بيىلعى بايقاۋ بۇرىنعىدان وزگەرەك, فەستيۆالعا العاش رەت موڭعوليا, ماكەدونيا, نورۆەگيا, فينليانديا مۋزىكانتتارى قاتىسپاق جانە ونەرپازداردىڭ ونەرىنە باعا بەرەتىن قازىلار القاسىنىڭ قۇرامى سالماقتى. سونداي-اق, ۇيىمداستىرۋشىلار دودانى قىزىقتى ەتۋ ءۇشىن كونتسەرتتىك باعدارلاماعا قۇپيا سىيلىق ازىرلەپ وتىرعانىن ايتتى. ءىىى حالىقارالىق كلاسسيكالىق مۋزىكا فەستيۆالىندە باق سىنايتىن توعىز جانە ون سەگىز جاس ارالىعىنداعى وتىز ۇمىتكەردىڭ تورتەۋى ءوزىمىزدىڭ ورەندەر. كىشى توپتا توعىز جاسار نۇرسۇلتان ومارعازين كۇيساندىق قۇدىرەتىن كورسەتسە, ورتا توپتا بەكزات راقىموۆ, ەرەسەك توپتا نازەركە قابدراحمانوۆا مەن سانجار زۇلپىحاروۆ ەل نامىسىن قورعايدى. ونەر دە سپورت سەكىلدى, ۇنەمى جاتتىعۋدى قاجەت ەتەدى. مۋزىكا الەمىندەگى اسپاپتاردىڭ ىشىندە پيانينومەن بەرىلەتىن سەزىم سىرى وزگەشە. موتسارت پەن بەتحوۆەننىڭ سۇيرىكتەي ساۋساعىن پەرنەگە تيگىزبەي-اق اسەم ءۇن اۋەلەتتىرگەن بۇل قۇرالدىڭ قازاقتىڭ قوبىزى بەن دومبىراسىنان قاسيەتى كەم ەمەس. ەۋروپالىقتاردىڭ پيانينونى كلاسسيكالىق مۋزىكانىڭ شىڭىنا كوتەرۋىندە ۇلكەن سىر جاتىر. بۇل اسپاپ پەرنەسىنە ساۋساعى تيگەن مۋزىكانتتى ول ۇلكەن دانالىققا جەتەلەيتىندەي اسەر قالىپتاسقان. مۋزىكا كىسىنى جاسىنا قاراي بولمەيدى. دانالىق جولىن تاپساڭ بولدى, سەنى الىسقا سامعاتىپ ۇشىرا جونەلەدى. ونەر ادامى مەيىرىم مەن سۇلۋلىقتىڭ جارشىسى دەگەن ۇلكەن جۇك ارقالايدى. اتالمىش كونكۋرستىڭ ەلىمىزدەگى مۋزىكا ونەرىن دامىتۋداعى ماڭىزى جايلى ايتىلعان ءباسپاسوز ءماسليحاتىندا جوبانىڭ كوركەمدىك جەتەكشىسى دەنيس ماتسۋەۆ: «تالانتتى جاستى اتا-انا ءبىر جاعىنان, ال مىقتى پەداگوگ ەكىنشى تۇسىنان بارىنشا قولداپ وتىرۋعا ءتيىس, ايتپەسە, ءبىر عانا دارىن ءوز كۇشىمەن الىسقا ۇزاپ كەتە المايدى. مۋزىكالىق اسپابى بولماسا, قاجەتتى جابدىعى جەتپەسە, ونەرىن باعالاپ, ارقاسىنان قاعىپ وتىراتىن تۇلعا بولماعان جاعدايدا, ەڭبەكتىڭ ءبارى ەش كەتەدى, وندا شىنايى تالانت قايدان تۋادى؟» دەدى. وسكەلەڭ ۇرپاقتى رۋحاني جاعىنان تاربيەلەۋ ءۇشىن جانە ولاردىڭ شىعارماشىلىق جولىنىڭ قالىپتاسۋىنا قولداۋ كورسەتۋ ماقساتىندا وتكىزىلىپ وتىرعان بايقاۋدىڭ دەمەۋشىلەرى – مادەنيەت جانە سپورت مينيسترلىگى, استانا قالاسى اكىمدىگى جانە «AccordidiAstana» قوعامدىق قورى. «مۋزىكا – قازىنا ساقتايتىن قويما, مۇندا بارلىق ۇلت وكىلى ءوزىنىڭ بايلىعىن تەڭ مۇمكىندىكتە پايدالانۋ ءۇشىن سالادى» دەگەن ورىستىڭ بەلگىلى كومپوزيتورى پەتر يليچ چايكوۆسكيدىڭ تۋعانىنا بيىل 175 جىل تولىپ وتىر دەسەك, بايقاۋدىڭ ءمانى مەن ماڭىزى جايلى ايتىلعان جيىنعا رەسەيدەگى ماريا تەاترىنىڭ باسشىسى, ماەسترو ۆالەري گەرگيەۆتىڭ قاتىسۋى دا بەكەر ەمەس. جەڭىستىڭ 70 جىلدىعىمەن تۇسپا-تۇس كەلگەن جاس ورىنداۋشىلار بايقاۋىن وتكىزۋ قازاقستان ءۇشىن ۇلكەن جەتىستىك ەكەنىن ايتقان ونەر يەسى حالقىمىزدىڭ «بالانى جاستان...» دەگەن قاعيداسىنا تولىق قوسىلاتىنىن جەتكىزدى.
قۇندىز ەرالى.
استانا.
