىنداعى حاتشىلىقتىڭ قر اۋماعىندا بولۋى شارتتارى تۋرالى كەلىسىمگە وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭدى قاراۋ جونىندە قاۋلى قابىلدادى. بۇل قۇجات مەملەكەت باسشىسىنىڭ اوسشك-ءنى تولىققاندى حالىقارالىق ۇيىمعا اينالدىرۋ تۋرالى تاپسىرماسىن ىسكە اسىرۋ ماقساتىمەن ازىرلەندى.
دەپۋتاتتار سەنات وتىرىسىندا «قازاقستان رەسپۋبليكاسىنىڭ ۇكىمەتى مەن اقش ۇكىمەتى اراسىنداعى الماتى قالاسىندا اقش كونسۋلدىق مەكەمەسىنىڭ ءۇي-جايلارىن سالۋ ءۇشىن اقش ۇكىمەتىنە جەر ۋچاسكەسىن جالعا بەرۋ تۋرالى كەلىسىمدى راتيفيكاتسيالاۋ تۋرالى» زاڭدى دا قارايدى.
بۇعان قوسا «تۇركىتىلدەس مەملەكەتتەردىڭ ىنتىماقتاستىق كەڭەسىن قۇرۋ تۋرالى ناحچىۆان كەلىسىمىنە وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» جانە «قازاقستان رەسپۋبليكاسىنىڭ ۇكىمەتى مەن بىرىككەن اراب امىرلىكتەرىنىڭ ۇكىمەتى اراسىنداعى جەل ەلەكتر ستانساسىنىڭ جوباسىن ىسكە اسىرۋ تۋرالى كەلىسىمدى راتيفيكاتسيالاۋ تۋرالى» زاڭدار دا پالاتا وتىرىسىنىڭ كۇن تارتىبىنە شىعارىلدى.
سونداي-اق ءىس-شارا بارىسىندا سەناتورلار وسى اپتادا وتكىزىلەتىن كوميتەت وتىرىستارىندا قوزعالاتىن ماسەلەلەردى پىسىقتادى جانە بۇعان دەيىن ءماجىلىس قابىلداعان زاڭداردى ءبولدى.
