پودكاستتى ءداستۇرلى تۇردە سەنات توراعاسى ماۋلەن اشىمباەۆ جۇرگىزىپ وتىردى. تالقىلاۋعا ساۋدا جانە ينتەگراتسيا ءمينيسترى ارمان شاققاليەۆ, «شين-لاين» كومپانيالار توبىنىڭ پرەزيدەنتى اندرەي شين جانە KPMG كاۆكاز جانە ورتالىق ازيا سەرىكتەسى بولات مىڭباەۆ قاتىستى.
تالقىلاۋ بارىسىندا قاتىسۋشىلار اقش-تىڭ پروتەكتسيونيستىك ساياساتى مەن جاھاندىق لوگيستيكالىق تىزبەكتەگى وزگەرىستەردەن باستاپ وتاندىق وندىرۋشىلەردىڭ سىرتقى نارىقتارداعى پوزيتسيالارىن نىعايتۋدى كوزدەيتىن ناقتى قادامدارعا دەيىنگى تاقىرىپتارعا جان-جاقتى توقتالدى.
سەنات توراعاسى اتاپ وتكەندەي, قازاقستان ەكسپورتقا باعدارلانعان ەل بولۋى كەرەك. ال وتاندىق كومپانيالار جاھاندىق ويىنشىلارعا اينالۋى قاجەت.
«كومپانيالارىمىز دامىپ, ەكونوميكالىق, يننوۆاتسيالىق, تەحنولوگيالىق تۇرعىدان كوشباسشىلاردىڭ ءبىرى بولۋىمىز ءۇشىن ءبىز جاڭا نارىقتاردى يگەرۋىمىز كەرەك. قازىرگى مۇمكىندىكتەردى ءاردايىم نازاردا ۇستاۋ قاجەت. سونداي-اق مەملەكەتتىڭ وتاندىق كومپانيالارعا سول مۇمكىندىكتەردى پايدالانۋعا قولداۋ كورسەتۋى اسا ماڭىزدى. مەملەكەتتىك قولداۋ تۇسىنىكتى, ءتيىمدى بولۋعا جانە وتاندىق وندىرۋشىلەردىڭ شەتەلدىك نارىقتاعى ورنىن نىعايتۋعا ىقپال ەتۋگە ءتيىس», دەدى م.اشىمباەۆ.
پودكاست بارىسىندا ساۋدا بايلانىستارى مەن ەكسپورتتىق ستراتەگيالاردى كەڭەيتۋ جونىندە كاسىبي ۇسىنىستار دا ايتىلدى. بۇعان قوسا قوسىلعان قۇنى بار ءونىم ۇلەسىن ۇلعايتۋ, ىشكى ۇزدىكسىز ءوندىرىستى قامتاماسىز ەتۋ مەن تۇراقتى ەكسپورتتىق ينفراقۇرىلىمدى قالىپتاستىرۋ ماسەلەلەرى ءسوز بولدى. پودكاستىڭ تولىق نۇسقاسىن YouTube-تاعى Taldau Talks ارناسىنان كورۋگە بولادى.
