ءىس-شارا ساپ تۇزەۋدەن باستالىپ, مەملەكەتتىك تۋ كوتەرىلىپ, جاس ساربازدار وتان الدىنداعى انتتارىن قابىلادى. بۇل – ولاردىڭ ەرلىككە, ادالدىققا جانە اسكەري پارىزىن ءمىنسىز اتقارۋعا بەرگەن سەرتى.
سالتاناتتى جيىندا قر ۇقك شەكارا قىزمەتىنىڭ الماتى وبلىسى بويىنشا دەپارتامەنتىنىڭ باستىعى, پولكوۆنيك الىبەك كايۋپوۆ, «زاستاۆا تارلاندارى» رەسپۋبليكالىق قوعامدىق ۇيىمنىڭ توراعاسى, قورداعى پولكوۆنيك داۋلەتقالي مامىرقانوۆ, رايىمبەك اۋدانى بويىنشا شەكارا باسقارماسىنىڭ باستىعى, پولكوۆنيك نۇرتاي ساحيەۆ قاتىسىپ, ازاماتتىق بورىشىن وتەۋدى پارىز ساناعان جاس ساربازدارعا انتقا ادال بولىپ, ءوز مىندەتتەرىن ابىرويمەن اتقارۋعا تىلەكتەستىكتەرىن ءبىلدىردى.
«قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ شەكارا قىزمەتى – ەلىمىزدىڭ تىنىشتىعى مەن بەيبىتشىلىگىنىڭ كەپىلى. الماتى وبلىسىنىڭ ۇيعىر, رايىمبەك, كەگەن اۋداندارى بويىنشا شەكارا باسقارماسىندا قىزمەت اتقاراتىن سىزدەر وتانىمىزدىڭ شەكاراسىن قورعاۋدا ماڭىزدى ءرول اتقاراسىزدار. انتقا ادال بولۋ – بۇل وتانعا قىزمەت ەتۋدىڭ ەڭ بيىك كورىنىسى. شەكارا – ەلدىڭ قالقانى, ال سارباز سول قالقاننىڭ مىزعىماس تىرەگى, ەل تىنىشتىعى ءۇشىن بار كۇش-جىگەرلەرىڭىزدى اياماي قىزمەت ەتەتىندەرىڭىزگە سەنىمدىمىز», – دەگەن ۇيعىر اۋدانىنىڭ اكىمى بوتا سەرىكقىزى جاس ساربازدارعا مىقتى دەنساۋلىق, قاجىماس قايرات جانە ەلگە ادال قىزمەت ەتۋلەرىنە تىلەكتەستىگىن ءبىلدىردى.
مەرەكەلىك شارا ساربازداردىڭ توتەنشە جاعدايلاردا سەنىمدى ءارى ۇيلەسىمدى ارەكەت ەتە الاتىنى تاكتيكالىق ءىس-قيمىلدار كورسەتۋمەن جالعاسىپ, دايىندىق دەڭگەيى مەن ءتارتىبىن كورەرمەندەر تاماشالادى.
الماتى وبلىسى.
